رغم الأزمات الإقتصادية التي تعاني منها كثير من دول العالم إلا أن هذا لم يؤثر على أرباح أكبر رجال الأعمال في العالم، وهذا لأنهم حققوا مليارات في أول 6 شهور من 2023.
بس السؤال هنا: هما حققوا أرباح قد إيه؟ ومين رجل الأعمال اللي قدر أنه يجمع 100 مليار دولار في 6 شهور؟ وياترى مؤسس الفيس بوك كسب كام من وراه؟
بنسمع كتير عن أغنياء العالم وحجم ثرواتهم اللي بيوصل لمليارات الدولارات وأكتر كمان، لكن يا ترى هما بيكسبوا قد إيه عشان يقدروا يكونوا الثراوت دي ويحافظوا عليها؟
انا أقولك، حسب موقع القاهرة 24، أغنى اغنياء العالم حققوا ثروات كبيرة جدا في أول 6 شهور السنة دي لدرجة إن واحد منهم جمع 100 مليار دولار في 6 شهور ودي تعتبر ميزانية لبعض الدول
بس هو مين الشخص اللي قدر أنه يجمع كل المبلغ ده؟
حسب مؤشرات بلومبيرج للأثرياء المنشورة مؤخرًا، الملياردير إيلون ماسك رئيس شركة تسلا والمالك الأول لموقع تويتر كسب 100 مليار دولار في أول 6 شهور السنه دي، وده بعد ارتفاع تسليمات سيارات تسلا والاعتماد على تقنيات جديدة
ووفقا للمؤشرات، زادت ثروة أغنى 500 شخص في العالم بقيمة 852 مليار دولار خلال النص الأول من سنة 2023، وده لأن أسهم شركاتهم في السوق ارتفعت بشكل كبير جدا
وده بحسب موقع صدى البلد، كل شخص من الـ 500 دول كسب تقريبا 14 مليون دولار يوميا في سنة 2023، يعني بالمصري حوالي 434 مليون جنيه.. وده يعتبر أفضل عام ليهم بالنسبة لتحقيق أرباحهم من سنة 2020
دي كمان بعض الشركات حققت مكاسب ضخمة في 2023 زي مثلا شركة أبل و ميكروسوفت، كمان شركة إنفيديا ودي واحدة من أكبر شركات البرمجة على مستوى العالم وصلت القيمة السوقية فيها لتريليون دولار
لكن نرجع للسؤال الأهم أغنياء العالم كسبوا كام خلال أول 6 شهور السنه دي؟
شوف يا سيدي، حسب موقع القاهرة 24، إيلون ماسك يجي في الترتيب الأول وده لأنه كسب 100 مليار دولار على حجم ثروته اللي رصيدها دلوقتي 234 مليار دولار، وفي المرتبة التانية يجي برنارد آرنو بثروة 200 مليار دولار وده كسب 38 مليار دولار السنه دي
أما بقى جيف بيزوس اللي ثروته وصلت لـ 154 مليار دولار فهو كسب 47 مليار دولار، يجي بعديه بيل جيتس بثروة 134 مليار دولار وده بقى كسب 24 مليار دولار
بعدهم يجي لاري إيليسون اللي ثروته وصلت لـ 133 مليار دولار وكسب عليهم 41 مليار دولار، ده كمان ستيف بالمر كسب 32 مليار دولار على ثروته اللي وصلت لـ 118 مليار دولار
كمان بيجي وارن بافيت في المرتبة السابعة وده بقى حجم ثروته 115 مليار دولار وكسب السنة دي 7 مليار دولار، بعده يجي لاري بايج برصيد ثروة 110 مليار جنيه كسب فوقيهم خلال 6 شهور 26 مليار و 7مليون دولار
ويجي مارك زوكربيرج مؤسس الفيس بوك في المرتبة الأخيرة وده لأن حجم ثروته 104 مليار دولار لكن حقق 59 مليار دولار في 6 شهور بس
ودلوقتي قولنا كسبت كام أول 6 شهور السنة دي؟
