اوكازيون الدهب سيبدأ خلاص، والتجار اتفقوا على مبادرة لخفض الأسعار فهل العروض ستكون متاحة على كل أنواع الذهب أم أشياء بعينها؟
طيب هتستمر لغاية امتى؟ وازاي تحسب سعر المصنعية عشان تتأكد التاجر عاملك خصم ولا لأ؟ وهل المبادرة هتنجح في خفض أسعار المعدن الأصفر؟ واخيرا بقى سعر الحرام هيبقي بكام؟
خبر حلو لكل المصريين وخصوصا العرسان: شعبة الدهب أعلنت عن مبادرة لتخفيض سعر المصنعية على الجرام في المشغولات الذهبية، لمدة شهر غالبا.
وطبعا انت بتسأل ليه المشغولات الذهبية بس؟
بص ياسيدي، حسب هاني ميلاد، رئيس شعبة الدهب، اللي قالب حال السوق هو الإقبال الكبير من المواطنين على شراء السبائك والجنيهات الدهب كملاذ آمن لحفظ قيمة الفلوس في وقت الأزمات الاقتصادية.
وفي المقابل المشغولات الذهبية زي الغوايش والخواتم والسلاسل مركونة عند التجار، فيبقى إيه الحل لموازنة الأسعار؟
الإعلان عن عروض في أسعار مصنعيات على المشغولات الذهبية فحضرتك تشتريها عشان تستفيد بالخصم، وبكده الضغط هيقل على السبايك والجنيهات ويحصل انخفاض في الأسعار والكل هيطلع كسبان.
لانه ببساطة لو كنت ناوي تشتري سبيكة أو جنيهات تركنهك جنبك، دلوقتي هتشتري غويشة أو خاتم منها زينة للمدام، ومنها خزينة تحفظ فيها قيمة فلوسك.
وفي نفس الوقت ، والتاجر هيبيع المخزون اللي عنده والكل هيستفيد.طيب إيه يمنع ان أسعار المشغولات الذهبية تزيد هي كمان لو الطلب عليها ارتفع؟
من الناحية دي اطمن اوي، لأن هاني ميلاد أكد إن محلات الدهب عندها مخزون كبير من المشغولات الذهبية، وتقدر تغطي احتياجات السوق بعكس السبائك والخام اللي بتتسحب من السوق كل يوم أول بأول وبكميات كبيرة.
عشان كده رئيس الشعبة نصح اي حد عاوز يبتشتري دهب يروح للمشغولات الذهبية علطول، وبلاش الضغط الكتير على السبايك لان ده بيخنق السوق، والتجار بيضطروا يشتروا الدعب بأسعار غالية عشان يبيعهه بالغالي برضة.
وعشان ميضحكش عليك وتعرف التاجر عاملك خصم فعلا ولا لأ، لازم نجاوب على السؤال ده: ازاي تحسب سعر المصنعية وانت رايح تشتري الدهب؟
بص ياسيدي في قاعدتين لازم تعرفهم:
الأولى: سعر المصنعية بيختلف من تاجر للتاني، وكل تاجر بيحدده حسب الشغل الموجود في القطعة اللي هتشتريها غويشة بقى أو خاتم أو سلسلة، وحسب نوع الدهب سواء المصري أو الهندي والإيطالي والأبيض والسويسري.
وطبعا لما الشغل بيزيد، سعر المصنعية كمان بيزيد ، بس عادة في حد أدنى لسعر المصنعية على اي قطعة هتشتريها.
يعني مثلا سعر المصنعية على عيار 21 يتراوح من من 7 إلى 10%، نقلا عن الأهرام.
وتاني قاعدة ان الشركات الكبيرة واللي اسمها ماركة في السوق ليها أسعار مصنعية مختلفة بتكون أعلى شوية من باقي السوق، وفقا لفيديو اليوم السابع.
عشان كده قبل ماتروح المحل احسب سعر المصنعية بنفسك وقارنه بالسعر اللي هيقدمه التاجر عشان تعرف هو عاملك خصم ولا لأ
وكده بقى يفضل اخر سؤال، هل المبادرة هتنجح في خفض أسعار الدهب؟قبل مانجاوب على السؤال ده ، لازم تعرف ان في اقتراح تاني للسماح بدخول دهب المصريين في الخارج لمصر من غير جمارك، عشان نزود المعروض في السوق والأسعار تقل.
لكن لو استمر ارتفاع الطلب على الدهب وانخفاض المعروض، سعر جرام الدهب عيار 21 هيوصل إلى 3000 جنيه، حسب هاني ميلاد رئيس الشعبة.
فهل تتفق معاه؟ ولو معاك قرشين دلوقتي هتستفيد من المبادرة الجديدة ولا برضه هتدور على السبايك أو الجنيهات؟
شاركنا في التعليقات.
