ما خفنا منه حدث ! والذى كان المصرييين فى الكويت يحملون همه طبق ومن بعد القرار بترحيل 1815 مدرس من الكويت ..والإستغناء عن خدماتهم ،والكل تأكد إن تكويت الوظائف لم يكن مجرد كلام.
المصريين فى الكويت اللى لسه الدور مجاش عليهم ..قاعدين وحاطين إيديهم على قلبهم،واللى عرفوا بترحيلهم من المدرسين ميعرفوش مصيرهم إيه وهل هياخدوا مستحقاتهم ولا لا! وهياخدوها إزاى؟ تفاصيل كتير عن أزمة المدرسين فى الكويت تابعونا ..
مصير المصريين فى الكويت بقى غامض ،ومحدش عارف بكرة مخبيلهم إيه،إمتى هيترحلوا على مصر؟ ،
خاصة كل يوم قرارات جديدة من وزارة التعليم بالكويت عن الفئات المستثناه من قرارإنهاء الخدمة بالتعليم
طول الفترة اللى فاتت المصريين فى الكويت خايفين من اللحظة دى ،لحظة يتقالهم شكرا على خدماتكوا فى الكويت ومع السلامة .. لحد ما حصل اللى كان مخوفهم .. وهو إن وزارة التربية والتعليم إستغنت عن خدمات 1815 مدرس وافد فى مختلف التخصصات .. وده طبعا وفقا للى نشره موقع رؤيا الإخبارى
وده طبعا تطبيق لفكرة التكويت اللى الحكومة الكويتيتة بتسعى لها طول الفترة اللى فاتت، خاصة من بعد تصريحات أمين سر مجلس الامة الكويتى أسامة الشاهين عن منع إستقدام المصريين للكويت ،وشايف إن وجود المصريين ده فى خطر على المال العام وعلى النسبة السكانية هناك.
علشان كده قررت وزاره التربيه في الكويت انهاء خدمات 1815 مدرس بينهم مصريين، و 209 رؤساء أقسام وهيمشوا خلاص من الكويت على نهاية السنة الدراسية 2022/2023 وده حصل في 14 مادة تقريبا.
أحمد الوهيدة المتحدث الرسمي باسم وزارة التربية في الكويت ،أكد كمان إن القرار ده هو لخطة الإحلال والتكويت في عدد من التخصصات اللي العمالة الكويتية أولى بها ..
وعلشان يبان حسن نيتهم المتحدث الرسمى بإسم وزارة التعليم قال إن حكومة الكويت هتدفع كل مستحقات الموظفين اللي طلع قرار بإنهاء خدماتهم،وهيتم تقديم الشكر لهم.. خلى بالك إن ده مش إستقصاد للمصريين ..لا ده قرار لأغلب الوافدين مش المعلمين المصريين بس ،كل الحكاية إنهم فى الكويت عايزين يقضوا على البطالة الموجودة وبالعقل كده هم اولى بالشغل فى بلادهم ولا إنتوا رأيكوا إيه؟
بس إزاى وإن مش هيتم الإستغناء عن الخلايجة زى الكويتنين بالظبط؟ طيب أيه حكاية الفئات المستثناه من القرار ده..
بص يا سيدى أحمد الوهيدة في بيان صحفي، قال إن وزير التربية وزير التعليم العالي والبحث العلمي الدكتور حمد العدواني شدد على ضرورة إعطاء أبناء الكويتيات الأولوية في التعيين بعد الكويتيين، واستثناؤهم من أي قرارات إنهاء الخدمة.. وده حسب ما نشره موقع ال سي إن إن .
مش بس كده الجهات المختصة في الوزارة لما هتختار أسماء المعلمين الوافدين المشمولين بخطة الإحلال مش هيكون بينهم أي معلم من الفئات المستثناة.
الوهيدة أكد إن عملية الاختيار تمت وفق البيانات المتوفرة لدى الجهات المختصة بقطاع التعليم العام، وأنه بسبب تسجيل بيانات الهيئة التعليمية بجنسية المعلم، تم إدراج بعض أسماء أبناء الكويتيات ضمن الأسماء المشمولة بالإحلال.
كمان في حال ورود اسم أحد المعلمين من أبناء الكويتيات ضمن الكشوف يكون بسبب عدم تحديث البيانات لإن أغلبهم معاهم جنسيات محددة ، وفي حالة لو مش من أبناء الكويتيات هيتم التعامل معاهم على أساس جنسياتهم”، وده حسب البيان اللي نشرته الوكالة الكويتية.
الوهيدة أكد كمان إن أي مدرس من الفئات المستثناة وورد اسمه فى الكشوف، لازم يراجع مكتب الوكيل المساعد للتعليم العام بديوان عام الوزارة ،ويكون معاه صورة من جنسية الأم وشهادة الميلاد علشان يتم إلغاء أسمائهم من الكشوف فورا ..
طبعا الكويت أعلنت عن تنفيذ خطة تكويت الوظائف من السنة اللى فاتت، وقالوا إن هيتم التطبيق على 3 مراحل ، المرحلة الأولى بدأت من سبتمبر اللي فات وهتخلص على أول يوليو الجاي..فياترى مصير المصريين الباقيين هناك إيه؟ البعض بيقول إن الكويت متقدرش تستغنى عن الكفاءات المصرية فهل ممكن ترجع فى القرارت دى الأيام اللى جاية ولا اللى حصل حصل خلاص!
