تعرف ان لك 1050 جنيه عند الحكومة من حقك تأخذهم كل شهر؟ هذا الكلام حقيقي والقرار من الحكومه نفسها لكن لكي تستفيد منه يوجد بعض الشروط والأوراق التي يجب تقديمها، تابعونا من خلال التقرير التالي لمعرفة التفاصيل:
الحكومه مؤخرا بتنزل مساعدات للفئات الاجتماعيه الاكثر احتياجا زي مثلا معاش تكافل وكرامه، أو زياده استثنائيه على بطاقات التموين لبعض الأسر.
والجديد بقى ان وزارة التضامن الاجتماعي اعلنت عن صرف معاش للطفل بدايه من يناير 2023, وقيمة المعاش ده 350 جنيه بحد اقصى 3 اطفال للاسره الواحدة.
يعني بنتكلم في 1050 جنيه بالظبط كل شهر لو توفرت فيك مجموعه الشروط اللي هنقولها دلوقتي:
الاطفال لازم يكون سنهم اقل من 18 سنه،
كمام لازم تكون حالة الأسر أو الأفراد المتقدمة للاستفادة من معاش الطفل تحت خط الفقر.
وملهاش اي دخل شهري ثابت أو بتقبض معاش تأميني أو مساعدة ضمان اجتماعي شهرية.
وطبعا الايتام من من اول الناس اللي من حقها تاخذ معاش الطفل، ومعاهم كمان اطفال المطلقه حتى لو اتجوزت من حد تاني او اتسجنت او رحلت عن الحياة.
كمان معاش الطفل من حق اطفال اللي ابوهم مسجون ولمدة ما تقلش عن 3 سنوات.
ومش بس كده، وزارة التضامن قررت تصرف منحة دراسية لكل طفل بياخد معاش، والمنحة دي قيمتها 200 جنيه لكل طفل شهريا ولمده 8 شهور بدايه من اكتوبر لغايه مايو في كل عام دراسي.
وده بشرط واحد ، أن الاطفال يكونوا متسجلين المدارس بدايه من التعليم الاساسي ولغايه التعليم المتوسط ويكونوا ملتزمين بالحضور.
وعلى الراغبين في الحصول على معاش الطفل التوجه إلى أقرب وحدة شئون اجتماعية، والتابع لها محل إقامة الأطفال، وتقديم النموذج الخاص بطلب الحصول على المعاش وتسجيل البيانات المطلوبة زي اسم مقدم الطلب وسنه ورقمه القومي.
وطبعا اسم الطفل المستفيد من المعاش وسنه وتاريخ ميلاده والحالة الاجتماعية والتعليمية.
وكمان عدد أفراد الأسرة وعدد الأبناء في التعليم، وعنوان السكن وجهة العمل.
أما بقى الورق المطلوب تحديدا فهو صورة من شهادة الميلاد للطفل. وخطاب تأمينات موجه للتأمينات الاجتماعية ، وصورة وثيقة طلاق الوالدين، وصورة وثيقة زواج الأم.
وكمان صورة شهادة وفاة الوالدين لو كان الطفل يتيم، أو مستند السجن في حالة سجن الأم أو الأب.
وبعد ما تقدم الاوراق المطلوبه كاملة، وزاره التضامن بتنزل لجان تعمل بحث ميداني واستعلام عن كل حاله عشان تتاكد انها تستحق المعاش فعلا، والرد على الطلب بتاعك بيكون خلال 30 يوم من بدايه التقديم.
وبتصرف الحكومة معاش الطفل من خلال استمارة “6 ضمان”، وإرسالها للحسابات يوم 20 من كل شهر، وبيتم الصرف في الفترة ما بين 1 إلي 15 من كل شهر.
ودلوقت بقى يهمنا نعرف تجربتكم هل سبق وسمعتوا عن معاش الطفل او حاولتوا تقدموا عليه؟ لو ده حصل قولوا لنا الامور كانت ماشيه معاكم وتمام ولا في صعوبات قابلتكم؟
كمان لو عندكم اي استفسار بخصوص معاش الطفل او شروط صرفه او الورق المطلوب اكتبوا لنا في الكومنتات.
