فيه أم في الشرقية خلصت على أبنها الصغير اللى عنده 5 سنين وأخدت راسه طبختها وأكلتها، ومش راسه بس ده جسمه كله خرطته أجزاء ووضعته في الثلاجة.
ليه عملت الأم كده ؟ .. وفين الأب والناس من اللى عملته ده ؟ .. كل ده وأكتر هنعرفه مع بعض في الفيديو ده.
في البداية كده لازم الكل يجمد قلبه وهو بيسمع معانا تفاصيل الواقعه دى، لأن اللى حصل مرعب جدا ويخوف، بس لازم تعرفوه ونتناقش مع بعض في تفاصيله لأنه مهم ومحتاج تفسير ليه.
فيه ست من الشرقية فوجئ الأهالى امبارح أنه خلصت على أبنها الصغير اللى عنده 5 سنين، وفصلت راسه عن جسمه وطبختها وأكلتها وكل ده وهى مبسوطة ومافيش في تفكيرها أي حاجة، دى كمان خرطت باقى جسده حتت وموزعاه في أكياس زى اللى بتجهزها للأكل خلال الأيام اللى جاية.
الواقعة حصلت بالظبط في قرية “أبو شلبى” فى فاقوس بالشرقية، الزوجة وعلى حسب كلام الأهالى هناك جوزها مطلقها من 3 سنين ماكنش مرتاح معاها وبينهم مشاكل ومافيش تفاههم فاطلقها، ومن يومها وأبنها الصغير ده كان معاها، بتربية هي وتعمله أكل وشربه لحد ما حصل اللى حصل، وخلصت هي عليه وأكلته، الموضوع مش جوع ولا حاجة عشان دماغكم ماتاخدكمش لبعيد، ده القصة فيها تفاصيل مرعبة لسه هنكملها مع بعض.
وفقا لموقع العربية اللى نقل عن الست اعترافها، الست قالت في النيابة أنها بالفعل عملت كده في ابنها، خرطته حتت وبدأت تاكل منه، وأول ما أكلت أو كانت بتحاول تاكل كان راسه، بس الناس لحقوها وعرفوا باللى حصل.
على حسب تحقيقات النيابة مع الست فا تقريبا هي عندها صرع، تعبانة من فترة كبيرة وكانت على حد كلامها خايفه على ابنها الصغير ده وكانت عايزه ترجعه لبطنها تانى من اول وجديد، كأنها حامل فيه يعنى، فا فكرت أو الصرع خلاها تفكر أنها تخرطه لحتت صغيرة وتبدأ تاكل منه حته حته، وفى خيالها يعنى أنها لما تاكل منه الواد هيرجع لبطنها تانى وهيعيش في بطنها من أول وجديد، وياحول لله ما فقتش أو ماوعيتش للى هي بتعمله ده غير لما الناس في منطقتها عرفوا بيها ودخلوا عليها البيت شافوا راس الواد وهي في الحلة بتتجهز للأكل.
المهم في الموضوع ده واللى عشانه عملنا الفيديو ده، أن حابين ننبهكم ونوعيكم لو حد عند أي مرض نفسى أو حاجة شبيه للست دى ياريت يروح بسرعه يتعالج أو أهله ياخدوا بالهم منه ومن تصرفاته تجنبا لأن حاجة زى كده تحصل معاه، المرض النفسى والصرع خطير جدا ولازم يتعالج، ويتعالج في البدرى في أول ظهوره محدش يستنى عليه.
وبنوصيكم قبل نختم الفيديو ان الكل يشير الفيديو ده وننقله لبعض على الفيس بوك ويوتيوب عشان الكل يعرف اللى حصل ويعرف المرض ممكن يعمل أيه، ونتجنب أن حاجة زى كده تحصل في المستقبل، وفى النهاية الله يرحم الواد برحمته الواسعة ويشفى أمه ان كانت مريضة ويصبرها على اللى عملته ده.. ادعوا للواد بالرحمة ياجماعه.
