في قرار جديد أعلنت الحكومة في السعودية عن منع التوظيف في 14 وظيفة لغير السعوديين في إطار خطة الدولة لتوطين الوظائف واللي هيبدأ العمل بها بالفعل من أول السنة الجديدة.
الوظائف دي اللي فيها فئة كبيرة بيشتغلوا فيها من المصريين في السعودية وبالتالي هيكونوا مهددين الفترة الجاية.. إيه هي الوظائف دي؟ والمصريين اللي شغالين فيها هيعملوا إيه؟.. تفاصيل كتيرة نكشفها في التقرير التالي:
خلال الساعات اللي فاتت أعلنت وزارة الموارد البشرية والتنمية الاجتماعية في السعودية، عن بداية تطبيق قرار التوطين على 14 وظيفة للتنفيذ الفعلي مع بداية السنة عشان الوظائف دي مش هيكون فيها غير السعوديين بس.. مش هيبقى في أي حد من الوافدين من أي جنسيات تانية مسموح لهم بالعمل فيها.
الوظائف دي اللي بيتشغل فيهم عدد كبير من المصريين في السعودية وهي الوظائف الخاصة بالنقل والشحن ومناديب التوصيل واللي بتكون من أكتر الوظائف طلبا للعمالة في المملكة وبالتالي قرار توطينها هيكون السبب في تهديد عدد كبير من الوافدين اللي بيشتغلوا فيها وبالأخص المصريين.
طيب إيه الوظائف دي؟
قرار وزارة الموارد البشرية والتنمية الاجتماعية في السعودية بمنع التوظيف شمل كل الوظائف الخاصة بأنشطة البريد ونقل الطرود في الـ14 وظيفة المتنوعة فيهم.
وهتكون الوظائف الممنوعة اللي يستهدفها القرار، وظائف خدمات التوصيل من الإنترنت يعني عمال الدليفري اللي شغالين في أي مواقع طلبات مختلفة، وكمان الموظفين اللي شغالين في نقل الطرود سواء المحلية او الدولية، وكمان منادين التوصيل في البريد السريع أو أنشطة نقل البريد والطرود المختلفة.
كمان من الوظائف اللي اتمنع فيها التوظيف لكل الوافدين، هي مناديب استلام وتسليم ونقل البعائث والطرود البريدية، ووظيفة إدارة الغرف البريدية، وكمان الوظائف الخاصة بخدمات المعالجة والتخزين للبعائث والطرود البريدية وإعادة توزيعها.. القرار شمل كل الوظائف في الخدمات اللوجستية البريدية وأنشطة شركات نقل البريد الخاصة، وكمان شملت كل وظائف البريد سواء خاصة أو عادي أو ممتاز.. بمعني أن أي وظيفة مندوب توصيل هتكون للسعوديين بس ولو اشتغلت فيها هتعرض نفسك لمخالفة والترحيل كمان.
مش بس كده لكن القرار شما التوطين بنسبة 100% لكل العمالة، وبنسبة 60% لوظائف المستوى الأول للإدارة العليا واللي هتدخل حيز التنفيذ مطلع سنة 2023.
طيب المصريين هناك هيعملوا إيه؟
المصريين اللي شغالين في الوظائف دي دلوقتي قدامهم حل واحد وهو البحث عن وظائف تاني لأن التوطين معناه ممنوع العمل فيها، لكن الحكومة السعودية استثنت من القرار عمال النظافة وعمال الشحن والتفريغ ودول هيبقى متاح لهم الشغل في السعودية الفترة الجاية.
