على طريقة الشوارع خناقة بين المستشار مرتضى منصور والنائبة فريدة الشوباشى، انت تلقح بالكلام وأنا ألقح، والجدع من يتسبب في صمت الآخر.
قالها إنتى شبه سيد عبد الحفيظ من غير بروكة، وهى قالتله أنت سرقت فلوس الناس ومش محبوب فى منطقتك. ليه عملوا كده؟، ده اللى هنعرفه فى الفيديو ده.
مرة واحدة ظهرت على الساحة خناقة جديدة بين المستشار مرتضى منصور، رئيس نادى الزمالك والنائبة فريدة الشوباشى، المعروفة بآرائها المثيرة عن رجال الدين، ودى كان بداية الخناقة بينها وبين المستشار.
البداية كانت من كام يوم لما طلعت فريدة الشوباشى وعبرت عن غضبها عن عمل مسرحي للشيخ الشعراوى، وطبعا لان مرتضى منصور ليه فى كل حاجة طلع مسح بكرامتها الارض، وقالها انتى شبه سيد عبد الحفيظ من غير باروكة، مش عاجبه شكلها يعنى.
ده كمان زود فى كلامه واعتبرها ملهاش ملة في الدين، وقال إنه مش عارف هى مسلمة ولا مسيحية ولا إيه بالظبط، وكمان بتقول للناس ماتصليش، منهم عم عيد، وهو واحد كده مرتضى بيقول انها قالتله مفيش ربنا خالص.
بعد الكلام ده، فريدة سخنت والدم جرى فى عروقها، وقامت طالعه فى تصريحات صحفية واتهمته أنه سرق فلوس من المصريين ومن أهل منطقته والناس أصلا مابتثقش فى كلامه ولا بيعبروه وسقطوه في الانتخابات الأخيرة بتاعت مجلس النواب.
أظن عايزين تعرفوا فريدة تقصد أيه بسرقة الفلوس، ما تقلقوش هنقولك، تقريبا كده والله أعلم تقصد علاقته بالريان اللى كانوا شغالين فى العملة فى التسعينات واتقبض عليهم بتهمة النصب على الناس، فاكرينهم ؟
أه هما دول، مرتضى منصور كان المحامى بتاعهم لفترة كبيرة، وكانوا قريبين من بعض زى ما أنتم شايفين، رايحين جايين فى كل مكان سوى، وعشان كده فريدة الشوباشى قالت عليه حرامى.
مش بس كده، ده كمان قالت أن المستشار اترفد من القضاء المصرى وقتها عشان كدا، السرقة يعنى.
وعلى فكرة مرتضى أخذ وقتها 3 شهور حبس على ذمة التحقيقات فى القضية دى، بسبب علاقته بالريان.
بعيدا بقى عن فريدة الشوباشى، هوا سيد عبد الحفيظ هيسكت بعد ما لمستشار استخدمه فى تريقته على فريدة الشوباشى، ده اللى هنعرفه الفترة اللى جايه، ولو حد فيكم قريب من سيد عبد الحفيظ يبعتله الفيديو ده، خلوه يعرف سيرته بتيجى فى إيه من وراه.
