من يعرف رحلة المنتج محمد السبكي مع الوسط الفني سيجدها مليئة كواليس وأحداث كثيرة ، لكن ما يستغربه الناس دائمًا هو كيف تحول من جزار إلى أشهر منتج أفلام في مصر؟
طيب حد يعرف إن حياته الشخصية فيها أكتر من واحد ست بس المثير للجدل بقى إنه اتجوز واحدة كانت في الأصل راجل؟.. يلا بينا في الفيديو ده أقولكم الحكاية من طأطأ لسلامو عليكو.
المنتج محمد السبكي عمل خلطة كده في أفلامه لقت نجاح كبير عند الجمهور وبقى حرفيًا الساحة بتاعته وهو اللي شاكمها والجمهور بيدخل أفلامه وبيحقق إيرادات كبيرة جدًا.. هو اللي عمل أفلام مع أحمد زكي ونادية الجندي وليلى علوي وتامر حسني وعبلة كامل وأمير كرارة وأحمد السقا وفنانين كتير.. ده غير إن أخوه الحاج أحمد السبكي لسه بينتج لحد دلوقتي وأفلامه مسمعة مع محمد رمضان وعلي ربيع وفنانين كتير.. لكن الحياة الخاصة بتاعة محمد السبكي وراها حكايات كتير.
من جزار لمنتج
محمد السبكي كان عنده شغله قبل ما يدخل الوسط الفني وكانت شغلته الجزارة هما كام محل كده وهو وأخوه الحاج أحمد السبكي كانوا وارثين الشغلانة عن أبوهم حسن السبكي.. ومع الوقت أحمد فتح نادي فيديو كده على أده سنة 1985 فوق محل الجزارة بتاعهم في الدقي وعلطول محمد السبكي شاركه وعملوا شركة إنتاجية بقت من أكبر شركات الإنتاج في الشرق الأوسط.. وبعد فترة الاتنين انفصلوا عن بعض وكل واحد بقى ليه شركة وأفلام لوحده.
حياته وأهم أعماله
أحمد السبكي اتولد يوم 14 نوفمبر سنة 1953 في القاهرة وخد ليسانس حقوق من جامعة عين شمس ومعظم شغله كان من الطبقة المتوسطة اللي اتربى ونشأ في وسطيها واشتغل ضيف شرف في بعض أعماله الفنية.. واللي منها مستر كاراتيه وامرأة هزت عرش مصر وعمر وسلمى وشجيع السيما والرجل الثالث وحلّق حوش واللمبي والرغبة وبحلك وأنا كمان وخالتي فرنسا وسيد العاطفي ونور عيني وحرب كرموز وهروب اضطراري وجيم أوفر وأيظن وعقدة الخواجة وغيرهم.
خلاف المواطن برص
قبل ما المنتج محمد حسن رميزي ما يرحل عن دنيتنا بشوية كده حصل خلاف بينه وبين محمد السبكي وقتها كانت المشكلة بسبب فيلم اسمه المواطن برص.. السبكي طرح الفيلم في دور العرض ويدوب فترة والفيلم مجابش إيرادات غير 27 ألف جنيه قام محمد حسن رمزي رفعه من دور العرض وحط مكانه فيلم من إنتاجه اللي هو الجزيرة ليه وليه بقى يحصل كده.. وقتها الإعلامي تامر أمين قال هيصالحهم على بعض وجاب الاتنين ورمزي بيتكلم قال إنه قال للسبكي بلاش تنزل بالفيلم بتاعك دلوقتي وأجله انت منتج كبير وهتتذل.
قام السبكي اتعصب على رمزي وقاله نعم وهوب عمل حركة خارجة على الهوا وقاله انت عبيط أنا محدش يعرف يذلني واللي يذلني أدعكه تحت جزمتي والموضوع وصل لخناقة بينهم ومنها لساحات القضاء.
جوازات السبكي
محمد السبكي اتجوز 3 مرات منهم مراته الأولانية اللي لسه على ذمته لحد دلوقتي وخلف منها كمان وهي من خارج الوسط الفني.. والمرة التانية كانت جوازة من جوه الوسط وكانت من الفنانة عفاف رشاد اللي خلفت منه ابنهم عمر ودلوقتي بقى دكتور مخ وأعصاب في مستشفى القصر العيني لكن مع الوقت حصلت خلافات بينه وبين عفاف بسبب غيرتها عليه وانفصلوا.
لكن الجوازة التالتة دي كانت حكاية ووقتها الفنانة الجزائرية ياسمين نيار اللي معاها الجنسية السوسرية قالت سنة 2020 إنه جاب مأذون واتنين شهود وقالها هنتجوز بس طلع بيخدعها والسبكي أنكر الجوازة دي وشكل حظه طلع حلو عشان أصلًا ياسمين نيار اتقال إنها كانت في الأصل راجل وعملت العملية إياها وبقت واحدة ستْ.
