قلق وحكايات وقصص وحوارات تسبب بها مسلسل جعفر العمدة والذي يعد من أنجح الاعمال وأكثرها مشاهدة خلال موسم درامام رمضان، فما بين مشاهد يتم تصويرها ونهاية يتم تغييرها، وخلافات بين الفنانيين ، وصل الأمر إلى تغيير القوانين ، تابعونا لمعرفة التفاصيل:
احنا مبقاش ورانا غير مسلسل جعفر العمدة ومحمد رمضان وحكايات وداد واللي عملته وداد.. فاكرين مشهد جواز وداد من شوقي فتح الله.. والمفاجأة اللي مكنش حد يتوقعها دي؟.. مش عيلة جعفر بس اللي حصلها صدمة.. المجتمع كله عرف قضية وأزمة موجودة ومكنش حد يسمع عنها حاجة ولا بيناقشها.
مسلسل جعفر العمدة اللي ألفه المخرج محمد سمي.. عامل حالة جدل كبيرة من أول يوم في رمضان.. بالقصة والحكاية والأبطال والتفاصيل والإيفيهات ومشاهد الأكشن.. وكمان بأزمة قضية الخلع بتاعت وداد.
طلع إن اللي عملته وداد في سيد العمدة ده له اسم معروف في الأوساط القانونية.. وهو “الخلع الأمريكاني”.. ودي حالة بتلجأ فيها الزوجة لرفع قضية خلع وبيصدر حكم لصالحها.. من غير ما الزوج بيعرف.
ستات كتير بتعمل موضوع الخلع الأمريكاني ده.. بتبلغ الجهات المسئولة بعنوان غلط للزوج.. فا مش بيروح له الإخطار بتاع القضية.. ويوم الجلسة بيغيب الزوج فا القاضي بيحكم بالخلع.. وهو ولا عارف أي حاجة.. وده اللي عملته وداد.. لما قالتله أنا خلعتك يا سيد من 7 شهور.
الموضوع ده جنن الناس خالص.. وده خلى البرلمان كمان يتحرك بسرعة عشان يعدل قانون الخلع.. بحيث يضمن حق الزوج في الدفاع عن نفسه قدام القاضي.
كل ده حصل بعد النجاح الكبير اللي حققه جعفر العمدة.. مبقاش مجرد مسلسل بنتفرج عليه بعد الفطار.. لأ ده قصة كبيرة وحكاية.. وبيغير أفكار وعادات.. وبيغير قوانين كمان.. وهو اللي شجع عضو برلماني إنه يقدم طلب إحاطة لرئيس مجلس النواب عشان مناقشة موضوع الخلع الأمريكاني.
النائب ده طالب بضرورة وضع إجراءات صارمة في قضايا الخلع.. وتعديل القانون عشان الخلع يبقى بعلم الزوج.. ويكون قدامه فرصة يقف هو أو محاميه قدام الفاضي ويدافع عن نفسه.. عشان لما القاضي يحكم يبقى عارف كل حاجة الأول.
جوري بكر لما اتعرض عليها دور وداد من المخرج محمد سامي كانت فاكرة إنه مساحة صغيرة.. ومش هتبقى مؤثرة أوي في الأحداث.. إنما النهارده وهي السبب في تغيير قوانين.. وتقديم طلب إحاطة في البرلمان.. مش مصدقة نفسها يا جماعة والله
وزي مافي ستات كتير بيحصلهم مشاكل بسبب قوانين الأحوال الشخصية والأضرار اللي بتحصل للست المطلقة أو الأرملة اللي بتقدم معاناتها منى زكي في تحت الوصاية.. في رجالة برضه بيتخرب بيوتها لمجرد إن ستاتهم مش بيراعوا العشرة
فكرة إن الدراما بتغير قوانين دي عملتها السنة اللي فاتت برضه نيللي كريم في مسلسل فاتن أمل حربي.. وميرفت أمين في فيلم “آسفة أرفض الطلاق”.. وغيرها وغيرها من الأعمال الدرامية والسينمائية اللي فعلا بتغير الواقع .
