” طلع فيها حشرات” هذا الخبر الذي انتشر وقلب السعودية لانه يحذر من بامية مصري موجودة في السوق السعودي،فياترى ما الحقيقة؟ وهيئة الغذاء في السعودية ماذا قالت ؟ وما العقوبة المنتظرة للشركة؟
أنت متخيل إن في منتج ملايين من المصريين بيستخدموا وكمان بيتصدر بره مصر الهيئة العامة للغذا حذرت منه، واكتشفت كارثة فيه
بس هو إيه اللي حصل؟
شوف يا سيدي، حسب صحيفة سبق السعودية، حذرت الهيئة العامة للغذاء والدواء في السعودية من استهلاك منتج غذائي اسمه سنابل وده عبارة عن منتج بامية زيرو مجمدة بيتم انتاجه في مصر.
والمفاجأة بقى أن الهيئة قالت المنتج ده بيحتوي على إصابات حشرية فيه وطبعا ده مخالف للائحة الفنية، بس الناس على السوشيال ميديا خدت الكلام بإن أكياس البامية فيها حشرات لكن تحذير الهيئه الغذاء ممكن يكون معناه ان البامية مصابة بآفات زراعية.
وعلى فكرة دي قالت إن التحذير ده بخصوص البامية بس مش لكل منتجات الشركة عشان كده حذرت المستهلكين من المنتج وطلبت منهم أنهم يتخلصوا منه، وحاليا هي بتابع إجراءات عدم دخول المنتج للمملكة وده بالتنسيق مع الشركة المستوردة والجهات المختصة
بس السؤال هنا: هو إيه عقوبة الشركة دي بعد ما اكتشفوا الإصابات الموجودة في المنتج بتاعهم؟
أنا أقولك حسب موقع فيتو، المادة الأولى من القانون قال إنه يعاقب بالحبس مدة متقلش عن سنة وغرامة متقلش عن 50 لـ 200 ألف جنيه أو ما يعادل قيمة السلعة لأي حد خدع المتعاقد معاه بأي طريقة من الطرق زي نوع البضاعة أو عددها أو وزنها أو مقاسها
ده كمان ممكن العقوبة توصل لخمس سنين والغرامة تكون من 100 لـ 300 ألف جنيه لو الشخص ده خدع المتعاقد معاه من خلال استخدامه مكاييل أو موازين أو دمغات على البضاعة أو آلات فحص مزيفة أو مستندات مزورة
مش بس كده العقوبة ممكن توصل لـ خمس سنين سجن ومليون جنيه غرامة لو السلعة المغشوشة دي كانت من أغذية الإنسان أو الحيوان أو من العقاقير أو من النباتات الطبية أو الأدوية أو الحاصلات الزراعية أو المنتجات الطبيعية والصناعية، أو أي حد يبيع المنتجات دي وتاريخ صلاحيتها انتهى أو كانت فاسدة
وبيتعاقب بنفس العقوبة دي برضو أي حد يبيع عبوات أو أغلافة بتستعمل في غش الأغذية أو أي حد يحرض على ده
وممكن العقوبة توصل لسبع سنين والغرامة توصل لـ 2مليون جنيه لو كانت البضاعة هتضر بصحة الإنسان خصوصا لو كانت البضاعة عبارة عن منتجات غذائية
وعلى فكرة منتج البامية مكنش أول منتج غير مطابق للمواصفات وده لأن من شهور انتشر مقطع فيديو على مواقع التواصل الإجتماعي بيظهر فيه مصنع في بورسعيد تحت بير السلم بيقلد كتير من المنتجات الشهيرة زي النسكافيه والفانيليا والبيكنج بودر ومنتجات تانية لمصانع معروفة
طبعا الحادثة دي قلبت الدنيا لأن المنتجات اللي ملايين من الناس بيستخدموها بشكل يومي طلعت عبارة عن بودرة سيراميك، لكن وزارة التموين مسكتتش وقدرت أنها تقفل المصنع ده وتقضي على كل البضايع اللي فيه
ومن بعد الواقعة دي الحكومة شددت الرقابة على كل المحلات والمصانع لضبط أي سلعة مغشوشة
ودلوقتي قولنا اشتريت البامية دي ولا لأ؟
