من منا لا يمتلك زكريات في حديقة الحيونات، أغلبنا زارها في صغره وكان ينتظر يوم العيد لكي يذهب مع أهله ويقضي أجمل اللحظات السعيدة والطريفة، والتي تكون ممتعة جدا وتأخذك في جولة لمشاهدة الحيوانات المختلفة، هذا غيرغير الأماكن التاريخية زي جبلاية القرود والكهوف والممرات المائية والأشجار الكبيرة والنادرة، وبعد مرور أكثر من 130 عام على انشائها فقد انتشر خبر عن تطويرها أسعد كل المصريين وسوف نتعرف على تفاصيله من خلال التالي:
الدولة حاليا بتسعى لتطوير أعرق حديقة للحيوانات في مصر بالجيزة واللي مرصود ليها خطة بتستهدف تغيرها بشكل كامل، فمثلا حسب كلام مطوري الحديقة قالوا إنها مش هيكون فيها أي حواجز والحيوانات مش هتتحبس في أقفاس بس متقلقوش من الحيوانات المفترسة لأنهم هيطبقوا أعلى معايير الأمان للزوار.
دي كمان هتتقسم لأربع قطاعات منها المصرية والأفريقية والأسيوية وكمان هيكون متاح ليكم تجربة الزيارة الليلية، وده غير إنهم هيدخلوا أنواع كتيرة أوي وجديدة من الحيوانات اللي مكنتش موجودة قبل كدا.مش بس كدا ده هيتم بناء تلفريك يربط حديقة الحيوانات بحديقة الأورمان في تجربة مزهلة لكل الزوار.
الجميل بقا في الموضوع إننا مش هنستني كتير لحد ما الخطة دي تتنفذ ، وده لأنه بعد 18 شهر من دلوقتي هتكون انتهت بالكامل، وفي كمان جهود لإنها تخلص في سنة واحدة بس .
مصر كمان استعانت بخبراء أجانب لتطوير الحديقة واللي هتكون بناء على مشروع هيتنفذ في حديقتي الحيوان والأورمان بالجيزة لصالح وزارة الزراعة.
خليني كمان أقولك إن هدف التطوير مش بس إعادة البريق والرونق لحديقة الحيوان الاثرية والتاريخية ، ده كمان هيرجعها تاخد تصنيف عالمي للمنظمة الدولية لحدائق الحيوان، وده بعد ما عانت الحديقة من الاهمال لفترات طويلة.
وعشان محدش يقلق ويشوف إن التطوير ممكن يهد أي مكان أو يغير في شكل الحديقة فالقائمين على التطوير بيقولولكم متخفوش، مفيش شجرة واحدة هتتقطع.
دول كمان قالوا إن الخبراء اللي استعانون بيهم في تطوير الحديقة لو حد قطع شجرة واحدة مش هنكمل في المشروع وده لأنهم مهتمين بالحديقة وبجمالها الجوهري وعايزين يطورها من غير ما يغيروا فيها حاجة .
ده كمان مش هيكون في مباني كتير ولا زحمة لأن في الخطة الجديدة كل الانشاءات اللي بيجرى العمل عليها متحركة ونسبتها مش هتتجاوز 0.9% ومافيش أكشاك مع التأكيد إنه مساس برونق المكان .
ولو حابب تعرف أكتر فالمشروع المخطط ليه هيكون من بالتعاون مع شركات عالمية متخصّصة فى المجال، واللي هيكون ضمن توجيهات الحكومة بإحياء كافة الحدائق وتعزيز دورها كمناطق مفتوحة ومساحات خضراء داخل المدن، مع الحرص على الحفاظ على المسطحات الخضراء بداخلها خلال تنفيذ أعمال التطوير واللي طبعًا بتعتبر متنفس للمواطنين.
قولنا دلوقتي رأيك في جهود الدولة لتطوير الحدائق والمساحات الخضراء؟
