هل يعقل أن يصل سعر كيلو الأرز إلى 33 جنيه؟ طيف ونحن نزرعه في مصر يعني لا نستورد؟ فما أسباب جنون أسعار الأرز الشعير؟ وما رد الحكومة على هذا الارتفاع
ارتفاع جنوني في أسعار الرز بعد زيادة حوالي 9 آلاف جنيه في سعر الطن الواحد من نهاية فبراير لغاية دلوقتي.عشان كده ولأول مرة في مصر: سعر طن الأرز الشعير بيوصل إلى 20 ألف جنيه، وسعر طن الأبيض عريض الحبة، وصل لمستوى 30 ألف جنيه!
مصطفى النجاري، رئيس لجنة الأرز بالمجلس التصديري للحاصلات الزراعية، اشتكى من نقص الكميات المعروضة في السوق لأنها أقل من حجم الطلب.
وعشان كده، اقترح على وزارة التموين استيراد كميات تصل 100 ألف طن من الأرز لتهدئة السوق، وفي نفس الوقت السماح للقطاع الخاص باستيراد كمية 70 ألف طن.
لكن ده محصلش والشركات استوردت كمية متعديش 30 ألف طن ، ووزارة التموين تعاقدت على استيراد 50 ألف طن بس، ودي كمية غير كافية لتهدئة السوق وضبط الأسعار.
وضيف على كده بدء موسم زراعة الرز، وده بيزود طلب المزارعين على التقاوي، اللى ارتفعت أسعارها برضه عشان يسجل سعر الطن الواحد 25 ألف جنيه للموسم الحالي مقابل 8 آلاف جنيه السنة اللي فاتت.
والمشكلة انه مع ارتفاع الأسعار، السلاسل التجارية وقفت استلام الرز، حسب مصطفي عبد الجواد عضو شعبة الرز.
وهتتصدم لما تعرف انه كان بيورد لسلاسل تجارية كبيرة زي ”مترو وخير زمان وكازيون والعثيم وبيم وكارفور”، بأسعار تترواح بين 27 و28 جنيه للكيلو، لكن دلوقتي السعر ارتفع إلى 32 للكيلو.
وفي تجار قالوا ان سعر الكيلو جملة 28 جنيه، ويتباع للمستهلك ب30 و32 و33 جنيه، وحتى لو فكرت تشتري رز مستورد عشان سعره أقل، برضه المشكلة موجودة، لأن الكميات اللي خلت السوق قليلة.
والصدمة الأكبر انه مع ارتفاع أسعار الرز المصري، التجار رفعوا سعر الرز المستورد من 22 جنيه إلى 26 جنيه.
بس على الناحية التانية، الحكومة من كام يوم نفت صحة اي كلام عن عجز الكميات المعروضة من الرز ، وبتطمن الناي ان المخزون الاستراتيجي من الأرز آمن ويكفي احتياجات المصريين 3.5 شهور قدام..
كمان وزارة التموين أكدت إن كل السلع الغذائية الأساسية ومن ضمنها الرز متوفرة في الأسواق، وكل يوم في كميات جديدة بتنزل المنافذ التموينية وفروع المجمعات الاستهلاكية وبقالي التموين وفروع مشروع جمعيتي.
وطبعا الرز موجود بأسعار مخفضة في معارض «أهلا رمضان» بسعر 14 جنيه للكيلو، والوزارة بتنزل حملات تفتيش يومية على منافذ صرف السلع والمحلات، عشان تتأكد من تواجدها وتمنع التلاعب في الأسعار أو احتكار التجار.
ودلوقتي بقى قوللنا ، إيه اخبار الرز في منطقتكم هل موجود بأسعار كويسة، ولا أسعاره زادت فعلا، ولو ده حصل الكيلو بكام دلوقتي؟
