لو عندك حوار وتريد ان يساعدك أحد فعليك بالذهاب إلى “للوشا”، لوشا هو من الشباب المشهورين جداً على تيك توك، يعرف نفسه دايما أنه يفهم في الأصول وكل البلطجية تخاف منه وتعمل له ألف حساب، ولا احد يحل في الخناقات غيره، وناس تانية شايفة أن اللي بيعمله بطلجة وترويج للعنف.. لغاية لما تم القبض على لوشا فجأة بدون أي مقدمات.
بس يا ترى ليه الشرطة قبضت على لوشا؟.. وايه علاقته بالفنانين الكبار؟ وإزاي بيكسب ملايين؟.. كل ده واكتر هنعرفه مع بعض فى الفيديو ده.
المشهورين على السوشيال كتير، بس كل واحد فيهم عنده حكاية، وحكايتنا النهاردة عن “لوشا” وهو واحد من الشباب اللى ظهر فجأة على تيك توك وعمل فيديوهات كتير جابت ملايين المشاهدات فى وقت قصير جدا.
الشهرة دى قربته من نجوم الفن والتمثيل لدرجه أنه بقى يقوم بدور الكومبارس فى الأفلام والمسلسلات وكمان ظهر مع النجم أحمد العوضي، بس ياتري ايه علاقه كل ده بخبر القبض عليه من شويه.
من شويه تم الإعلان عن القبض على البلوجر الشهير “لوشا” صاحب مقولة “الثبات على المبدأ” واللى كان عامل فيها فتوة الشوارع وكل يوم والتانى ينزل فيديو على فيس بوك وتيك توك ولامم الشباب الصغيرين حواليه ، وعامل كأنه بيحل موضوع أو زي ما معروف كده بلغة الشارع “بيحل حكاية” وده طبعا كان خلى الشباب اللى لسه صغير حواليه، عاملين منه بطل رغم أن طريقة كلامه ولغته كلها تدل على البلطجة.
الحقيقة أن “لوشا” طلع حكايته حكاية وموضوع كبير قوى، وده كله عرفناه لما الشرطة قبضت عليه، سجله طلع فيه مواضيع كبيرة قوى توديه وراء الشمس، لوشا طلع أنه عليه حكم غيابى بـ 10 سنين حبس، وكان مدارى نفسه من أجهزة الأمن ومش بيحاول يشتغل فى أى مكان بيطلب فيش وتشبيه، وده خلاه يتجه أنه يعمل فيديوهات على تيك توك وفيس بوك يجيب منها فلوس، وبالفعل الفيديوهات بتاعته كانت بتجيب مشاهدات كتير وفلوس أكتر، ممكن توصل للملايين.
بس فى غمضة عين كل حاجه عملها هتروح منه، الفيديوهات والفلوس، بعد الحقيقه ما بانت وكل حاجة انكشفت لما أجهزة الشرطة كانت نازلة بحملة فى المنطقة اللى ساكن فيها لوشى بحى الهرم، وبالصدفة واحد من الضباط أخد بطاقته وبحث عنه، هنا ظهرت المفاجأة وطلعت أن “لوشا” أسمه الحقيقى محمد عبد الحميد، وعنده 36 سنة، وعواطلى مش شغال، والأكبر من كده أنه هربان من حكم غيابى بـ 10 سنين حبس، والكارثة الكبيرة أن الحكم ده بسبب إنه البلطجة برضو والعنف الاب عمله في أحد اللأشخاص يعد ما حبسه وبهدله قبل كده، وعشان كده طلع عليه الحكم ده.
بعد ما الحملة اللى عملتها الشرطة اتأكدت أن “لوشا” هربان من الحكم اللى عليه، وتم ترحيله إلى قسم الهرم علشان يتم تنفيذ الحكم عليه، ماهو أصل الحكم طالع من منطقة الهرم.
اللافت بقى واللى مخلى الكل يتكلم على “لوشا” هو الفيديوهات اللى كان بيعملها على فيس بوك وتيك توك، وصوره مع النجوم الكبار لدرجة أنه بقى مصاحب فنانين كتير وعلاقته بيهم كويسة وكمان شهرته خلته بكسب فلوس كتير وحسب ما بعض الناس بتقول بيكسب ملايين من فيديوهاته وكمان الدعاية اللي بيعملها للمحلات
وبالفعب العز باين عليه، ولو شفته في فيديوهاته الأخيرة هتلاقوه بيظهر بعربية غالية وسلاسل ذهب كتير، وده اللي خلى بعض الناس بتقول إنه بيكسب في الشهر الواحد من ٥٠٠ ألف لغاية مليون جنيه.
السؤال هنا دلوقتى ياترى فيه كام واحد زى “لوشا” بيعمل فيديوهات على تيك توك خلاته مشهور ومعاه فلوس، مع أنه فى الأصل ممكن يكون هربان من جريمة، زى مابتقول الشرطة، ويمكن نكون احنا كمان مخدوعين فيه.
الكل يكتب رأيه فى التعليقات ويقول أحنا فعلا ممكن نكون مخدوعين فى الناس اللى بتعمل فيديوهات على فيس بوك، ولا إيه الحكاية؟
