لا أحد يعرفه إلا بـ بهاء جوز الخبرة ،وبـمشاهد تعد على أصابع اليد قدر يعلق مع الجمهور،ويمكن كان من أسباب نجاح فيلم التجربة الدنماركية وقتها وحتى الآن
طلع كومبارس صامت فى 3 مشاهد بس ..بأداء توتو خالص وحركات إنثوية ضحك الجمهور! وبقى إيفيه بين الناس ..وبقى الحاضر الغايب،فجأة إختفى ومفيش حد يعرف هو فين وبيعمل إيه دلوقتى فى حياته !والكل بيسأل بهاء جوز الخبرة فى التجربة الدنماركية راح فين!
مفيش حد يقدر ينكر ولا يقول تلت التلاتة كام على الدور اللى قدمه فى التجربة الدنماركية ..وسبحان الله رغم إختفاءه ده إلا إنه معلق بمشاهده القليلة دى وبقوا يتفكروه زى ما بيفتكروا لوسى بن طنط فكيهة فى فيلم إشاعة حب ،وريكو فى البحث عن الفضيحة!
بهاء جوز الخبرة عمل الدور ده وفجأة فص ملح وداب..لا حد يعرفه ولا شارك فى أى عمل فنى تانى ،حتى لو قابلته فى الشارع ولا ظهر فى أى عمل دلوقتى مش هتعرفه ..شكله إتقلب خالص 180 درجة!
إسمه الحقيقى”خالد شبل” وقت تصوير الفيلم كان عنده 24 سنة ،هو مكانش من فريق عمل الفيلم خالص ..وقال فى تصريحات سابقة له :زعلت جدا إني مش هشتغل مع الأستاذ، وبعد فترة كلمني الزعيم قال لي: تحب تشتغل معايا، قلتله طبعا، قال لي: هتعمل دور العريس، عندك تصوير بعد يومين في وزارة الشباب..
خالد بيقول إنه راح فعلا وخد السيناريو وقلب الشخصية مفيش ليها أي كلام، فضلت أكثر من ساعة في حمام الوزارة بحاول أشوف ملامح للشخصية لحد ما لفت نظري جملة الزعيم (هو بهاء ده ميعرفش يعمل حاجة لوحده أبدا)، ساعتها قدرت أحدد ملامح للشخصية دي من تصرفات وحركته..
الغريب إن كان من ضمن ال3 مشاهد دول فى مشهد هيتكلم فيه .لكن هو طلب من الزعيم يحذفهم فإستغرب جدا وقاله أول مرة طول مشوارى الفنى حد يطلب منى حذف كلماته من العمل، واستجاب له .
ده كان أخر دور يقدمه خالد شبل فى التمثيل وبعدها سافر أمريكا ،لإنه حسن إنه مش لاقى نفسه ومحققش الشهرة اللى عايزها ..سبحان الله الفيلم إتعرض فى 2004 ووقتها مكانش فيه سوشيال ميديا زى دلوقتى ،ومكانش خالد مصدق أصدقائه لما يقولوله إنه كسر الدنيا بدوره ..
خالد إستقر فى أمريكا ،وإتجوز وخلف وغير مجال شغله خالص أسس شركة مقاولات تتكفل بتجديد البيوت القديمة، ورغم أن الشركة كانت حالتها كويسة إلا أن الأزمة المالية اللى حصلت فى 2017، أثرت بشكل كبير على سوق العقارات، وخسر كتير ، فدور على حاجة تانية ..وقرر فى 2020يرجع مصر،وكتب على حسابه الشخصى أنه بيحاول يرجع للتمثيل لكن “ماحدش عايز يشغله”.
لدرجة إن طلب من تقيب الفنانين اشرف ذكى إنه يرجع ويكمل دراسته ،وهو رحب الحقيقة به جدا ،كمان الفنان خالد سرحان نشر فيديو له وهو بيمثل نفس مشهده فى التجربة الدنماركية علشان يفكر الناس به..
حاول إنه يثير الجدل الفترة الأخيرة فنشر على صفحته الشخية طيب ايه رأيكم بقى أن الراجل مش ملزم يتجوز ست واحدة بس، يلا خليها تولع..الجمهور قالك شوف مين بيتكلم وإفتكروا دوره فى بهاء جوز الخبرة!
قالوا كمان إنه فى صلة قرابة بينه وبين الفنان “محمود حجازى ” علشان يعنى الشبه اللى بينهم..لكن دى كانت شائعات..
لكن هل أول أعماله كانت مع الزعيم كده مرة واحدة؟إزاى قدر يوصل !خالد بدأ مسيرته مع مجال التمثيل بدى من وهو فى ثانوى ما إنضم لفريق التمثيل بالمدرسة، لحد ما حاول يدخل معهد الفنون المسرحية، “في الفترة دى المعهد مكانش بيقبل الدبلومات وهو كنت خريج مدرسة ثانوي صناعي”..
قرر خالد يدور على شغفه فى حتة تانية زى مسرح قصور الثقافة وشارك معهم في أدوار مختلفة ..حظه كان حلو معهد الفنون المسرحية سمح الدبلومات الالتحاق.. ودخل المعهد فعلا..وهو في المعهد عمل مسرحيات كتير جدا.. زي وداعا يا بكوات مع فاروق الفيشاوي.. وفي مسلسل الكومي كان طالع بدور ابنه.
بالصدفة لقي ورقة متعلقة في المعهد كانت وش الهنا عليه.. ورشه مسرحية عايزة وجوه شابه تشارك مع الزعيم
فعلا شارك ونجح فى اجتياز اختبارات الورشة وشارك مع نجل الزعيم في مسرحية “جزيرة القرع”، “المسرحية حققت نجاحات كبيرة، و عادل إمام حضر العرض أكتر من 5 مرات”.
وهنا كانت المفاجأة بعد المسرحية دى بشهر تقريبا إتفاجئ بتليفون بالظبط كده! من مدير الزعيم ،بيقوله معاد بروفة للمشاركة في عمل أمام الزعيم،هو مصدقتش نفسه من الفرحة معقول هيقف قدام عادل إمام”، ويشارك في مسرحية “بودي جارد”.
شارك مع الزعيم كمان فى فيلم أمير الظلام ،وقدم دور واحد من المكفوفين اللى عاشوا مع الطيار الكفيف في دار الرعاية..
ومن بعدها جه التجربة الدنماركية وشوفناه فى بهاء جوز الخبرة!
تحبوا تشوفوه فى أعمال جديدة الفترة الجاية ؟هل شايفين إنه موهوب ويستحق ياخد فرصته؟ولا دور بهاء كان أى حد ممكن يقدمه ومش قصة يعنى؟ شاركونا فى التعليقات.
