أزمة جديدة تواجه المستشار مرتضى منصور، رئيس نادى الزمالك، بعد ما أصبح القانون ينصر اتحاد الكرة في أزمة قيد اللاعبين.
بس هو إيه اللي حصل؟ وإزاي هيواجه اتحاد الكرة في إزمة اللاعبين؟ وهل هيقدروا يعزلوه؟ وليه قال مش هيدخل النادي تاني؟.. تفاصيل كتيرة نكشفها في التقرير التالي:
الساعات اللى فاتت كانت مشحونة جدا بأحداث تخص المستشار مرتضى منصور، رئيس نادي الزمالك، ممكن تأثر جدا على مسيرته داخل النادى وتأثر على النادي نفسه ونشاطه الكروي.
كل ده كان خلال جلسة لمرتضى منصور أمام القضاء الإداري بمجلس الدولة، عشان ينظروا في دعوى رفعها المستشار بإلزام إتحاد الكرة المصرى بقيد ٣ لاعبين تعاقد معهم نادى الزمالك ووقتها كان الاتحاد رفض إتمام تعاقد اللاعبين دول مع الزمالك لخلافات مالية وإدارية في النادى، وأن النادي عليه مديونية ٧٠ مليون جنيه ولازم يدفعهم ومن وقتها المستشار مرتضى منصور كان على آخره وبيحاول بكل الطرق انه يتمم التعاقدات دى.
والنهارده طلع رد مجلس الدولة بتأجيل الدعوى المقامة من مرتضى منصور، رئيس نادي الزمالك، و تقرر نظرها يوم ١٩ فبراير اللي جاي وسط كلام كتير عن أنها هتعرفي بسبب عدم الاختصاص ولازم يروح للمحكمة الرياضية وده اللي تبع الفيفا والقانون وقتها هيكون ضده وبكده يكون اتحاد الكرة المصري انتصر على مرتضى منصور مرة تانية، مرة بعد مارفض يستكمل إجراءات قيد اللاعبين، ومره تانيه لما القانون بقو ضده وحتى لو القرار كان مجرد تأجيل فا ده بردوا يعتبر هزيمة للمستشار مرتضى منصور اللي معروف أنه بيحب يحسم أموره على طول.
الاكتر من كده ان المستشار مرتضى منصور طلع ووعد جماهير النادى انه مش هيدخل النادى الفتره دى خالص غير لما يتمم إجراءات اللاعبين، فهل يا ترى بعد قرار المحكمة تأجيل الدعوى فى طلبه إتمام الإجراءات هوا كده مش هيدخل النادي ولا لا؟
طيب لا قدر الله لو المحكمة محكمتش لصالح مرتضى منصور وأن اللاعبين بتوعه مش هيتسجلوا في النادي وتخلص أوراقهم من اتحاد الكرة، مرتضى منصور هيعمل إيه، انتم واخدين بالكم طبعاً ان قلنا من شوية أنه قال بنفسه مش داخل النادى غير وأنا مخلص موضوع اللاعبين دول، فالنتيجة هنا أن المستشار مرجح ليه انه يسيب نادى الزمالك للأبد.
مش بس كده لكن في نفس الوقت خرجت أخبار أن اتحاد الكرة بيخطط كمان لعزله بشكل رسمي مر رئاسة النادي وده هيكون بالتعاون مع اللجنة الأوليمبية اللي ليها الحق في عزله في ظل أنهم هياخدوا حكم بالمديونية وأثبتوا أن فيه مخالفات مالية لأنه مش بيحط الفلوس في حسابات البنوك عشان يتصرف فيها براحته وبالتالي دي مخالفة مالية ممكن تعزله.
ده ياخدنا لنقطة تانية، لما المستشار يمشي مين اللى هيمسك مكانه النادى ويتولى الإدارة، هنا طلع أحمد سليمان، عضو مجلس إدارة نادى الزمالك الأسبق، وقال فى تصريحات صحفية: ياجماعه نادي الزمالك نادى كبير وعظيم وواجب أن وزارة الشباب والرياضة هى اللى تدخل وتعزل مرتضى منصور نهائيا من رئاسة نادى الزمالك، وبعدها على طول تعمل دعوى لإجراء انتخابات من غير مرتضى مايترشح فيها، ووقتها بقى أعضاء النادى هما اللى يختاروا ممثلهم، واللى حابب يترشح يترشح بقى، وممكن احمد سليمان يترشح .
لحد هنا نكون وصلنا لنهاية الفيديو، بس حابين قبل مانختم نوجه ليكم سؤال بما أن انتم بقيتوا خلاص ملمين بالأحداث اللى بتتم فى نادى الزمالك، هل ياترى المستشار فعلا هايمشي ولا كل ده كلام مش هيتم تنفيذه ؟؟ .
اكتبوا رأيكم في التعليقات.
