أباطرة السجاير اتفضحوا!
المسألة متخططة وهجوم كبير على باب البحر! الـ 5 كبار في سوق السجاير اتعرفوا.. ومسؤول كبير يكشف مصيبة عن تجار الجملة!
انترو…
خلاص انكشف المستور وعرفنا مين سبب أزمة السجاير الموجودة في السوق دلوقتي وده بإجماع من الشركات والمسئولين وهما التجار، ده حتى التجار نفسهم قالوا أنهم سبب الأزمة الموجودة
بس هما مين التجار دول اصلا؟ وموجودين فين؟ والحكومة عملت ايه معاهم؟ ومين أباطرة السوق اللي بنسمع عنهم؟
هي أزمة السجاير هتتحل امتى ومين السبب فيها؟ ده بقى لسان حال ملايين من المصريين دلوقتي بعد ما أزمة السجاير ما اتعقدت بشكل كبير خلال الفترة الأخيرة
وده خلى كتير من المسئولين وأصحاب شركات السجاير يطلعوا ويوضحوا اسباب الأزمة اللي أجمعوا أنها بسبب التجار، مش بس كده ده التجار نفسهم اعترفوا أنهم سبب الأزمة اه والله قالوا كده، بس إيه الحكاية؟
شوف يا سيدي، حسب موقع صدى البلد، فعدد من تجار التجزئة قالوا على مواقع التواصل الاجتماعي، أن الأجهزة الرقابية اتحركت لإسقاط تاجر شهير معروف باسم حوت السجاير في شارع باب البحر بمنطقة وسط البلد
وده بعد ما الجهات الأمنية وصلها شكاوي خلال الأسابيع اللي فاتت بتفيد بسيطرة مجموعة من الحيتان، على سوق السجاير وتخزين كميات منها بهدف تعطيش الأسواق والتحكم في الأسعار
دول قال كمان إن الجهات الأمنية قبضوا على عدد من أباطرة السجاير في عدد من المحافظات وده طبعا هياثر على سعر السجاير الفترة الجاية وهيخفضها
ولما تيجي تدور على الحقيقة ورا حيتان السجاير أو المعلمين الكبار، هتلاقي الكلام عن 5 أو 6 أشخاص تقدر تقول انهم اشهر حيتان السجاير في باب البحر هما مشمش اللي مفيش حد مسمعش عنه تقريبا، ومنصور وصقر, وأخيرا واحد اسمه الحوت.
ودول اكتر الاسماء المتداولة على السوشيال ميديا في تجارة السجاير سواء في أزمة اصلا ولا مفيش..واللي متعرفوش بقى، إن هاني أمان الرئيس التنفيذي لشركة الشرقية للدخان، طلع وهاجم التجار خلال تصريحاته تليفزيونية، وقال إن تجار السجاير في منطقة باب البحر بأنهم يبيعوا كميات كبيرة من السجاير المهربة، ده بجانب الكميات اللي استحوذوا عليها من السوق للتحكم فيه
وقال كمان إن عدد كبير من تجار السجاير في منطقة باب البحر مش مسجلين عند الشركة الشرقية للدخان.
ده حتى الإعلامي محمد الباز كان علق في برنامجه اخر النهار عن أزمة السحاير، وقال اننا لازم نتصدى محتكرين السوق، لأن فيه أيادي خفية بتلعب في سوق السجاير
وقال إن رغم جهود وزارة الداخلية في ضبط محتكري السجاير، لكن واضح إن فيه محتكرين كبار، ده كمان عرض أسعار السجاير الموجودة على صفحة «شركة جوهرة باب البحر- مشمش» على موقع التواصل الاجتماعي «فيسبوك»، وقال إحنا عندنا لعب في سوق السجاير
وقال أن مصر عاشت سنين كان أي تاجر يزود قرش على أي سلعة بيتعمل له قضية أمن دولة، وهنا أنا عندي واحد محتكر، والناس بتمدنا بمعلومات عن امبراطورية مشمش، بس أنا مش بدين مشمش، الناس تحقق وتشوف، لكن أنا بقول شواهد عن الموضوع
وقال أن التاجر اللي يتسبب في أزمة بالسوق بيشكل خطر كبير على البلد، وأن اللعب دلوقتي في السلع اللى مش بتتخزن في ثلاجات، زي الرز والسكر والسجاير وغيرها، يبقى كده المسألة مخططة
ده كمان ابراهيم امبابي رئيس شعبة الدخان علق على التجار دول وقال في تصريحات سابقة خلال برنامج على مسئوليتي، إن بعض تجار السجاير بقى يخزنوا البضاعة عشان يرفعوا سعرها لحد ما وصلت مكاسبهم ل100 مليار جنيه خلال الأزمة
وده لأننا ب يعني 4 مليار علبة سجاير وفي كل علبة مكسب.كل تاجر بيكون 25 جنيه وبكده مكسب التجار من أزمة ارتفاع الأسعار هو 100 مليار جنيه
ودلوقتي قولنا شايف مين سبب أزمة السجاير؟
