الفنان عمرو دياب ورجل الأعمال أحمد أبو هشيمة بينهم صداقة ممتدة وعمرها حوالي 20 سنة ، لكن في فترة من الفترات اهتزت هذه الصداقة وتوترت علاقتهم ببعض لكن في الفترة الأخيرة رجعت المية لمجاريها والحياة من جديد وبقوا بيتقابلوا كتير.. طيب هما ستاتهم والغيرة اللي حصلت ليها علاقة بالموضوع ده؟
طيب إزاي اتصالحوا وإيه المفاجأة اللي كانت مستنياهم في العيد وهما في فرنسا سوا؟.. وإيه اللي عملته الفنانة دينا الشربيني مع عمرو دياب لما كانت مرتبطة بيه بسبب أبو هشيمة؟ ويا ترى الفنانة ياسمين صبري ليها علاقة بالقصة دي ولا لأ؟
طبعًا الصداقة القوية مش بتتهز مهما حصل لكن اللي حصل بين عمرو دياب وأحمد أبو هشيمة سببه غيرة ستات وفي الآخر الستات اختفوا من حياة الاتنين والصداقة انتصرت والعلاقة القوية رجعت أقوى من الأول وبقى في بين الهضبة وأبو هشيمة سفريات وترتيبات لمواعيد خاصة ومقابلات لأصدقاء مشتركين وكلهم الفترة دي منفضين للستات في حياتهم وعايشين اللحظة على الآخر.. حقهم يستمتعوا بوقتهم ويكون ليهم حياة خاصة بعيد عن ارتباطهم بالستات.. لكن اللي ملاحظينه في الفترة اللي فاتت إن الاتنين بقوا يتقابلوا كتير عكس ما كان كل واحد فيهم مرتبط بواحدة.
العلاقة اتدهورت
حد يتخيل إن الصحاب ياخدوا أجازة من بعض فترة طويلة وكمان يلغوا صداقة بعض على إنستجرام؟.. أيوه ده اللي حصل بالظبط واللي اتقال وقتها إن في خلافات بينهم سببها ستاتهم اللي هما دينا الشربيني حبيبة عمرو دياب السابقة وياسمين صبري مرات أبو هشيمة السابقة.. وبقى كل واحد في ناحية لا بيروحوا يقضوا الأجازة سوا ولا يتقابلوا مع بعض في الصيف ولا تجمعهم مناسبات زي ما كان بيحصل قبل ما كل واحد فيهم تدخل حياته واحدة.. طيب إيه الجديد؟.. كل ده اختفى بمجرد ما الستات اختفوا من حياتهم.
سرْ الخلافات
الموضوع بدأ من عند ياسمين صبري واتقال إنها بتتهم الفنانة دينا الشربيني إنها متجوزتش عمرو دياب وكانت مرتبطة بيه وعايشين مع بعض من غير جواز واتكلمت عنها بطريقة مش كويسة وده كله عشان الهضبة مقالش بشكل رسمي إنه متجوز دينا.. بس الطبيعي كل واحد حرْ ويمكن متجوزين ومقالوش ومش عاوزين يتكلموا في خصوصياتهم بس الكلام اللي اتردد ده ضايق دينا وعمرو وحصل خلاف بين أبو هشيمة والهضبة.
الموضوع مخلصش لحد هنا.. لأ دي دينا قعدت تزن على عمرو دياب إنه يعلن جوازهم ويبقى الموضوع رسمي بعني بالبلدي دي تخلي كل واحد يحط لسانه في بوقه.. وطبعًا كان معاها حق وقتها عشان ريهام حجاج اتجوزت رجل الأعمال محمد حلاوة وأعلنوا عادي وكمان درة اتجوزت رجل الأعمال هاني سعد وأعلنوا.. وكمان أبو هشيمة اتجوز ياسمين صبري وأعلن عادي وقال إنه لما بيتجوز بيقول عادي وبردوا مش بيتكلم في خصوصياته أومال بقى دينا اللي على راسها ريشة وعمرو يتحكم فيها؟.. وهنا بقى كانت بداية النهاية للعلاقة دي وانتهت كل حاجة بينهم.. وعلى الناحية التانية بردوا ياسمين انفصلت عن أبو هشيمة وانتهت علاقتهم ببعض بعد سنتين جواز.
فرنسا تجمعنا
كان الطبيعي بعد كل اللي حصل ده إن عمرو دياب وأحمد أبو هشيمة يثبتوا إن علاقتهم ببعض مش هتتهز مهما حصل ويمكن يحصل شوية حاجات كده في النص لكن اللي في القلب زي ما هو وهيفضلوا صحاب.. ورغم إن الاتنين ما اتكلموش عن الخلاف اللي بينهم وإذا كانت غيرة الستات هي السبب في اللي حصل ولا إيه.. لكن ردهم كان عملي جدًا ومقابلاتهم دلوقتي بقت كتير.. ومن قريب شوفناهم سوا في مناسبة كان بطلها الهضبة وهو بيفتح مشروعه الجديد في الإمارات.. وحتى كانوا لابسين ساعات زي بعض واتصوروا والحياة جميلة خالص.
وواضح كده إن الموضوع مش بس مناسبات وبس ده كمان قضوا أجازة عيد الأضحى سوا واتقابلوا في فرنسا وكان بينهم أصدقاء مشتركين كمان.. اتصوروا وعاشوا اللحظات الجميلة اللي بين الصحاب وكمان في مفاجأة كانت مستناهم في فرنسا والجمهور اتفاجئ إن في نجم كورة كان معاهم وده يبقى حارس مرمى منتخب المغرب ياسين بونو اللي اتألق مع منتخب بلده وعمل إنجاز كبير وحقق المركز الرابع على العالم في بطولة كأس العالم اللي استضافتها قطر في 2022.
تفتكروا بقى غيرة الستات كانت السبب في هزة العلاقة بين عمرو دياب وأحمد أبو هشيمة ولا في حاجة تانية والستات ملهاش دعوة وهيطلعوا مظلومين في الآخر؟
