تشعر بالحيرة وسط قرارات البنوك ولا تعرف ماذا سيكون قرارهم خلال الأيام القادمة؟ خاصة أنه يوجد اجتماع طارئ خلال ساعات، وتشير التوقعات إلى أن الفائدة على شهادات الادخار قد تصل لـ 20% ويمكن اكثر من ذلك، لكن في أي حال ومهما كانت الزيادة فانت المستفيد في الأخر بأعلى عائد،
بعد مفاجأة البنك المركزي برفع سعر الفايدة 3% على الايداع والاقراض، البنوك هي كمان مش هتستنى كتير وهترفع الفايدة على شهادات اللادخار والقروض، وتقريبا كدا كل خدماتها.
وعشان كدا من بكرا لجان الأصول والخصوم هيعملوا اجتماعات طارئة عشان يحددوا فيها زيادة الفايدة على الشهادات اللي مدتها 3 سنين، وكمان على قروض الافراد اللي هي (القرض الشخصي، والسيارات والسلع المعمرة والتمويل العقاري خارج مبادرة المركزي).
وكمان هتحدد رفع سعر الفايدة على الودائع قصيرة الأجل، اللي مدتها بتبقى من يوم لسنة، وكمان على حسابات التوفير العادية والجارية.
لكن مصادر كتير بتقول ان البنوك هتطرح شهادات ادخار بأعلى فايدة في التاريخ، وممكن كمان عائد الشهادات يعدي الـ 20%، وده هيكون أول رد فعل منهم بعد قرار البنك المركزي.
لكن خبراء كتير بتقول ان الشهادات دي هتقعد مدة قليلة وبعد كدا هيوقفوا طرحها، زي ما عملوا في شهادات الـ 18%
ده رغم ان دلوقتي وقبل أي زيادات في حوالي 9 بنوك بيقدموا شهادات إدخار بأعلى عائد، وبيتنافسوا عشان يجذبوا العملاء
وأولهم المصرف المتحد، اللي بيقدم شها ة ثلاثية تتراوح دوريات صرف العائد عليها بين 16.25% سنويا لدورية صرف العائد الشهرية، و16.5% لدورية صرف العائد ربع السنوية، و17% لدورية صرف العائد السنوية، و18% سنويا مع الصرف في نهاية المدة.
كمان البنك الأهلي المصري، بيقدم الشهادة بلاتينية، ومدتها 3 سنين وعائد 17.25% وتقدر تصرفه سنويًا، وده نفس العائد ونفس المدة اللي بتقدمها شهادة القمة من بنك مصر، وشهادة “بريمو جولد” من بنك القاهرة
وبرضه بنك ناصر الاجتماعي، رفع الفايدة على الشهادة أجل 3 سنوات المخصصة لكبار السن من سن 60 عاما فأعلى، عشان توصل الى 17.5% سنويا بدلا من 15.25%، ويتم صرف العائد سنويا.
وكمان رفع سعر عائد الشهادة الادخارية أجل 3 سنوات ذات العائد السنوي المتاحة لكافة العملاء لتصل 17.25% بدلا من 15%.
والبنك التجاري الدولي CIB ، بيقدم 3 شهادات ادخار، تقدر تصرفهم شهريا، الاولى شهادة PRIME، ودي فايدتها 14%
وشهادة plus، فايدتها 14.5%، وكمان شهادة Premium، وفايدتها اعلى بتوصل لـ 15%
لكن البنك العربي الافريقي الدولي، بيتميز انه عنده تنوع في دورية الصرف، وكل دورية بفايدة مختلفة
يعني مثلا بيقدم شهادة “أميرالد” الثلاثية، لو صرفتها شهريا هتاخد فايدة 16%
ولو صرفتها ربع سنويا، هتبقى فايدتها 16.25% ، او 16.5% لو اتصرفت نصف سنوي، واخيرا 17.25 لو صرفتها كل سنة.
وده نفس تنوع الصرف اللي بيقدمه التعمير والإسكان، يعني بيقدم شهادة ادخار “رويال بلس” للمليونيرات ومدتها 3 سنين، بفايدة 17.25% لو العائد سنوي و 16.25% لو العائد شهري.
وبرضه بنك QNB، بيقدم شهادة ثلاثية فايدتها تتراوح بين 16% سنويا بدورية صرف شهرية للعائد، و16.25% بدورية صرف ربع سنوية، و17.25% بدورية صرف سنوية، ويبدأ شراؤها من 500 ألف جنيه كحد أدنى.
ولسه المفروض ان الزيادة هتبقى اكتر الأيام الجاية، وتقريبًا دي الزيادة الوحيدة اللي احنا بنحبها، وندفع أقل فلوس ونكسب أعلى عائد.
