ماذا يحدث في سوق الحديد ؟ وكيف يمكن أن يصل الطن إلى 50 ألف جنيه؟ وما تأثير ذلك على وق العقارات؟ إجابات كثيرة ومفاجآت سنكشفها من خلال التقرير التالي:
حالة من الارتباك موجودة في الأسواق بسبب ارتفاع أسعار الحديد بشكل جنوني واللي قربت يكسر حاجة الـ40 ألف جنيه للطن الواحد، وعشان كده المتعاملين في السوق خايفين إنه ارتفاع الأسعار ده يأثر على قطاع التشييد والبناء.
وده لأنه زي ما انتوا عارفين الحديد ده عنصر أساسي للقطاع العقاري في مصر وعشان كده الناس كلها اليومين دول ملهمش سيرة غير أسعار الحديد اللي ولعت نار، خاصة بعد الازمة الروسية الأوكرانية واللي رفعت أسعار معظم مدخلات القطاع زي الحديد والأسمنت والبليت.
وحسب مصادر في أسواق مواد البناء قالت إنه لازم الجهات المختصة تتدخل لضبط أسواق مواد البناء خاصة سعر حديد التسليح واللي بقى فيه فجوة كبيرة بين سعري التوريد والبيع للمستهلك
ووصلت الفجوة دي لحوالي 8 الاف جنيه للطن الواحد واللي كانت في الأوقات العادية وقبل جنون الأسعار حوالي الف جنيه بس
والغريبة إن كل ده بيحصل رغم إنه في ركود في الطلب على الحديد لكن سعر الطن تسلم أرض مصنع بيكون ما بين 28500 ولحد 35 ألف جنيه وده طبعا من غير تكلفة النقل.
وعشان كده أسواق مواد البناء فيها حالة من الضبابية مش مفهومة وده بعد ما حققت أسعارالحديد أعلى مستوياتها في التاريخ وده رغم تراجع المعروض والطلب على المعدن .
ورغم كده كل يومين نسمع عن زيادة جديدة في أسعار الحديد وده اللي خلى سعر الطن يقرب من 40 ألف جنيه للمستهلك في الأسواق .
وحسب تقارير صحفية، فـ أسعارالحديد زادت على مدار الـ 15 شهر اللي فاتو زيادة بأكتر من من 150% وده لأنها اتأثرت بـ الأحداث العالمية.
والتقارير دي أكدت إن اللي بيحصل ده هيكون ليه تداعيات خطيرة في الوقت الحالي وهي إننا ممكن نشوف شركات منتجة للحديد إنها تبدأ تتجه للتصدير للخارج بشكل أكبر وده عشان يوفروا العملة الصعبة ويقدروا بيها يستوردوا المواد الخام عشان يستكملوا مراحل الانتاج
وطبعا الوحش في الموضوع إنه لو ده حص السوق المصري هيصدر وده لأنه هيكون في نقص في معروض الحديد في السوق ومش هيقدر يلبي الاحتياجات المطلوبة لتنفيذ المشروعات.
وده طبعا هيساهم إن أسعار الحديد تزيد لأكتر من 44 ألف جنيه ده في حالة لو تم توفيره من الأساس وده لأنه مش هيكون متوفر رغم ارتفاع سعره
وعشان كده التقارير دي بتتوقع إنه يظهر سوق موازي لسعر الحديد في مصر أو زي ما تقولوا كده مزاد على الطن واللي هيوصل سعر الحديد لـ 50 ألف جنيه للطن.
وطبعا الكلام ده مجرد افتراضات مبنية على ارتفاع الأسعار اللي حصل الفترة دي وقابلة لأنها تكون صح أو غلط.
أما بقى لو بتسأل عن متوسط الاسعار لطن الحديد دلوقتي فـ حاليا حديد عز مثلا سعره 32135 جنيه للطن والسعر ده غير شامل تكلفة النقل للمستهلك النهائي.
وده أشهر مصنع لإنتاج الحديد في مصر والشرق الأوسط.
كمان عندك حديد المصريين فـ أستقرت أسعاره عند 32050 جنيه للطن تسليم أرض مصنع وغير شامل نولون النقل للمستهلك .
ولو انت مش عارف فـ مصر بتنتج حديد تسليح حوالي 10.2 مليون طن وده شامل كل مصانع الحديد وفقا لمنظمة الصلب العالمية.
دلوقتي قولنا من وجهة نظرك مين السبب في ارتفاع أسعار الحديد في مصر وهل فعلا ممكن توصل لـ 50 ألف جنيه للطن ؟
