سيدات كثير حولنا سواء كانوا اخواتنا او أحد من أقاربنا، يعملون وعندما يتزوجوا ويولدوا لا يتمنكون من الحصول على أجازة للراحة، حتى في بعض الأحيان تتمكن السيدات من الحصول على أجازة ولكن بدون راتب، ولذلك فإن وزارة التضامن بنفسها سوف تصمن الحق للمرأة سواء من اجازة او من تعويض، عن طريق “منحة الولادة”، تابعونا لمعرفة التفاصيل عن هذه المنحة:
وزارة التضامن الاجتماعي من اكتر الوزارت اللي بتقدملنا خدمات فعلا بتبقى مفيدة لينا، وفئات كتير بتستفيد من مزاياها، ودايمًا بتيجي في الوقت المناسب.
عشان كدا خدمتها المرة دي للسيدات اللي بتشتغل في اي قطاع في مصر سواء عام او خاص، وفي الهيئات الاقتصادية، بتقدملهم منحة “الولادة”.
ودي منحة للسيدات اللي عندها تأمين اجتماعي، بس محتاجة انها تاخد اجازة وضع بعد الولادة، او تضمن حقها ان يبقى ليها دخل خلال فترة اجازتها.
واللي هتشترك فيها هتستفيد بأجازة وضع مدتها 3 شهور، مع 75% من قيمة اخر مرتب خدته قبل الولادة، او من اجر الاشتراك التأميني عليها، وده حسب قانون العمل.
لكن خلي بالك ان لازم يكون اشتراكك في التأمين عدى عليه 10 شهور او اكتر.ومنحة الولادة هتتصرفلك 3 مرات بس، طول ما انتي لسه في فترة التأمين، لان المنحة دي اللي هيصرفها صندوق التأمينات الاجتماعية.
طب دلوقتي لقيتي الشروط متطابقة معاكي وتأمينك عدي عليه 10 شهور، يبقى تبعتي للمكان اللي انتي شغالة فيه، وتقوليلهم انك عايزة تقدمي على منحة الولادة، وبتقدمي معاه صورتين من شهادة ميلاد ابنك، وشهادة طبية بتبين التاريخ اللي ولدتي فيه
والطلب ده هيتسلم لمكتب التأمينات الأجتماعية، مع قرار أجازة معتمد من جهة العمل، ووقتها المكتب المختص بيصرفك التعويض .عشان كدا دايما بنقول “العيل بيجي برزقه” هو جاي وجايبلك معاه اجازة وتعويض
بس اهم حاجة تعرفي حقك من قانون العمل، واولهم انه بيمنع اي صاحب عمل، انه يفصل السيدة اللي بتشتغل عنده في وقت اجازة وضعها، او انه يحرمها من التعويض عن مرتبها، او انه يطلب منك تنزلي تشتغلي في فترة اجازة الوضع
ولو لقيتي صاحب المكان اللي انتي شغالة فيه، بيمنعك من حقك الطبيعي، يبقى انتي كمان من حقك انك تقدمي فيه بلاغ، وقانون العمل هيجبلك حقك بالطريقة الصح
وبكدا انتي تكوني عرفتي حقوقك اللي وفرتهالك الوزارة، ودلوقتي جمعي الورق المطلوب وقدميه لمكان شغلك عشان تبدأي اجازتك، واحسبي بقى 75% من تأمينك يبقى كام، واستفيدي بيه، اللي اكيد هيساعدك في المصاريف حتى ولو بجزأ صغير
او ابعتي تفاصيل المنحة دي لأي واحدة تعرفيها لسه والدة وخليها تستفيد.
