أزمات سالي عبد السلام وسر المرض المناعي الذي يهدد مستقبلها

إعلامية معروفة ومشاكسة، ودائما تتواصل مع جمهورها عن طريق السوشيال ميديا، ولا تسعى وراء التريند، وتحاول تقدم إعلام مناسب للجمهور.

ولكن مع ذلك حياتها فيها كتير من الأزمات وكل فترة بتطلع تريند بحاجة جديدة، وهي بتقول إن ده سببه إنها مبتسكتش، اتعرضت لمواقف كتير كانت حديث الناس، وآخرها كان إعلان مرضها.. هي سالي عبدالسلام

من بين إعلاميات كتير، هنلاقي سالي عبدالسلام اسمها بارز ومميز، بتقدم برامج اجتماعية بدأتها من الراديو، من المكان اللي الجمهور ميعرفش عنها غير صوتها، قدرت تنجح وتسيب بصمة من أول ما بدأت من برنامج «خلي بكرة أحلى» على ميجا إف إم، وقدمت بعدها عدد من البرامج على الراديو، وكمان دخلت مجال التلفزيون، وكان أشهر برامجها هو «المتوحشة»، واللي توقفت عنه قبل كام سنة، وانضمت لفريق عمل برنامج «كلام نواعم».

سالي عبدالسلام مواليد 1985، اتخرجت في الجامعة الكندية، ودرست الإعلام، وهو شغفها طول عمرها، بعتبرها مهنة سامية ومقدسة، واللي بيتكلم فيها مش أي حد وخلاص، يعني مرة لما مي حلمي عملت الأزمة الشهيرة مع لاعب الزمالك السابق أحمد صالح وأهانته على الهوا، واضطر الضيف ينسحب، واتوقفت المذيعة، طلعت سالي قالت «مش أي حد بيعرف يتكلم يبقى مذيع.. ما البغبغان بيعرف يتكلم»، طبعا هي مقالتش بالظبط بتتكلم على مين لكن كلنا عارفين.

سالي كان في محطات كتير في حياتها فيها أزمات، حتى إن البعض وصفها بإنها بتاعة مشاكل، وطلبوا منها توقف الكلام ده، منهم لما اتعرضت للتحرش وهي في بنزينة في التجمع الخامس، لما شاب حاول يعتدي عليها، وهي صورته، ونشرت الواقعة على إنستجرام، وبعد الموضوع ده تم القبض على الولد، ثم بعدها بشهور أعلنت سالي إنه تم إدانته، وطالبت كل البنات متسكتش على حقها.

واقعة الاعتداء كانت في مايو 2022 وبعدها بكام شهر، أعلنت زواجها من ظابط، ومن هنا نفهم ايه؟ أيوة إن الواقعة دي كانت السبب في حلقة الوصل بين الإعلامية والضابط مؤمن، وبالفعل، هي قالت ده، وإن الموضوع ده كان سبب مقابلتها للشخص اللي بقى زوجها بعد كدة.

سالي كانت بتعيش قصة حب، ولكن مكملتش، والمهم واللي خلاها تنتشر وتزيد، هو إنها طلعت في مرة على الهوا تبكي، وقالت إنها كانت بتقدم معظم حلقات برنامجها «قصة حقيقية» وهي منها نفسيا، والسبب في ده هو انفصالها عن أحد الأشخاص قبل كتب الكتاب والزواج، وكشفت إن السبب هو «لأن أغلبية اللي بنعرفهم مبقوش قد المسئولية ومبقوش رجالة ومبقوش يستاهلوا».

ومن أشهر أزمات سالي عبدالسلام لما تم إيقافها هي ووالدتها في مطار بيروت لـ4 ساعات، لما كنت خارجة من لبنان جاية مصر، واتعرضت والدتها لإهانات وسبب عندها حالة انخفاض في ضغط الدم، وطلعت سالي في فيديوهات توثق الواقة، وقالت أنا عايزة أخرج من لبنان مش عايزة آجي هنا تاني، ولكن بعد كدة السفارة المصرية اتدخلت وتم حل الأزمة.

ولكن هيفضل مرضها هو أكتر شيء عاملها أزمة في حياتها، لأنها أعلنت عن إصابتها بمرض الثعلبة للمرة السابعة، وكانت أول مرة تصاب بالمرض في 2017، وكانت على أمل غنه ميرجعش تاني، ولكن اللي حصل إنه كان كل مرة بيرجع، وبتاخد كورس علاجي من جديد، في الاول سالس كانت بتقول إنه الحسد السبب، وإن المرض جايلها في أكتر حاجة بتحبها في شكلها وهو شعرها، بندعيلها ربنا يشفيها وتعدي من الأزمة دي على خير وميتكررش تاني.