ماذا حدث في الدنيا ؟ واقعة يهتز لها عرش الرحمن بـ28 طلقة أب ينهى حياة أولاده وزوجته وأهلها ؟وفى أيام مفترجة.ماذا حدث ليقوم هذا الأب بفعلته هذا؟والغريب إعترافاته فى التحقيقات كيف انهى حياة 7 أشخاص بهذه الطريقة البشعة.
هان عليك ولادك وإنت بتشوفهم قدام عينك مفارقين الحياة؟هانت عليك العشرة مع مراتك وأهلها؟الحقيقة اللى يعمل كده تهون عليه أى حاجة مش العشرة!
واقعة من أصعب الوقائع اللى ممكن نكون شوفناها الفترة الأخيرة وفى الإسكندرية ..ولو دورنا على السبب مفيش..مفيش سبب للخلاف ..يخلى شخص يتجرد من كل مشاعر الإنسانية والأبوة بالشكل ده ..
ياترى حصل إيه بالظبط ؟والمتهم قال إيه فى كواليس الواقعة ..إيه اللى دار بين الزوج والزوجة وبعدها حصل اللى حصل؟ مفاجأت خطيرة كشفتها التحقيقات عن المتهم ..اللى هيتقال صدمة “معقول”!
قبل إذان المغرب بمفيش ..وفى يوم مفترج ليلة النصف من شعبان ..فى الإسكندرية ب شارع الكرامة متفرع من شارع الترعة المردومة بمنطقة أبو سليمان.
اختار المتهم يكون المعاد والمكان اللى يخلص على ولاده فيه..لا عمل حساب ربنا ولا الوقت ولا العشرة ولا حتى الأبوة .. أختار تكون نهايتهم على إيده، وهم صايمين يقابلوا وجه كريم! ..وهيعيش هو كمان يعمل إيه ..أختار يكون مصيره زيهم وينهى حياته و لكن .المتهم عنده 40 سنة ..وبيقول بعد ما عمل اللى عمله ده هرب ،عمل عمله ده وفص ملح وداب ،ومن مسرح الجريمة طلع على صيدلية علشان بشترى مشرط وينهى حياته هو كمان ..لكنه فشل فى كده وكل اللى حصله جرح بسيط فى معصم إيده ..
المتهم حاول تانى يفارق الحياة بأى طريقة ..وراح عند شريط السكة الحديد ورمى نفسه قدام القطر وبردوا فشل وقال فى التحقيقات إن القطر مجاش.سبحان الله ربك مش رايدله الراحة ..مكتوبله يعيش طول عمره متعذب بالذنب الكبير الللى عمله فى أهله ..أصل مفارقته للحياة راحة ..
طيب ياترى إيه تفاصيل الواقعة ؟وقال إيه عنها؟وإزاى قدر يعمل كده فيهم؟
الحقيقة إن التحقيقات الأولية وإعترافات المتهم اللى قالها ..بينت إن حصل خلاف بين الزوج والزوجة ، سابتله البيت وخدت ولادها وراحت على بين والدها بقالها 15 يوم ،وطلبت منه الإنفصال وقالتله مش قادرة تستحمل أكتر من كده ،وزى ما دخلوا بالمعروف يخرجوا بالمعروف وكل واحد يشوف حياته بعيد عن التانى ..
المتهم بيقول إنه بلغ حماه إنه هيجى على المغرب كده ومعاه المأذون،ويخلص الموضوع ،ولما وصل البيت كل اللى موجودين حاولوا يقربوا وجهات النظر ويصلحوا بينهم وعلشان خاطر العيال والكلام ده ..لكن الزوجة كان راسها وألف سيف تنفصل عنه..
المتهم قال حاولت أقنعها بالعودة وعدم الطلاق ولكنها رفضت فقررت الانتقام منها ومن أسرتها وأنهيت حياتهم
هنا المتهم طلب يدخل الحمام ..وبمجرد خروجه طلع من جيبه أداة الواقعة ،وأطلق خراطيش على كل الموجودين ،الأب والأم والزوجة ..
مكتفاش بكده دخل على أولاده ال أربعة أوضة النوم وخلص عليهم بنفس الطريقة ..ب28 طلقة
كلهم فارقوا الحياة فى لحظتها ما عدا الأبن الصغير ..مثل إنه فارق الحياة ولكن كانت فيه الروح ،وبعد كده فارق الحياة هو كمان ..هو اللى بلغ خالته ..
اخت الزوجة المجنى عليها قالت إن الجيران لما سمعوا صوت الطلقات كانوا فاكرينها ألعاب نارية فى فرح ولا مناسبة ،وإنها عرفت بالواقعة لما راحت بيت والدها وفتحت باب الشقة لافت برك دم وكل أفراد أسرتها جثامين ..
الشقة أتملت بينهم فى الصالة والمطبخ وأوضة النوم..ومن كتر العشوائية اللى كان فيها المتهم الطلق وصل لحيطان الشقة والعفش إتخرم ..تخيل أجسامهم حصلها إيه؟
المفروض إن الأب هو اللى يدافع عن أهل البيت ..ويحميهم مش يكون هو الجانى ومرتكب الواقعة!سبحان الله أولاده اللى إتخلص منهم بالطريقة دى ..ألف واحد يتمنى ضفر عيل منهم ..مراته اللى إتسبب فيها رحيلها أكيد إستحملته كتير والإنفصال مش هيجى من الباب للطاق كده!
وفوق ده كله ياريت ميتقالش مريض نفسي ومكانش فى وعيه وميعرفش عمل كده إزاى ..علشان هو الوحيد اللى عارف عمل كده إزاى! ..وتكون عقوبته عشماوى بدون تهاون ..والجماهير بتقول تعبنا من التعليق على شماعة المرض النفسى خلاص!ربنا يرحمهم وقريب حقهم يرجع .
