أكد الرئيس عبد الفتاح السيسي:”الدولة حاجة تانية غير الكلام، في كل كلمة كامل الوزير قالها عن المشروعات اللي اتنفذت كانت موضوع نقاش وضغط ويجي كامل يجيب الدكتور مصطفى مدبولي ويضغطوا على علشان الفلوس، وكامل انتوا متعرفهوش عايز يخلص حاجته وأنا معاه بس منين بقى”.
وتابع خلال مؤتمر “حكاية وطن”:”أقول لوزير الإسكان مينفعش يتقدم طلب إسكان اجتماعي ونقدم للناس مش وعود لأ يبقى لازم نبنى للناس”.
ولفت:”بمناسبة الـ2 مليون وحدة سكنية الشاغرة اللي الدكتور عاصم الجزار وزير الإسكان اتكلم عليهم، انا بكلم أعضاء البرلمان ما لم يكون فيه قانون يخلي الناس تنسى ثقافة الخوف علي الوحدة اللى ممكن تديها لحد هتبقى الفكرة غير قابلة للنجاح، لأن اتشكل ثقافة الخوف علي الوحدة السكنية بسبب المحامين والقوانين والقضاء كانت بتقف عقبة عدم اطمئنان لصاحب الشقة أو البيت وبالتالي هو يفضل لا يبيعها أو يقفلها وميأجرهاش خوفا من عدم استعادتها أو عدم حصوله علي الإيجار، يبقى لازم يبقى فيه قانون قوي حاسم وسريع حتى لا نفقد الـ2 مليون شقة الشاغرة اللي قيمتهم حوالي تريليون جنيه لو الشقة بـ500 ألف جنيه، مش عايزين نفقد الفلوس دي ولا نفقد التسهيل للناس توفير الشقق، لازم النقطة يتم نقاشها بشكل كويس بما فيهم أعضاء الحوار الوطني لإن بيجي يقولوا تعالوا نخش نعمل نقاش في تغيير العلاقة ما بين المالك والمستأجر في الإيجارات القديمة يقوم الناس يقولك دي مكتسبات اوعى تقرب يا حبيبي الناس اللى عملت المكتسبات دي الله يرحمهم ماتوا من زمان واللى موجود دلوقتي أحفادهم طيب هما كانوا يشكلوا قد ايه في الكتلة السكانية اللى اتنفذ فيها القانون من 1962 مينفعش يستفادوا من الموضوع ده لمدى الحياة ولا لازم موضوع الايجار القديم ده ينتهي، أنا بقرأ في الجرايد واسمع يقولك مكتسبات والناس غلابة يا راجل ده الناس ماتت واللي بعدهم ماتوا ولسه انت ماسك في الموضوع، طيب حد يجيب مناقشة في الموضوع في البرلمان أو علي القنوات الحوارية، اللي انت عملته شكل عقبة حقيقية أمام استغلال 2 مليون وحدة قيمتهم تريليون جنيه طيب ده حرام اننا نفقد القيمة دي، ونسيب الشقق دي مقفولة”.
