مر عليه 500 عربية على الطريق ولم يقف أحد من أجل أن ينقذه أو يساعده بأي طريقة.. عربية نقل خبطته والسواق بتاعها هرب.. ده جزء صغير من التفاصيل اللي كشف عنها تامر يحيى مدير أعمال تامر حسني بعد ما حصلت ليه حادثة كبيرة جداً على طريق العلمين ومحدش عارف كان ممكن ينتهي على إيه.
يا ترى مدير أعمال تامر حسني عدى من الحادث ده إزاي وبيكمل حياته دلوقتي بأعجوبة؟ وإيه هي تفاصيل الحادث اللي حصل على طريق العلمين؟.. إزاي عربية نقل خبطت تامر يحيى وهربت السواق نفسه موقفش؟ ليه محدش وقف ينقذه وتامر حسني عمل إيه لما عرف؟.. خليكوا معايا في الفيديو ده هقولكم تفاصيل اللي حصل.
الساحل خلص والشغل فيه تقريباً شبه انتهى وده علشان كل واحد هيشوف حياته بقى بعد إجازة الصيف دي أصل المدارس راجعة خلاص.. وتامر يحيى كان واحد من اللي شغلهم في الساحل خلص وهيرجع يكمل حياته في الشغل الطبيعي زي كل سنة.. بس وهو راجع عمل حادث كبيرة جداً والعناية الإلهية هي اللي أنقذته فعلاً عشان مكانش هيبقى بين الأحياء بسبب صعوبة اللي حصل.
عربية نقل السبب
تامر يحيى كان راكب عربية رانج روفر ودي معروفة بقوتها.. بس قابله سواق راكب عربية نقل ومكانش واخد باله من الطريق أصله كان قبل الحادثة دي بيعدل في الكاسيت شكله كان عاوز يسمع أغنية ولا حاجة بس هي دقايق وكان خابط عربية تامر يحيى وبوظها خالص ولا عارفة تتحرك ولا غيره وشكله هيبيعها خردة زي ما بيقول.. المشكلة بقى إن السواق هرب ولا يعرف حصل ليهم إيه.
صعوبة في الخروج
تامر يحيى ومعاه محمد السواق قابلوا صعوبة كبيرة جداً في الخروج من العربية وقعدوا ربع ساعة يحاولوا يخرجوا مش عارفين أصل كان في مشكلة في العربية ومعرفش يفتح الشنطة وبيقول لو المشكلة دي عيب تصنيع مش هيسكت وهيحبس اللي صممها كده.. بعد الوقت ده كله خرج تامر والسواق وكان عمر عليهم 500 عربية مفيش حد فكر يقف يشوف إيه المشكلة ولا اللي عملوا الحادثة دول عايشين ولا إيه اللي جرالهم.. وده اللي خلى تامر مستغرب وهو بيحكي زي ما كان مستغرب إن مفيش إسعاف وصلت ليهم ولا أي حد تواصل معاهم.
الصحاب موجودين
وعشان دايما الصحاب الحقيقيين بيظهروا في أوقات الشدة اللي زي دي كده في صحاب حلوين اتصل بيهم تامر يحيى وقدروا يوصلوا ليه ويروح مستشفى في وادي النطرون ومنها على الشيخ زايد لحد ما وصل مستشفى الرفيدة وفيها عمل كل الفحوصات الطبية وأنقذوه وطلع عنده مشكلة في مناخيره واتخطيت وكمان الفم واتخيط والسواق عنده كدمات في جسمه عشان حزام الأمان كان عامل مهم في إنقاذه.. وفي كلام إن تامر يحيى هيعمل عملية في مناخيره بعد كام يوم.
موقف تامر حسني
تامر حسني وأخوه حسام حسني كانوا من ضمن الصحاب اللي اتعاملوا في الحادث ده وتامر يحيى قال عليهم دول اخواتي وشكرهم على وقفتهم معاه وطبعاً تامر حسني معروف بإنسانيته في المواقف اللي زي دي ومش محتاج حد يوصيه واتعامل بكل اللي يقدر عليه عشان مدير أعماله يكون في أحسن حال.. كمان تامر يحيى قال إنه قفل تليفونه ولغى أي شغل أو سفر أو حجوزات وفنادق وعلى الأقل هيقعد في راحة 10 أيام لحد ما يشوف إيه الجديد.
