قريبا، أول بنك للذهب في مصر! ودلا من حفظ الذهب في المنزل فإنه يمكنك إيداعه في البنك والاستفادة منه من خلال الحصول على فائدة مع الاحتفاظ بالذهب نفسه، فكرة جديدة اقترحها رجل الاعمال المصري أحمد أبو هشيمة، ورد من الحكومة على الفكرة، فهل ممكن أن يتم تنفيذها قريبا؟ هذا ما نتعرف عليه من خلال التالي:
ناجي فرج، مستشار وزير التموين لشؤون الدهب، رحب بفكرة رجل الأعمال احمد ابو هشيمة لإنشاء بنك دهب مصري، عن طريقه المواطن يعمل إيداع للمشغولات الذهبية والسبائك في البنك ويأخذ فايدة 3%.
مستشار وزير التموين وصف الفكرة وقال: مقترح جيد جدا وممكن تنفيذه، وسيحقق مصلحة المواطن والدولة، فالمواطن سيحصل على عائد، والاحتياطي الاستراتيجي في البنك المركزي سيزيد، وممكن الدولة تحول الذهب إلى دولار وتستخدمه في مشروعات تنموية وإنتاجية.
وكان “أبو هشيمة” في لقاء تلفزيوني ببرنامج يحدث في مصر، اقترح مبادرة لاستثمار الدهب من خلال البنوك او أي إدارة مختصة مقابل عوائد استثمارية، وقال: “لو وضعت 10 ملايين سيدة 50 جرام من الدهب في البنوك، هيدخل في رصيد البنك المركزي للدولة بقيمة 25 مليار دولار، لأن ادخار الذهب في البنوك هيحقق للدولة عوائد عديدة”.
وأوضح رأي الناس في فكرته لما قال “أنا سألت الناس وبعض الأشخاص والمتعلمين، عن إيداع الذهب في البنك، في ناس قالتلي عايزين تاخذوا ذهبنا كمان، هذا ما قيل لي حوالي 3 أو 4 مرات”،
وهنا رد ابو هشيمة وقال : “بالأرقام إمتى الدولة أخذت من أي مودع مصري فلوسه في البنوك.. محصلش، امتى الدولة لم تفي بالتزاماتها دوليًا.. محصلش، بالمقابل ظهر كام مستريح في الفترة اللي فاتت، يعني بنثق في ناس مش مضمونة و”مستريح” ولا نثق في الدولة المصرية!”.
وتابع: “المواطن المصري هيروح البنك يودع الذهب وهياخد صك من البنك بكل بيانات الدهب منها العيار ووزن الجنيه، والبنك هيقولك عندك عائد كذا هتاخده بالطريقة المعينة زي شهادة الاستثمار.
ووجه كلامه للمصريين: “دلوقتي انتا شايل الذهب لأنه وسيلة للادخار والاطمئنان، وفي ناس باعت دهب كتير الأيام اللي فاتت في وقت زنقة، ودلوقتي بعد الإيداع في البنك لو عايز تبيع الدهب هتروح للبنك وبيتم الإعلان عن سعره لأن ليه بورصة زي أي معدن وسعره معلن”.
“شوف الاقتصاد المصري هيستفاد قد إيه من إيداع الدهب في البنوك واحنا رايحين لصندوق النقد عشان نستلف 7 مليار دولار وبقالنا في مفاوضات كتير.. المصريين جوا بلدهم عندهم ثروة كبيرة من الدهب الله اعلم كام، لكن في الأساس اقتصاد غير رسمي والمصريين مش مستفيدين منه”.
وأكد أن إيداع الذهب في البنوك للاستثمار هيقلل ظاهرة المستريحين، والمصريين احتمال يكون معاهم ثروة حقيقة من خلال الدهب غير المستغل، وقال في نهاية كلامه إنه هيطرح فكرة ايداع الذهب بالبنوك في المؤتمر الاقتصادي ومجلس الشيوخ.
انتوا إيه رأيكم في كلام ابو هشيمة وهل توافقوا تحفظوا بفلوسكم في البنك طالما هتاخد عائد عليه؟ ولا عندكم رأي تاني؟ مستنيين مشاركتكم في التعليقات.
أبو هشيمة طلع صح ولا إيه؟ اول رد حكومي على إنشاء بنك للدهب في مصر.. اعرف الفايدة هتبقى كام.
