إيه اللي بيحصل للدولار في مصر وإزاي بيتم تهريبه، وإيه حكاية العصابات المتخصصة في سرقة الدولار وتهريبة بره مصر؟
مفاجأت كشفتها مصلحة الجمارك، خليك معانا وانت تعرف إيه الحكاية:
الإدارة العامة للجمارك كشفت عن مفاجأة وهي عبارة عن مسلسل تهريب الدولار برة مصر عن طريق مجموعة عصابات
طيب إزاي الكلام ده بيحصل ؟
هقولك ياسيدي إدارة البحث الجنائي لمنفذ السلوم البري بالاشتراك مع الإدارة العامة لجمارك السلوم قدرت توقف محاولة لتهريب كمية كبيرة من النقد الأجنبي بقيمة مليون و308.5 ألف دولار.
واللي حصل حسب اللي نشرته مصلحة الجمارك في مذكرة ليها إن في أشخاص حاولوا تهريب كمية كبيرة من النقد الأجنبي خارج البلاد وده لأنهم استغلوا إن المنفذ في حالة تطوير ونطوا على السور المحاط بالمنفذ.
وعشان كده مصلحة الجمارك شكلت لجنة لضبط وجرد النقد الأجنبي وقدرت إنها تمسك العصابة دي واللي كانت مكونة من فردين ولاقوا معاهم مبلغ مليون و308 آلاف 535 دولار أمريكي بالمخالفة لقانون النقد المصري.
وده اللي خلى خالد الشبريسي مدير عام جمرك السلوم ياخد معاهم كل الإجراءات القانونية، وحرر ضدهم محضر ضبط جمركي، وتمت إحالة المتهمين إلي النيابة العامة وإرسال الحرز إلى النيابة العامة.
ولو انت مستغرب الواقعة دي فـ للأسف دي مش أول واقعة تحصل وده لأن النيابة العامة في تحقيقاتها كشفت عن قيام شخص سوري الجنسية بالاتفاق مع مجموعة من الأشخاص بالإتجار في النقد الأجنبي خارج السوق المصرفي.
وحسب موقع مصر 365، فـ تحقيقات النيابة أكدت إن المتهم الرئيسي صاحب مصنع ملابس ومخلي المصنع ده زي ستار يداري على شغله في الاتجار في العملة الصعبة بمساعدة ناس خارج مصر وطبعا هدفهم التربح وجني الأموال.
لكن اعترف في التحقيقات وقال إنه بمشاركة مجموعة من الأشخاص اللي مقيمين في الكويت قدروا يقنعوا مصريين كتير من العاملين بدولة الكويت إنهم ميحولوش فلوسهم عن طريق السوق الرسمية ويتم التحويل بعيد عن الدولة.
وده عشان الفلوس دي تروح لصالح تجار ومستوردين في مصر عن طريق طرف تالت في لبنان وطبعا التحويلات دي كانت بتم بشكل غير قانون أو شرعي
وكانوا بيستخدموا أشخاص عشان يكلفوهم باستلام الأموال بالجنيه المصري من التجار والمستوردين اللي عايزين يحولوا أموالهم للخارج “وكانوا بيعملوا ليهم مقاصة” وده معناه إنهم بيحسبوا الدولار على سعره في السوق السوداء و يبعتوا الفلوس لحسابات الشركة التانيه في لبنان
والمتهم الأول في القضية دي اعترف إنه قدر يجمع من العمليات دي مبلغ قدره 2 مليون و650 ألف جنيه مصري.لكن بعد التحقيقات المكثفة قدرت الإدارة العامة لمكافحة جرائم الأموال العامة إنها تقتحم مصنع المتهم وقدرت تلاقي حقيبة بداخلها 21 ألف جنيه مصر، و7830 دولار أمريكي، غير كمان 18 ألف ريال سعودي، و3450 ليرة تركي.
ونجحت الأجهزة الأمنية في القبض على 5 متهمين في القضية وأمرت بضبط وإحضار 7 آخرين بينهم سعودي.
قولنا رأيك في اللي بيحصل من العصابات دي وهل شايف إن هم السبب في أزمة الدولار ؟
