أسئلة كثيرة تدور في عقل كل زملكاوى الآن، من سيدير نادي الزمالك بعد كلام مرتضى منصور أن كل مجلس إدارة النادى سيرحل معه إن رحل هو، وكلهم على حسب كلامه متفقين على ذلك، المستشار أتفق معاهم واحد واحد على الكلام.
الإجابة على السؤال ده هنعرفه مع بعض فى الفيديو، وزيادة عليه هنعرف مرتضى منصور هيعمل إيه مع الخطيب الفترة اللى جايه .
اللى مش متابع فيكم فا كان فيه مؤتمر لنادى الزمالك يوم الخميس اللى فات، في المؤتمر ده كشف المستشار مرتضى منصور أن نادى الزمالك فيه أزمة والأزمة دى أكبر من أي أزمة عدت قبل كده على نادى الزمالك طوال فترة تاريخه.
المستشار قال أن بعد كلام وزارة الشباب والرياضة أنه لازم يمشى ويسب النادى لحد تانى يديره ويكون رئيسه، فا هو بقى ولأجل اللى عملته فيه وزارة الشباب قرر أنه يتفق مع كل أعضاء مجلس إدارة النادى أنهم يمشوا معاه ومايبقاش فيهم ولا واحد يمسك مكانه ولا حد فيهم يمضى على ورقة أو ياخد أي قرار في النادي، وده طبعا ماينفعش لأن كده الحال هيقف فى نادى الزمالك أكتر ماهوا واقف، ولو كان مرتضى مشى لوحده على حسب تصور وزارة الشباب والرياضة فا كان أي حد من مجلس إدارة النادى اللى كان هيمسك مكانه، بس بعد كلامه ده فا الأمور هتختلف شويه.
عشان نعرف مين اللى هيدير نادى الزمالك الفترة اللى جايه لو مرتضى وكل فريقة من أعضاء مجلس الإدارة مشى، يبقى لازم نرجع للائحة الاسترشادية التي تحكم الزمالك وتعد جزء لا يتجزأ من قانون الرياضة رقم 71 لسنة 2017 واللى فيها تم تحدد من يقود نادى الزمالك.
على حسب قانون الرياضة واللى نشر جزء منه موقع “يلا كورة” الأخبارى، فا المفترض فيه لجنة هتتكون اللجنة دى هى هتدير نادى الزمالك لحد مايحصل أنتخابات ويجي للنادى رئيس جديد، أول الكلام لازم اللجنة تتكون من المدير التنفيذي والمدير المالي ومدير النشاط الرياضى أو من يقوم بعملهم في النادى، وكل دول يمسكوا شئون النادي وهما بنفسهم يدعوا لانتخاب مجلس جديد في أول اجتماع جمعية عمومية عادية.
لما جينا نشوف مين الناس اللى ماسكه المناصب دى فى نادى الزمالك ويمكن هما اللى يكونوا في اللجنة، ظهر اسم الأستاذ إيهاب السيد خضر، وده ماسك منصب القائم بأعمال المدير التنفيذي و طارق أباظة ماسك منصب مدير النشاط الرياضي .
وبكده يبقى عرفنا مين المرشحين أنهم يمسكوا إدارة نادى الزمالك خلال الفترة اللى جايه، الفترة دى مؤقته ياجماعه، لازم تاخدوا بالكم أنها مؤقته مش دايمه، والأشخاص دول مهمتهم الأساسية انهم يدعو لإجراء انتخابات لاختيار مجلس جديد لنادى الزمالك.
الفكرة بقى أن هل الأشخاص دول هيرضوا أنهم يمسكوا مكان المستشار مرتضى منصور والمجلس بتاعه ولا هيخافوا منه، أنتم عارفين طبعا المستشار عامل ايه في النادي، ممشيهم على العجين ما يلخبطوش، فا هل حد فيهم عنده الجراءة الكافية أنه يمسك مكانه، ده سوال عايزنكم تجاوبوا عنه في التعليقات، ومن رأيكم بردوا مين اللى ممكن يمسك نادى الزمالك الفترة اللى جايه بعد ما كل الأزمات بتاعت النادى دى تعدى على خير باذن الله
دلوقتى نكون وضحنا ليكم ايه اللى المفروض يحصل الفترة اللى جايه داخل نادى الزمالك، وبكده يبقى جه الدور أننا نقولكم المستشار مرتضى منصور هيعمل أيه مع كابتن محمود الخطيب، والحقيقة أن الأتنين فيه مابينهم قضايا كتير جدا داخل المحاكم، كل واحد مجهز للتانى كام قضية كده شغالين فيها والله يستر عليهم، اللى القضاء هيحكم لصالحه فيهم هيبقى هو اللى فاز.
