فرص عمل جديدة يتم الترتيب لها للمصريين في السعودية، الكل يستعد ويجهز شنطته ، فقد كان هناك اجتماع بين الحكومة المصرية والحكومة السعودية، وكان فيه قرارات مهمة قوى تخص الجانب المصري، بالتحديد العمالة المصرية.
إيه الاتفاق اللى تم بين مصر والسعودية؟ وازاى العمالة المصرية تستفيد منه؟ وإيه حكاية الفرصة الجديدة للعمالة ده اللى هنعرفه مع بعض في الفيديو ده.
الحمد لله الأمور في تحسن دلوقتى والحكومة المصرية شغالة على آخرها لتوفير فرص عمل للمصريين فى دول الخليج واللى أهمهم طبعا السعودية، واللى شعبها أصلا بيحب المصريين وبيساعدوهم في فرص العمل دون عن بقية دول العالم التانيه.
ومن كام يوم كده كان فيه قعدة بين مسؤولين مصريين وسعوديين، القعده كان أغلب الكلام فيها عن العمالة المصرية وازاى نقدر الفترة اللى جايه دى أن نوفر ليهم فرص عمل ياكلوا منها عيش بالحلال.
وبالفعل قرر الطرفان المصرى والسعودى على تحسين أوضاع العمالة المصرية بالمملكة العربية السعودية، وكانت المفاجأة الاتفاق على مركز مصري سعودى للهجرة والوظائف، المركزة ده يتفتح قريب خالص، بس لسه ما اعلنوش ميعاده الرسمي.
وكمان كان فيه تفاصيل تانيه كتير جوه الأجتماع ده، ناقشتها وزيرة الهجرة المصرية سها الجندى مع الملحق العمالى السعودى في القاهرة، فيصل العتيبي، وتم الاتفاق على تفعيل ما تم الاتفاق عليه قبل كده خلال مناقشته مع وزير الموارد البشرية والتنمية الاجتماعية أحمد بن سليمان الراجحى.
الاتفاقات دى كانت معرفة إيه اللى بيضايق المصريين في السعودية عشان يساعدوهم، كل التحديات والأمور اللى ممكن تواجه المصريين هناك حرفيا.
وأكد على الكلام ده الدكتور فيصل العتيبى، الملحق العمالى السعودى في القاهرة العاصمة المصرية، وقال أن اللقاء يأتي لمتابعة ماتم الأتفاق عليه في الرياض بين الوزيرين من مقترحات لتظبيط العلاقة بين البلدين، وأكد كمان على أهمية التركيز على جودة العمالة المصرية المهاجرة للمملكة للبحث عن شغل، وأنه يجب على كل واحد حابب يسافر السعودية يشتغل أنه يكون مدرب كويس قوى في مهنته، ها، ناخد بالنا بقى والكل يكون مستعد للشغل في السعودية كويس جدا.
وعلى فكرة فيه استراتيجية جديدة بين المملكة العربية السعودية ومصر شغاله على الكلام، بس دور كل واحد عايز يسافر بقى أنه يسعى لوحده ويدرب نفسه، مش لازم الحكومة تدربه، لان السعودية دلوقتى بتدور بس على العمالة الشاطرة اللى بتعرف تنجز شغلها بسرعه وعلى طول وما تاخدش وقت كتير ولا تستنزف طاقة ومجهود، ومصر أغلب شبابها كده الصراحه فا مفيش قلق بإذن الله على شبابنا هيلاقوا فرص شغل والدنيا هتكون تمام التمام بأمر الله.
المهم في موضوعنا بقى أن وزيرة الهجرة المصرية خلال الجلسة التى كانت بينها ومسؤولين سعوديين أكدت على إنشاء مركز مصري سعودي للهجرة والوظائف وإعادة الإدماج، زى المركز المصري الألماني التابع بردوا لوزارة الهجرة المصرية، واللى يهدف لتأهيل العمالة قبل سفرها وتدريبهم على كل الأدوات والمهارات اللازمة لضمان أن العمالة تكون في أحسن حال قبل السفر، وتحقق المطلوب منها بره لما تسافر بأمر الله، وتنتج شغل كويس.
وبعد الاتفاق بين المسؤولين هنا في مصر والسعودية، أكيد أنتم منتظرين المركز الجديد ده يفتح علشان تروحوا تدربوا فيه سواء أنتم أو أي حد من قرايبكم، لو عايزين فعلا تعرفوا موعد افتتاح المركز ومكانه أكتبوا لينا في التعليقات وأحنا هانعمل فيديو نقولكم فيه على كل التفاصيل دى.
