أسرار خناقة ياسمين رئيس ودينا الشربيني وهل فيلم تامر حسني سبب الخلاف؟

الصحاب شكلهم عملوا خناقة جامدة وبعد ما كانوا لا يفارفوا بعض وقعوا في مشكلة مع بعض.. كلامي هنا عن خناقة حدثت بين الفنانة ياسمين رئيس والفنانة دينا الشربيني ولا أحد يعرف ماذا حدث بينهم.. هل في أزمة فعلاً أم ماذا حدث؟

يا ترى إيه حقيقة خناقة ياسمين رئيس ودينا الشربيني؟.. إزاي الاتنين كانوا أصحاب وعملوا كده في بعض؟ حقيقي مش هتصدق اللي حصل بينهم؟ هل فيلم تامر حسني السبب ورا اللي حصل؟.. خليكوا معايا في الفيديو ده هقولكم تفاصيل الحكاية.

كلنا عارفين صداقة ياسمين رئيس ودينا الشربيني وإنها من أحسن العلاقات في الوسط الفني وكل واحدة بتحتفل بعيد ميلاد التانية والحياة بينهم قوية جداً.. ومن يومين تلاتة كده ياسمين رئيس لفتت الأنظار ليها ببوست عن فنان مشهور ووقتها الكل قال دي عشان دينا الشربيني صاحبتها وعشان كده واقفة معاها.. لكن اللي بين ياسمين رئيس ودينا الشربيني دلوقتي مش زي اللي كان بينهم زمان وواضح إن الصداقة دي اتلخبطت شوية الفترة دي.. وعلشان كده عملنالكم الفيديو ده عشان ننور شوية تفاصيل كده مخطرتش على بال حد.

هل في خناقة؟

كتير أوي من الناس قالوا إن كلمة السر بين ياسمين رئيس والبوست اللي كتبته عن فنلن بيضرب إيرادات وسيناريوهات وشهادات.. فنانة صاحبتها الانتيم وهي محموقة عليها وإن الفنانة دي هي دينا الشربيني.. طبعاً الكلام ده منطقي بحكم الصداقة ما بينهم.. لكن يا جماعة لو بصينا شوية كده بنظرة منطقية بردوا فيلم تاج بقاله فترة معروض والناس كلها شافته وخد وقته وانتهى ليه مجاتش في عز عرضه واتكلمت ولو هي بتدافع لصاحبتها دينا عشان مشاهدها اتحجمت أو ظهورها مكانش أد مستوى نجوميتها طيب سكتت ليه كل ده هل كان في بينهم خناقة واتصالحوا دلوقتي ودينا الشربيني كلمتها عن اللي دايقها في الفيلم ده قامت طلعت اتكلمت.. يمكن.

تفاصيل اللي حصل

الغريبة بقى إن رغم الصداقة اللي الكل بيحلف بيها بين ياسمين رئيس ودينا الشربيني فلازم تعرفوا يا جماعة إن دينا عاملة أنفولو لياسمين رئيس من حسابها على إنستجرام طيب إيه بقى وليه كتبت كده.. وده اللي بيفسر إن العلاقة بين ياسمين ودينا مش متظبطة اليومين دول ويمكن بدأوا يرجعوا دلوقتي والأمور تبقى أحسن وزي الأول واتكلموا من تاني وعشان كده كتبت بوست زي ده تدعمها فيه.. لكن بردوا ليه الأنفولو؟ أسئلة كتير دايرة ومحدش عارف حاجة ولازم ياسمين تتكلم أو دينا عشان نشوف في إيه بينهم.

اللي حابين نقوله وفيهم الخلاصة إن غالباً في مشكلة حصلت بين ياسمين رئيس ودينا الشربيني وواضح إن دينا مش غلطانة وخدت على خاطرها من ياسمين وعملت ليها أنفولو.. والدليل على كده إن ياسمين لسه بتتابع دينا الشربيني وبتحاول تصالحها.. كمان البوست ده جاي متأخر في محاولة من ياسمين عشان تقرب من دينا تاني وتقولها إنها بتدعمها بس الفترة اللي فاتت مكانوش بيتواصلوا ومكانتش عارفة حاجة عن اللي حصل.. ربنا يوفقهم ويرجعوا أصدقاء زي ما كانوا وأحسن كمان.

والجمهور كان لاحظ بداية الصداقة القوية بين ياسمين رئيس ودينا الشربيني سنة 2018 لما الاتنين نشروا مقطع فيديو وهما بيرقصوا على نغمة “كيكي” kiki challenge واللي اشتهرت جداً بين الجمهور واتحولت الرقصة لترند على مواقع التواصل في العالم كله وقلدها ملايين الناس في العالم ومنهم فنانين ونجوم.

تفتكروا ياسمين رئيس كتبت البوست ده عشان تراضي دينا الشربيني وفي بينهم خناقة فعلاً ولا إيه رأيكم؟ اكتبولي في التعليقات.