كل بيت سيكون له رقم قومي خاص به! وهذا قرار من الحكومة بموافقتها على مشروع قانون الرقم القومي الموحد للعقارات، فما يعني هذا القرار؟ وما الهدف منه، تابعونا لمعرفة التفاصيل:
الحكومة عايزة تعمل حصر شامل للعقارات في مصر وده عشان تساعد الدولة إنها تحقق نمو اقتصادي وكمان تحقق التحول الرقمي
يعني إيه الكلام ده ؟اصبر معايا كده واحده واحده الحكومة وافقت على مشروع قانون الرقم القومي الموحد للعقارات واللي بينص على إنشاء قاعدة قومية للعقارات.
واللي هتتكون من رقم موحد لكل عقار وده معناه إن كل بيت هيكون ليه رقم خاص بيه ويميزه عن البيوت التانيه، والرقم ده حسب مشروع القانون الجديد هيكون مكتوب على بطاقات أو لوحات مملكة للدولة.
لكن خلي بالك لو حاولت تبوظ اللوحة دي أو تشيلها أو حتى تغير مكانها هتتعرض للعقوبات، ودي اللي حددها مشروع القانون ولازم عشان تعمل كده ترجع للموظف المسؤول الأول .
طيب الكلام ده هيحصل امتى ؟
المفترض إن الوحدات السكنية في انتظار تركيب اللوحات الخاصة بالرقم القومي الموحد للعقارات وده بعد ما وافقت الحكومة على مشروع القانون في اجتماعها الأسبوع اللي فات.
وبعد موافقتها هيروح القانون لمجلس النواب عشان يقرر إصداره وبعد كده رئيس الجمهورية يصدق عليه وتنزل اللايحة التنفيذية للقانون وبعدها يقدر القانون يدخل حيز التنفيذ .
وخلي بالك بمجرد ما يتعلن عن اللائحة التنفيذية لمشروع القانون فـ الحكومة هتدي مهلة محددة للجهات المعنية تلتزم بيها وده عشان المواطنين يبدأوا يحصلوا على اللوحات دي في خلال 6 شهور بس من تاريخ صدور اللائحة دي.
لكن اطمن وده لأن القانون سمح لرئيس مجلس الوزراء إنه يزود الفترة دي ويمدها لـ6 شهور كمان ومدد تانيه لكن متزدش إجمالي المدة دي عن 3 سنين .
لكن حسب موقع صدى البلد فـ المتوقع إنه يصدر مشروع القانون في دور الانعقاد الرابع لمجلس النواب واللي مفترض يبدأ مع أول خميس من شهر أكتوبر
طيب هل اللوحات دي هتتعلق فين بظبط ؟
بص ياسيدي حسب نص مشروع القانون اللي الحكومة وافقت عليه فـ الرقم القومي الموحد للعقارات هيتم تعليقة على كل وحدة عقارية سواء كانت سكنية أو ادارية.
يجي حد يقولي يعني أنا كمواطن هستفاد إيه وإيه أهمية اللوحات دي؟ هقولك حسب تصريحات الدكتور سعيد حسانين، استشاري التخطيط العمراني لـ برنامج صباح الخير يامصر، أكد إنه الهدف من مشروع قانون الرقم القومي الموحد للعقارات إن كل مبنى وكل وحدة سواء كانت سكنية أو تجارية أو اقتصادية يكون عندها بطاقة تعريف كاملة والرقم ده هيكون مختلف عن أي وحدة سكنية تانيه.
وده نفس الكلام اللي كشفه أحمد شحاتة الخبير الاقتصادي في تصريحات لموقع صدى البلد وقال إن القانون الجديد هيحفظ للمواطن حقه في إنه يحصل على وحدة سكنية مرخصة غير مخالفة وكمان هيمنع تداول الوحدات المخالفة، وده هيقلل حالات النصب ويحفظ حق المواطن ويمنع العشوائية.
وده لأنها بتستهدف توحيد رقم المبنى والمنشأة في الشهر العقاري والضرائب والأملاك وتراخيص البناء، دلوقتي قولنا رأيك في فـ مشروع الرقم القومي الموحد للعقارات ؟
