استعراض محمد رمضان بالعربيات التي لديه وضح أنه أمر بسيط مما يمتلكه..فالقصر الخاص به يشبه الخيال قد يكون صدمة لمن يراه بسبب ما يحتويه.
عنده ملعب كامل جنب القصر علطول وحمام السباحة بياخد فيه حجرين شيشة وبيطلع يستجم في الشمس وكل حاجة جوه القصر بالدهب.. مستنيين إيه يلا بينا ناخد جولة مع بعض في التقرير التالي:
اللي معروف عن الفنان محمد رمضان إنه بيستعرض عربياته عشان هما كتير حبتين تلاتة ده غير اللبس والإكسسوارات والدهب والناس كمان تعرف الفلوس اللي عنده والذي منه.. لكن هو عايش في أفخم مكان ممكن تتخيلوه عامل حتة قصر تحفة معظم اللي فيه عامله بالدهب وحاطط شيشة بياخد فيها نفسين وهو جوه حمام السباحة ومش بس كده ده عنده ملعب كبير جدًا وشكل كده كل تمريناته فيه وطبعًا أهله بيزوروه وهو بيستقبلهم أحسن استقبال فيه وكمان باباه بيحب يروح يقعد معاه باستمرار عشان يشوف أحفاده ويتصور معاهم.. وطبعًا محمود رمضان أخو محمد رمضان من أكتر الناس اللي بتكون موجودة معاه في القصر ده بحكم طبيعة شغله لأنه بيدير أعماله.. وكل ده هتشوفوه معايا.
حياة استعراضية
محمد رمضان بقى ماركة مسجلة في الاستعراض يعني طيارات تلاقي عربيات تلاقي وتليفونات دهب ولبس من أغلى الماركات وإكسسوارات وحيوانات عشان هو بيحب الأسود والكلاب.
والعيشة شكلها مرتاحة على الآخر ودولارات في البنك موجودة وفلوس في الخزنة جوه قصره بردوا موجودة وكله عليه حراسة وبودي جارادات بياكلوا عيش وفاتحين بيوتهم من ورا الشغل معاه.
ربنا يزيده طبعًا لكن الجديد بقى هو القصر اللي عايش فيه حاجة كده فوق الخيال وشكله اختار كل حاجة بنفسه عشان كل التصميمات تحسها مدروسة صح وكل حاجة معمولة على هوه زي ما بيقولوا.
قصر فاخر
تدخل القصر تلاقي في حاجات كتير كده بتقابلك عشان توصل للمكان اللي انت هتقعد فيه.. يعني تحب تقعد في الجنينة شوية ولا تاخدلك غُطس ولا إيه رأيك تعمل تمرينة في السريع كده ولا تحب تقعد في الشمس شويتين.. كل ده موجود قبل ما تدخل تشوف الخيال جوه بقى وانت وذوقك.
أهو ده قصر نمبر وان عنده جنينة كبيرة جدًا عشان لو حب يخرج من جوه يقعد بره.. وكمان القصر متحاوط بملعب كامل فيه كل حاجة ممكن تتخيلها.
محمد رمضان نفسه بيلعب فيه كورة وبيتمرن كمان.. وأول ما تخرج من جوه القصر عامل قعدة كده بكام كرسي عشان اللي يحب يشوف الشمس ويشرب أي حاجة.
وكمان هتلاقي حمام سباحة شيك جدًا.. ورمضان حاطط عليه شيشة وينزل ياخد غطسين كده ويطلع ياخد نفسين شيشة ويكمل.. ده غير كمان إنه عنده أوضة خاصة باللبس بتاعه لوحده.. وعنده جراج مخصوص بيركب فيه العربيات بتاعته.
ليه كل حاجة بالدهب؟
لما تاخد جولة جوه قصر محمد رمضان هتلاقي كل حاجة تقريبًا بالدهب وهو شخصيته كده بيحب الدهب جدًا ده مرة جاله أيفون هدية كان مطلي بمية الدهب عشان صاحبه اللي جابوه هدية ليه عارف هو بيحب إيه.. ده غير إنه قال إنه جاب قبل كده معجون أسنان معمول من مية الدهب وطبعًا مش بعيد عليه يعمل كل حاجة في قصره بالدهب.
وجوه القصر مسيطر الألوان الترابية على المكان وكمان الأبيض والرمادي ده غير الإكسسوارات الفخمة والأنيقة والمقتنيات اللي بالدهب وكمان الآثاث اللي جوه القصر بتاعه متطعم بالدهب يعني كل حاجة معمولة بالمسطرة زي ما بيقولوا.. وهو كمان عمل فيديوهات ليه من جوه قصره.
