و وماذا بعد في الدولار! لماذا ارتفع سعره مرة أخرى في السوق السوداء؟ وهل هذا دليل على اقتراب التعويم الرابع للجنيه؟ وهل فعلا سعره سيتخطى 44 جنيه؟ تابعونا لمعرفة التفاصيل:
في الايام اللي فاتت سعر الدولار تراجع في السوق السودة عشان يسجل من 35 إلى 36.5 جنيه، لكن دلوقتي رجع للزيادة تاني واخر سعر سعر وصل ليه 37 جنيه، حسب تقارير اعلامية.
والسؤال هنا إيه اللي بيحصل في السوق يخلي الدولار ينزل ويطلع في أيام معدودة؟
بص ياسيدي، خلال الاسابيع اللي فاتت زاد التوقعات بإجراء تخفيض جديد في سعر الجنيه، وفي ناس كانت مستعدة ان ده يحصل مع اجتماع البنك المركزي الأخير في مارس.
وطبعا ده محصلش و سعر الدولار الرسمي لسة مستقر تحت ال31 جنيه، وده اللي عمل هدوء شوية في حركة البيع والشراء في السوق الموازية.
لكن دلوقتي سعر الدولار في السوق السودا بيتحرك ناحية الصعود من تاني ولأكتر من سبب زي:
استمرار نقص الدولار وتراجع سعر الجنيه في العقود الآجلة للدولار، والأخبار عن مطالب صندوق النقد الدولي للحكومة بتوفير مرونة أكبر في سعر صرف الجنيه مقابل العملات التانية.
كل العوامل دي رجعت مسألة التعويم من تاني وزودت احتمالات خفض قيمة الجنيه، وده ظهر في ارتفاع سعر الدولار الى 44.4 جنيه في العقود الآجلة غير القابلة للتسليم لمدة 12 شهر.
طيب إيه حكاية العقود الآجلة اللي عاملة أزمة في السوق؟
بص ياسيدي ده اتفاق بين طرفين على سعر العملة في المستقبل، ويعتبر نوع من أدوات التحوط أو المضاربة على العملات.
وعادة بيحصل مع العملات المعرضة لانخفاض قيمتها وخصوصا لو مكنتش محررة بشكل كامل.
وطبعا السعر اللي بيتقال مش لازم يحصل بالظبط في المستقبل، لكنها تعتبر مؤشر بيوريك ازاي المستثمرين شايفين قيمة العملة بتاعتك.
ضيف على كده كمان، كلام وكالة بلومبرج عن أسباب تأجيل صندوق النقد إجراء المراجعة الأولى لصرف الشريحة التانية من قرض ال3 مليار.
وحسب مصادر الوكالة، الصندوق مستني حاجتين: الأولى مرونة أكبر في سعر الصرف زي ماقلنا، والتانية: الإعلان عن صفقات فعلية ضمن برنامج الحكومة لبيع 32 شركة وبنك.
وفي نفس الوقت، اكتر من بنك عالمي توقعوا خفض قيمة الجنيه الفترة الجاية، عشان يسجل الدولار مابين 35 إلى 40 جنيه في 2023.
وفوق كله ده، الفرق في سعر بنك سهم الcib بين بورصة مصر وبورصة لندن بيزود احتمالات خفض الجنيه، في مصر سعر السهم 58.5 جنيه وفي لندن سعره 1.22 دولار ، يعني كده سعر الدولار واقف بحوالي 47.9 جنيه.
وبناء على المؤشرات دي، في خبراء بيتوقعوا خفض المركزي لسعر الجنيه فعلا بس لغاية كام محدش يعرف بالظبط.
وحسب عمرو الالفي من شركة برايم، انخفاض الجنيه هيكون تدريجي مش مرة واحدة، يعني هتلاقي الدولار في البنك بيزيد كام قرش كل شوية لغاية ماوصل لمرحلة الاستقرار.
فياتري دا رأيكم انتوا كمان ، ولاشايفين البنك المركزي هيرفع الدولار مرة واحدة؟
