مبروك للعملاء الذي يضعون أموالهم في البنوك، حيث أنه مع قرار البنك المركزي برفع الفايدة3% سيزيد العائد لكم. أما الحاصلين على قروض من البنوك أو من ينوي التقدم للحصول على قرض، فلابد أن يعرف تأثير قرار رفع الفائدة عليه، ومتى سيدفع أموال كثيرة للبنك، هذا ما سنتعرف عليه من خلال التقرير التالي:
خلاص البنك المركزي رفع الفايدة 3% وبكده توصل نسبة الزيادة من اول السنة لغاية دلوقتي إلى 8%.بس زي مافي ناس مبسوطة وهتكسب، في ناس شالت الهم ودلوقتي اللي بيفكر ياخد قرض هيقدم خطوة ويرجع عشرة.
والحكاية ومافيها ان قرار البنك المركزي زي مازود الفايدة إلى 16.25% على الإيداع، برضه زود الفايدة على الاقتراض إلى 17.25٪.
يعني حضرتك لو احتجت قرض شخصي تفك بيه زنقتك أو قرض سيارة أو قرض تمويل عقاري أو حتى قرض شراء أجهزة كهربية، هتدفع أكتر لان البنك هيرفع الفايدة عليك.
أما بقى لو سبق واخدت قرض ولسة بتسدده فمصيرك بيحدده حاجة واحدة بس: وانت بتقدم على القرض اتفقت مع البنك على اي نوع فايدة؟
لو متغيرة، للاسف من هنا رايح هتدفع فوايد اكتر، إنما لو ثابتة، هتدفع نفس الفايدة من غير اي تغيير.
وطبق القاعدة دي بقي على اي قرض، وطبعا القروض الجديدة الفايدة عليها هتزيد هتزيد، وحتى الحكومة نفسها هينولها من الزيادة جانب.
وببساطة كده زي ما انت بتستلف من البنك، الحكومة كمان عليها التزامات وعندها عجز في الموازنة يعني مصاريفها اكتر من دخلها وهنا تجيب الفلوس منين؟
ايوة بالظبط زي مافكرت، وزارة المالية بتستلف هي كمان من البنوك، بس في الحالة دي بتطرح حاجة اسمها أذون خزانة والبنوك تشتريها من الحكومة مقابل الحصول على عائد، وطبعا مع رفع الفايدة العائد ده بيرتفع، فتزيد تكلفة الدين المحلي للبلد.
وعلى فكرة انت كمان ممكن تشتري أذون الخزانة بس لازم يكون معاك 25 ألف جنيه أقل حاجة، طيب هي الأفراد والحكومة بس اللي بيسلفوا من البنوك؟
الإجابة لأ، عندك الشركات والمصانع غالبا بتاخد قروض عشان تجيب خامات ومكن تطلع بيه انتاج تبيعه، وبعد تحصيل المبيعات بتسدد فلوس البنوك اللي هي القرض وفوايد وتاخد مكسبها وهكذا.
فلما تكلفة القروض تزيد معناها ايه؟ ببساطة صاحب المصنع مطالب بدفع فلوس اكتر للبنك، وبكده ياإما يقلل هامش الربح بتاعه، أو يرفع السعر على المستهلك، ومش بعيد يفكر في تقليل الإنتاج وبكده برضه يقل المعروض من السلع فى السوق ويزيد سعرها.
وخد بالك ده يخلي المستثمر اللي بيفكر يوسع شغله بيعيد حساباته، وده ممكن يقلل نسب الزيادة في فرص العمل.
وداه برضه رأي محمد المهندس رئيس غرفة الصناعات الهندسية باتحاد الصناعات واللي شايف إن قرار البنك المركزي برفع سعر الفائدة 3% هيكون ليه تأثير سلبي على الصناعة، والمصنعين هيجتمعوا عشان يدرسوا حجم التأثيرات دي خلال الأيام الجاية.
وعلى فكرة ان حجم الاستهلاك يقل ده من أهداف البنك المركزي لان ساعتها معدل التضخم هيقل، احترت صح؟
بص من الاخر قرار رفع الفايدة ليه ايجابيات وسلبيات والشطارة هنا ان الدولة تحسبها صح عشان الميزان يبقى مظبوط فتقلل الأسعار بس من غير مايحصل ركود، تفتكروا هننجح؟
