كثير من النجوم والأسماء الكبيرة في الوسط الفني ورغم النجاح ال1ي حققوه والانفتاح ال1ي عاشوا فيه إلا إنهم في النهاية يرفضوا إن بناتهم أو ولادهم بشكل عام يشتغلوا في هذا المجال.
كل واحد منهم ليه أسبابه الخاصة، وأحيانا كتير منهم بيحاول يداري إجابته عشان ميزعلش زميلاته الفنانات مثلا من كلامه، إلا إن في منهم كان صريح وقال «أنا مش عايز بنتي تتباس»، ومنهم للي قال أنا راجل شرقي وغيره، يا ترى مين النجوم دول.. وأيه أسباباهم لرفض دخولا أبنائهم الوسط الفني؟
في حيرة بيقع فيها كتير من الفنانين وخصوصا الرجالة بقى لما بيكونوا في برنامج ويستألوا السؤال اللي بيتكرر كتير.. يا ترى هتخلي بنتك تدخل المجال الفني؟ والمشكلة إن هنا بيكون قدام حاجة من اتنين، إنه يقول اه هسيبها تدخل ودي مش كتير يجرؤوا عليها لأن بيستتبعها كلام عن القبلات والمشاهد الجريئة ورأيه فيها وكمان رد فعل جانب من الجمهور الشرقي، وفي ناس بتقول لأ، مش هخليهم يدخلوا، بس باردو بيقع قدام مشكلة تاني لأنه شغال في وسط شايف إنه مش مناسب لأولاده، فبيحاول بعضهم يرد بردود دبلوماسية عشان يتجنب الإحراج.
وأخيرا كان الفنان تامر عاشور واحد من النجوم اللي اتسألوا في الكلام ده في برنامج «حبر سري» وهل هيسمح لبنته إنها تدخل المجال الفني، وكان رده إنه لا مش هيسمح لها بدخول المجال، تامر عاشور عبر عن وجهة نظره الشخصية إنه رافض لدخول بنته المجال الفني، ولكن في النهاية قال إن دي حياتها الخاصة وهي تتحكم فيها بس هو من ناحيته هيكون رافض، والسبب ورا كدة إنه شايف إنه وسط متعب وفي سهر وهتسيب دراستها وهو مش عايز كدة.
لكن قبل تامر عاشور كان في نجوم كتير قالوا نفس الكلام لما اتزنقوا إنهم ردوا على السؤال ده، منهم الفنان ماجد المصري، واللي كان رده حاسم ف الموضوع ده، مرضيش يقول سبب غير إنه راجل شرقي، بالرغم من إن بنته ماهيتاب ناس قالوله إنها موهوبة ولازم تدخل مجال التمثيل لكن هو رافض ده تماما، وقال أنا بثق في الوسط الفني، ولكن أنا مرضاش دخوله لمراتي أو بنتي.
الفنان تامر حسني ورغم إنه نجم الجيل بقى إلا إنه رفض بشكل قاطع دخول بناته المجال الفني، وفوق كدة كمان لما كان متجوز بسمة بوسيل خلاها تبطل تغني، هو كان ليه رأي في الموضوع ده إن النجاح والشهرة بيتسببوا في ضغط كبير وكمان سببوله مشاكل كتير، وهو مش عايز بناته يتعرضوا لنفس الشيء.
محمد رمضان نمبر وان هو كمان قال إنه مستحيل يخلي بناته يدخلوا الوسط الفني ومجال التمثيل، وقال إنه بيفضلهم يشوفوا مجالات تاني ويتعلموا حاجات غير الفن، لأن الفن بياخد وقتهم كله ومش هيبقى عندهم مساحة يعملوا حاجة غيره.
الفنان مصطفى كامل، هو كمان واحد من النجوم اللي قرروا إن بناتهم ميدخلوش المجال الفني، وده بسبب اللي بيشوفه فيه من تجاوزات وعري وحاجات من دي، وقال إنه معندوش مشكلة إن بنته تدخل مجال الإعلام، ولكن التمثيل لأ، وقال باللفظ كدة : «مش هتدخل عالم التمثيل ولو على جثتي، حتى لو تزوجت وأصبحت على ذمة رجل آخر سأرفض».
هاني سلامة كمان واحد من الممثلين اللي منع بنته من دخول المجال الفني، ولكن هو مقالش على تجاوزات أو حاجة، ولكن هو في النهاية قال ده مجال مليان ضغط نفسي، وهو مش حابب إن بنته تتعرض لده في حياتها.
نيجي بقى للتقيلة، وهو الفنان عادل إمام، واللي رفض بشكل قاطع دخول بنته المجال الفني بالرغم من سماحه بدخول ولاده الاتنين رامي إمام ومحمد إمام للمجال الفني وكل واحد منهم نجم كبير دلوقتي سواء في الإخراج أو التمثيل، وبنشوف محمد بطل لكتير من الأعمال الفنية، ولكن جه عند سارة وقال لا مش ممكن.
ولكن عادل إمام كان عنده شجاعه إنه يعلن بشكل صريح عن سبب رفضه لإن بنته سارة تدخل المجال الفني وهو إنه مش عايز يشوف بنته في مشهد مع حد تاني بيبوسها وبعدين يقولها «الله البوسة دي حلوة أوي»، ومن المعروف إن عادل إمام من أكتر الممثلين اللي استخدموا القبلات في السينما المصرية ويمكن هو الأشهر في النقطة دي كمان.
