حالة كبيرة من الجدل حدثت خلال الايام الماضية بعد الإعلان عن تجسيد شخصية الشيخ محمد متولي الشعراوي في عمل مسرحي على خشبة المسرح القومي، وبعد اعتذار الفنان كمال أبو رية عن الدور والذي فسره البعض في الأول بإن ورائه أمر مريب، ثم تصريحات وزيرة الثقافة الدكتورة نيفين الكيلاني التي كانت سبب في حالة كبيرة من الجدل، وبعض النقاد والفنانين، فماذا حدث؟
الشيخ محمد متولي الشعراوي، واحد من الناس اللي كان ليهم شعبية كبيرة جدا في حياتهم، لأنه كان محبوب من كل طبقات الشعب، وكان كلامه سهل وبسيط، وأي جملة مفيدة بيكون فيها اسم إمام الدعاء رحمة الله عليه، بتكون تحت النظر.
المهم يعني إن خلال الأيام اللي فاتت ظهر كلام إن في عرض مسرحي هيقام على خشبة المسرح القومي بيجسد شخصية الشيخ الشعراوي، واللي هيلعب الدور هيكون الفنان كمال أبو رية، والفنان اعتذر عن الدور واتفسر الكلام إنه رافض يقدمه، لكن هو قال في تصريحات إن السبب إنه شغال على مسلسله الرمضاني، والتصوير فيه هيكون مستمر لحد نص شهر رمضان وبالتالي مش هيقدر يشارك في المسرحة.
لحد هنا الأمور كانت عادية، لكن لما حصلت حالة الجدل الأكبر واللي كان السبب فيها الناقد الفني طارق الشناوي، واللي أبدى رفضه بشكل واضح لتجسيد شخصية الشيخ الشعراوي على المسرح القومي، باعتباره واحد من الناس اللي كانوا بيعتبروا الفن حرام حسب رأي الشناوي، وإنه كان سبب في إن فنانين كتير اعتزلوا، أو توقفوا عن تقديم أنواع معينة من الأدور الفنية، فاللي هو ازاي يعني يكون الشعراوي عدو الفن ونعمل مسرحية عنه، والشناوي كان شايف إن الشعراوي ليه شعبية أكبر من عبدالحليم وأم كلثوم نفسهم، ولكن الدولة لازم يكون ليها توجه فكري واضح.
ومش الشناوي لوحده، لكن كمان الكاتبة والنائبة فريدة الشوباشي أعلنت عن رفضها تجسيد شحصية الشعراوي، وقدمت طلب إحاطة عن ضعف أداء وزارة الثقافة، عشان فكرة المسرحية دي.
من ناحيتها، وزيرة الثقافة الدكتورة نيفين الكيلاني، قالت إن الراحل الشيخ الشعرواي عليه «تحفظات كتير»، وإن الموضوع كان مجرد مقترح بعمل أمسيات رمضانية، وكان من ضمن الأسماء المقترحة الشيخ الشعراوي، ولكن مش مسرحية، ولم يتم أقرار الأسماء.
لكن تعالوا كدة نشوف رأي الفنان العالمي عمر الشريف في الشيخ الشعراوي، واللي ظهر في لقاء تلفزيوني قديم وهو بيحكي عن مدى حبه ليه، واتكلم عنه بطريقته البسيطة وقال «مفوتش مرة واحدة في حياتي وأنا في مصر مشفتش الشيخ الشعراوي، كنت بعبده، كان ممثل هايل، كان عاجبني الطريقة اللي بيفهم الناس اللي قاعدين قصاده ويفهمني أنا كمان وانا بتفرج عليه في التلفزيون».
الفنان عمر الشريف قال إن الشعراوي كان بيعلمه الدين واللغة العربية، وإنه كان بيقدر يوصل المعلومة للناس بطريقة بسيطة زي الفلاحين.
عمر الشريف كمان قال عن الشيخ الشعراوي إنه كان لذيذ، وكان أحسن ممثل في العالم وهو بيشرح كان بيعمل تمثيل، كان مسلي، كان أوقات بيضحكنا وهو بيشرح.
