يبحث الشباب الأن على أي مصدر للحصول على أموال بطريقة مشروعة تساعدهم على أعباء الحياة في ظل الظروف الاقتصادية الصعبة التي يمر بها العالم أجمع، وبالطبع تؤثر بشكل كبير على المواطن المصري، فماذا لو علمت أنه يوجد منحة للزواج قد تصل قيمتها إلى 18 ألف جنيه، فإن كنت تريد أن تعرف كيف يمكنك الحصول على تلك المنحة وما شروطها فما عليك إلا أن تتابعنا من خلال التقرير التالي:
طول عمرنا نسمع عن منحة دراسة، منحة شغل، لكن منحة جواز؟ لا دي جديدة بقى، وكمان اللي اعلنت عنها هيئة التأمينات الاجتماعية، يعني مضمونة 100%، وهتكون تبع قانون التأمينات والمعاشات الجديد اللي اقرته الوزارة سنة 2019
والقانون بينص على منح اعانات نقدية للبنات أو الأبناء أو الأخوات أو الإخوة بعد وفاة الأب، اللي بتتقطع المعاشات عنهم بعد الجواز..
وده لان تكاليف الجواز بقت غالية والاسعار كلها زادت..فتعتبر دي محاولة من الدولة انها تقدملهم يد العون، وتوفرلهم حياة كريمة، وتسهل عليهم الجواز
طب المنحة دي متاحة لمين بالظبط؟ ومدتها قد ايه؟
منحة الجواز بيستفيد منها 4 فئات، اول فئة البنت اللي بتاخد معاش والدها واسمه “منحة البنت”، والتانية للاخت اللي بتصرف معاش عن اخوها واسمها “منحة الاخت”
والتالتة بتبقى “منحة الابن” للولد اللي بيصرف معاش ابوه، والرابعة “منحة الاخ” بتتصرف للاخ اللي بيصرف عن اخوه او اخته..
بس خلي بالك لو مقدمتش على المنحة في خلال خمس سنين او 60 شهر، من تاريخ جوازك.. خلاص المنحة بتروح عليك
وحتى لو لسه معداش على جوازك 5 سنين، برضو من حقك تقدم وتاخد المنحة
والتقديم عليها خطواته سهلة، بتروح لهيئة التأمينات ومعاك صورة قسيمة الجواز الرسمي او العرفي، وصورة بطاقتك، وبتملي استمارة المنحة، وهيحولك على الجهة المختصة
وكدا تكون بدأت في إجراءات صرف المنحة
ومنحة الجواز للبنات اللي المعاش اتقطع بسبب جوازها، قيمتها بتحدد حسب ان ليكي اخوات بنات أو لا، يعني لو انتي الابنة الوحيدة، هتاخدي ثلثين المعاش مضروب في 12 شهر، اما لو كان عندك اخت كمان، هتاخدي 1500 جنيه مضروبين في 12 شهر، واختك هتاخد ربع المعاش
ونفس الكلام برضو مع الولد هتحسب المعاش اللي بتاخده مضروب في 12 شهر، يعني المنحة ممكن توصل لـ 18 ألف جنيه، لو انت بتاخد معاش 1500 جنيه، تخيل بقى لو بتاخد أكتر هتستفيد بمنحة أكتر.
واستلام المنحة النقدية، هيكون عن طريق البطاقات الائتمانية أو بطاقات ميزة، وبتصرف مرة واحدة في العمر، لكن اهم شرط في المنحة دي، انك متكونش صرفتها قبل كدا، ويكون ليك الحق في معاش المتوفي.
ولو البنت انفصلت عن جوزها، بترجع تاني تاخد معاش ابوها، بس مش هتاخد منحة الجواز لو اتجوزت تاني، لانها بتتصرف مرة واحدة بس.
يلا احسب انت ليك كام في المنحة، وروح قدم عليها وخلي الدولة تساعدك في ظروف المعيشة.
