تعرف انه من الممكن أن يظهر الفرج من بين الأزمة، نعم كما قرأت، فبعد قرار البنك المركزي برفع سعر الفائدة 3% على الإيداع والاقراض، فإن البنوك المصرية قد قررت أن ترفع سعر الفائدة، وسوف تطرح شهادات إدخار بأعلى عائد قد تتخيله، فكن أول المستفيدين، واعرف ما وصل إليه عائد الشهادات؟
البنوك من انهاردة ولمدة أيام قدام هتبقى في اجتماعات طارئة للجان الأصول والخصوم، عشان تناقش الزيادة في سعر الفايدة اللي هتحددها على القروض الشخصية والتمويلات، وعلى شهادات الادخار والحسابات.
لكن من اكتر التوقعات اللي اتقالت انها هتحصل، ان اكبر بنكين في مصر هيطرحوا شهادات ادخار بأعلى عائد ممكن الشهادات توصله، وباقل تمن شراء.
يعني هتقدر تشتريها ب1000 جنيه ومضاعفاتها، وهتبقى مدتها 3 سنين، بعائد شهري 19%، ولو صرفت العائد كل ربع سنة، هتبقى بعائد %19.25.
ولو اتصرفت بعد نص سنة العائد هيبقى 19.5%، والمفاجأة بقى ان العائد كل سنة بيوصل لـ 20.25%، ومش بس كدا كمان هيطرحوا شهادات خماسية، مدتها 5 سنين، وتقدر برضو تشتريها ب1000 جنيه ومضاعفاتها
والعائد الشهري 15.25%.
وده لان البنوك عارفة ان الناس بتفضل اكتر ان الشهادات متكونش مدتها كبيرة وتقدر تصرف العائد في اقرب وقت. ولو فعلا سعر فايدة الـ 20% اتطبق، ده هيبقى من اعلى العوائد اللي اتطبقت، وهتساعدك كل ما تدفع اكتر تستفيد اكتر
لكن لغاية دلوقتي وقبل اي كلام رسمي، البنوك لسه بتتعامل بشهادات متنوعة في دورية الصرف وعائد بتاعها بيتراوح بين 15% لـ 17.25%، ودي اعلى نسبة رسمية لغاية دلوقتي.
طب اشمعنا دلوقتي البنوك قررت تعمل كدا ؟
لانها عايزة تشغل النشاط المصرفي، وتجذب العملاء انهم يدفعوا فلوس، فكان الحل في شهادات الإدخار، اللي ناس كتير بتفضل انها تستثمر فيها فلوسها.
بالذات بعد ما البنك المركزي المصري رفع الفايدة 300 نقطة أساس مرة واحدة، وده عشان البنوك لازم تواكب أهداف البنك المركزي، وان هدفه الاول هو انه يقلل من نسبة التضخم في مصر اللي زادت ووصلت لـ 21%، ومتسببة في زيادة أسعار السلع علينا بشكل مبالغ فيه.
والطلبات على السلع بقت اقل، بمعنى ان مفيش حد بيشتري بكميات زي الأول، وده موقف حركة السوق والشراء، لكن لجنة السياسة النقدية اكدت على أن أسعار العائد الأساسية بتتحدد حسب معدلات التضخم المتوقعة، مش معدلات التضخم السائدة.
لكن في نفس الوقت هي هتفضل تحاول وتسعى انها تحقق هدف استقرار الأسعار.لكن اول ما البنوك تطرح الشهادات الجديدة اللي بعائد 20.25%، بشكل رسمي دي هتبقى فرصتك انك تستفيد بالعائد الكبير ده اللي مبيتكررش كتير.
