هو واحد من النجوم الذين قدروا يفرضوا نفسهم على الساحة الفنية خلال السنين الأخيرة، كان يعمل منذ سنوات دن أن يترك بصمة.
ولكن في آخر 3 أو 4 سنين نط وبقى من نجوم الصف الأول، وبقت تتعمل الأعمال على اسمه، والأدوار تتفصل عليه، عنده مواصفات النجم، وزيادة شوية كمان، ودلوقتي بيتقارن بالإمبراطور أحمد زكي.. هو أحمد العوضي
كتير من النجوم بيتقارنوا بالفنان أحمد زكي، كبير وصغير وزمان ودلوقتي، لأن الإمبراطور الراحل تحول في التمثيل لإنه يكون وحدة قياس، فكرة إنك تكون زي أحمد زكي دي معناها إنك ممثل جامد جدا، ومن بين النجوم دول مثلا الفنان عمرو سعد وخصوصا بعد دوره في فيلم «دكان شحاتة» والفنان محمد رمضان، خصوصا إن هو قلد محمد رمضان زمان، ومؤخرا أحمد داش، وده ظهر لما الفنانة أروى جودة في واحدة من الحفلات قالت ده أحمد زكي اللي جاي.
الفنان أحمد العوضي طبعا بيشارك في الموسم الرمضاني الحالي من خلال مسلسل «ضرب نار» واللي معاه في بطولته الفنانة ياسمين عبدالعزيز، والعوضي بيعمل هنا دور «جارب أبو شديد» شاب من الصعيد بيلاقي نفسه في موقف تار، فبيطر إنه يسيب البلد ويسافر عشان يقدر يعيش، ويبعد عن المشاكل، وهناك بيقابل بقى ياسمين عبدالعزيز، عشان الأحداث تاخد طريق تاني.
العوضي بيقدم دور كبير ومميز جدا، وخلينا نقول إنه يمكن أعلى مستوى تمثيلي قدر يوصله من وقت ما بقى من نجوم الصف الأول، طريقة كلامه وانفعالاته والغضب اللي قدر يظهر على ملامحه وهو بيجسد شخصية صعيدي دماغه ناشفة ومبينحنيش، ومتربي على إنه يكون ناشف وصلب والظروف متقهرهوش، كل ده خلانا نشوف كراكتر مميز جدا للعوضي.
ولكن كمان اللي خلا بعض الناس تشوف إن العوضي بيقلد أحمد زكي، يمكن هو اختيار اللبس، وهو لافف كوفية بيضا حوالين رقبته، على البلوفر الأسود، وباردو فكرة حبهم للصقور، لأن أحمد زكي في فيلم الهروب كان محب للصقور باردو، وجابر أبو شديد في ضرب نار كمان بيصطاد صقور.
لكن على مستوى الأداء التمثيلي، فبالتأكيد اللي اتفرج على أحمد زكي واتفرج على أحد العوضي، هيعرف بشكل واضح إن الاتنين مش متشابهين على مستوى الأداء في التمثيل، أو حتى الملامح والبنية الجسدية، وإن كان وجه الشبه ما بينهم هو في طريقة الكلام والملابس، وده غالبا راجع لتشبع العوضي نفسه بدور أحمد زكي في فيلم الهروب، للدرجة اللي خلته مجرد ما يفكر في ملامح شخصية جابر أبو شديد، عقله راح تلقائيا لنفس استايل أحمد زكي وإنه أفضل شكل ممكن.
الفنان أحمد العوضي في أول تعليق ليه على الموضوع ده قال إنه شرف لأي حد التشبه بالفنان أحمد زكي، لأنه أيقونة كبيرة وكلنا بنفتخر بيه، وأكد كمان إن الموضوع كان مجرد صدفه، ويمكن السبب في ده يرجع لإن الفنان أحمد زكي من أفضل الناس اللي قدموا دور الصعيدي، بعد فيلمه الرائع الهروب، واللي بيعتبر من روائع السينما، وعايش في ذاكرة الجمهور.
