قرار قضائي عاجل بعزل مرتضى منصور من رئاسة الزمالك

المستشار نهايته قربت مع نادى الزمالك، أو نقول في نهايتها إذا حدث ما  بتوصى به 4 تقارير صادرة عن هيئة قضايا الدولة، والتى كلها عكس مرتضى منصور.

إيه اللى بتقوله تقارير الدولة ضد مرتضى منصور ؟ .. وإيه رد مرتضى منصور أصلا عليها ؟ .. كل ده وأكتر هنعرفه مع بعض في التقرير التالي:

النص: شكل كده والله أعلم نهاية المستشار مرتضى منصور مع نادى الزمالك قربت خلاص، بعد الأربع تقارير اللى صدروا من شويه من هيئة قضايا الدولة كلهم بيوصوا بعزل مرتضى منصور من نادى الزمالك، لا وأيه، وإلزام مجلس النادى بدعوة الجمعية العمومية لانتخاب رئيس جديد.

إيه بالظبط اللى حصل لده كله .. والتقارير نفسها فيها إيه ؟

على حسب المواقع الإخبارية الموثوقة، فا التقارير دى كلها طلعت بسبب شهر الحبس اللى المستشار مرتضى منصور قضاه في الحبس، واللى لسه خارج منه من كام يوم كده.

أما بالنسبة للتقارير فيها إيه بالظبط، فا أولا فيها توصية بوقف تنفيذ القرار السلبى بامتناع وزارة الشباب والرياضة عن إصدار قرارها بزوال عضوية مرتضى منصور، كرئيس لمجلس إدارة نادي الزمالك، وكمان استبعاده من مجلس الإدارة مع ما يترتب على ذلك من آثار، الأثار هنا يعنى أن المستشار مالهوش حق ولا إى سلطه أنه يطلع ولا يصدر قرار من يمه يخص نادى الزمالك.

أما التوصية التانيه في تقرير هيئة مفوضى الدولة، أنه يتم التنبيه على مجلس إدارة نادى الزمالك بتوجيه دعوة لعقد جمعية عمومية للنادي في أقرب وقت، لإجراء انتخابات تكميلية على مقعد رئيس مجلس الإدارة، اللى هوا مكان مرتضى منصور يعنى، وده لاستكمال مدته عن الدورة الانتخابية 2025- 2021، وده لحين الفصل في موضوع الدعوى المرفوعة ضد مرتضى منصور.

الأخطر من كده في التقرير أنه أكد أن الأحكام الجنائية النهائية التي صدرت ضد مرتضي منصور، أفقدته أحد شروط عضوية مجلس إدارة النادي وأهمها، وواجب على الفور سقوط العضويه عنه، ومعنى كده أن المستشار بكل الطرق القضاء بيقول أنه لازم يسيب رئاسة نادى الزمالك، فهل ياترى المستشار هيعمل كده ولا لا ؟

الحقيقة ولحد الان مش باين أي شواهد أن المستشار هيعمل كده خالص، خصوصا وأنه كان رده على كل الكلام ده، أن فيه بيان طلع على الموقع الرسمي لنادى الزمالك قال أن المستشار مرتضى منصور هيتواجد داخل نادى الزمالك الساعة 9 بليل، يعنى وقت عرض الفيديو ده تقريبا، وأكد بيان الزمالك أن المستشار مرتضى منصور رايح النادى بصفته رئيسة وهيقوم بجولة بين أعضاء النادى وهيمارس عمله عادى جدا زى ما كان بيعمل قبل كده، قبل ما يدخل الحبس.

ده كمان هيعملوا مؤتمر صحفى الساعة 10 داخل نادى الزمالك، وشكل كده المستشار مرتضى منصور هايبدع فيه ويقول كل اللى نفسه فيه ويوضح وجه نظره إيه في اللى بيحصل مع الزمالك، أنتم تتوقعوا هيقول إيه ؟ .. اكتبوا في التعليقات .