لن تقدم إقرار ضريبي ولن تدفع ضريبة، لا تحمل هم بعد الأن وبعد التصريحات الأخيرة لرئيس مصلحة الضرائب التي كانت بمثابة بشرى لفئة معينة فمن هي هذه الفئة؟ تابعونا من خلال التقرير التالي لمعرفة التفاصيل:
لكن مين الفئة اللي يقصدها؟ وياترى رئيس مصلحة الضرايب قال إيه؟ وكان إيه تحذيره لأصحاب العقارات؟ وياترى تكلفة الاقرار الضريبي ده كام؟
ناس كتير لما بتسمع كلمة اقرار ضريبي ولا ضرايب بتقلق، وده لأن أول حاجة بتيجي في بالهم أنهم هيدفعوا مبلغ وقدره خصوصا بقى لو اللي هيقدم الاقرار ده حاله على قده
بس مصلحة الضرايب غيرت الفكرة دي تماما، وده لأن الدكتور فايز الضباعني رئيس مصلحة الضرايب طمن الناس وقال إن في بعض الفئات معفاة من الضرايب، بس ياترى هو قال إيه؟
شوف يا سيدي، حسب الدكتور فايز الضباعني، رئيس مصلحة الضرايب، في المصري اليوم، إن في حالة بيتم فيها إعفاءها من تقديم الاقرار الضريبي وده بقى في حالة أنك لو أجرت عقار ولا محل ولا وحدة سكنية سواء مفروش ولا محدد المدة، وصافي ايرادك السنوي منها لا يتجاوز الشريحة المعفاة وهي حاليا 21 ألف جنيه.
وقال كمان إن حتى لو الشخص ده موظف وعنده عقارات صافي ايرادها السنوي 21 ألف برضو بيتعفي من الضرايب.
أما بقى باقي الممولين اللي عندهم ايرادات من الثروة العقارية بتتجاوز المبلغ ده، فرئيس مصلحة الضرايب طلب منهم أنهم يلتزموا بتقديمه عشان ميتعرضوش للمخالفات طبقا لقانون الضريبة على الدخل وقانون الاجراءات الضريبية الموحد، لأن الممول عموما ملتزم بتقديم اقرار ضريبي كل سنة
وبالمناسبة ده كمان وضح المقصود بكلمة عقار وقال أن المقصود منها المبنى المكون من وحدات سكنية وغير سكنية، أما بقى الوحدة السكنية فالمقصود منها الوحدة اللي بتستخدم لأغراض سكنية بس، أما المحل فهو جزء من عقار مخصص لممارسة أي نشاط تجاري وخلافه.
وقال إن العقار أو الوحدة السكنية أو المحل ممكن يكونوا بغرض الامتلاك بس وفي الحالة دي مش هيكون في أي إيرادات مصلحة الضرايب تحاسب الممول عليها.
أما بقى لو كانت الوحدات دي بغرض التأجير فهنا بقى الممول بيدخله إيرادات وبيتحاسب عليها، أما في حالة البيع هنا المصلحة بتفرض على الممول ضريبة تصرفات عقارية وبتكون نسبتها 2.5% من قيمة البيع.
معنى الإقرار الضريبي
أنا أقولك، حسب موقع القاهرة 24، الإقرار الضريبي هو عبارة عن مستند بتقدمه أي منشأة أو شركة بتخضع لضريبة قيمة مضافة لمصلحة الضرايب كل سنة أو من خلال الفترة اللي بتحددها المصلحة.
لكن مع التحول الرقمي مصلحة الضرايب أعلنت عن إمكانية تقديم الاقرار الكتروني، وكمان أعلنت عن خطوات التقديم وهي بسيط جدا وعبارة عن خطوتين بس.
الخطوة الأولى: هو تسجيل الشخص لبياناته عن طريق الموقع الالكتروني الرسمي للمصلحة، أما بقى الخطوة التانية: فهي بتطلب من الممول أنه يروح لأقرب مكتب لمصلحة الضرايب عشان يوقع الاقرار الضريبي.
لكن هو تكلفة الاقرار ده كام؟
حسب موقع القاهرة 24، مصلحة الضرايب كشفت عن تكلفة الاقرار الضريبي وقالت أن قيمته 325 جنيه سنويا شامل الضريبة المضافة وده بالنسبة للممولين المكلفين
أما بالنسبة لغير المكلفين فقيمته هي 28.5 جنيه شامل القيمة المضافة عن اشتراك شهر واحد بس.
