أحيانا نشاهد الفيلم أو المسلسل من باب الترفيه ولا نركز في أي عناصر فنية أخرى، ويمكن أن نشاهجه مرة والثانية ولا نلاحظ الأمر ولكن مواقع السوشيال ميديا بدأت تلفت الأنظار إلى تلك الأخطاء بل أنهم يتسابقوا من أجل توضيح الأخطاء التي ظهرت بالأعمال الفنية والتي سنوضح بعضها فيما يلي:
مش لازم تكون دارس حاجة لها علاقة بالفن والسينما والتصوير ،علشان تاخد بالك والدليل على ده اللى بيتعمل من الجمهور سواء على السوشيال ميديا أو براها . عندك مثلا في شهر رمضان حدث ولا حرج الناس كلها بقوا نقاد فن ،مش قاعدين لهم على السقطة واللقطة لا . حقيقى بقى في وعى عند الجمهور فى كل العناصر الفنية الكتيرة للعمل ده
الأخطاء دى موجودة في الجديد والقديم ،زى مثلا مسلسل أين قلبى بطولة الفنانة يسرا تفتكروا أي مشهد ؟ معقولة يا تامر إنت لسه منزلتش إنترنت على الجهاز جملة قالها واحد من قرايب يسرا لإبنها في المسلسل هو أصلا الإنترنت بينزل أو بيتحمل؟
واضح لإن الميديا بلاير كان الراعى الرسمى لكتير من المخرجين ،مفيش حد محبش أعمال الثنائى كريم عبد العزيز ومنى ذكى عارفين فيلم ليه خلتنى أحبك عمركوا لاحظتوا أي خطأ فنى فيه ؟ الخطأ ده كان في مشهد إنهم المفروض بيتكلموا فيديو كول على الإنترنت ولكن هو ظهر كأنه فيديو مسجل بدائى خالص.
نفس الخطأ اتكرر في فيلم 1000 مبرووك اللى كان بطولة الفنان أحمد حلمى وأخته كانت بتتكلم مع حبيبها اللى قام بدوره الفنان محمد فراج المفروض إنها بتكلمه على ياهو ولكن ظهروا في فيديو متسجل عادى.
كام مرة إتفرجكتوا على مسلسل ظل رجل ؟ هل لاحظتوا الفنان ياسر جلال وهو في الميكروباص وماسك الموبايل بالمقلوب؟
ومش بس كدة لا في مسلسل «ملوك الجدعنة»، لاحظ المتابعين في الحلقة الأولى خطأ في واحد من المشاهد، و ظهر واحد من الأبطال اللى بيجسد دور أمين شرطة برتبة ممتاز أول، وظهرت شارة الكتف عليها 4 شرائط مش 3 ،دى بقى عتبرها أمين شرطة برتبة ممتاز أول ؟ عديها الدنيا مش هتقف يعنى.
الأخطاء مظهرتش في المشاهد بس لا التترات كمان من أخطاء إملائية فى كتابة القائمين عليه هي زى مسلسل لحم غزال وضد الكسر.
في حاجة كده بلغة السينما إسمها راكور والحقيقة أعمال كتير كسرت الراكور ده ،زى فيلم قلب أمه لما كان شيكو وهشام ماجد بيتكلموا وقدامهم العصير اللى المفروض البنت هتدخل به بعد كدة ،في اللقطة اللى بعدها الترابيزة قدامهم كانت فاضية . والبنت دخلت وحطت العصير في نفس المكان الفاضى.
الأخطاء دى مكنتش في الأعمال الفنية الجديدة بس لكن كمان كانت موجودة في أفلام الزمن الجميل زى في فيلم حياة أو موت لما الطفلة كانت بتجيب ل باباها الدوا وولد قابلها وخبط فبها ووقع لها الإزازة فراجل حن عليها وساعدها في نقل الدوا في إزازة تانية وكانت مليانة للأخر ولكن في المشهد للى بعد كدة ظهرت نص الإزازة مليان بس.
وفيلم رجل فقد عقلة لما الفنان عادل إمام وقع وكان لابس فانيلة رقم 15 ظهر لاعب تانى لابس نفس الفانيلة بنفس الرقم.
دة بقى حكايته حكاية فاكرين فيلم بطل من ورق المفروض إن الفنان ممدوح عبد العليم بيقرى خبر في الجورنال عن نسف سيارة مدير بنك ولكن لو ركزنا في الخبر هنلاقيه خبر رياضى.
هيفضلوا لحد أمتى يستخفوا بعقول الجمهور؟ شاركونا تعليقاتكم وقولولنا لو لاحظتوا أخطاء في أعمال فنية تانية.
