أحمد الفيشاوي، شاب هيستريا،قلبه أبيض.. وجسمه يغطيه التاتو، ظهر بالتاتو في المصيف وظهر به أيضا في العمره، ليس هذا فقط بل أنه ظهر وهو يبكي بشدة خلال أداء مناسك العمرة، حتى ان البعض قال أنه سوف يتوب والبعض الآخر انتقد ظهور بالتاتو في العمرة.
زي ما قولناكم هو شاب هيستريا بالليل يقعد على كافيهات الدقي وبعدها يظهر للجمهور مرة على سجادة الصلاة ومرة بالسبحة والطاقية وبعدها يعمل عمرة مرتين ورا بعض.. والكلام كله اليومين دول على توبة أحمد الفيشاوي من الفن وسنيه ومحدش عارف الحقيقة فين؟ هو ممكن يعتزل فعلًا ويقدم برنامج ديني ولا الكلام ده بعيد عليه أصل ناس كتير شايفاه الشاب الروش بتاع الوشم والهزار والفرفشة.
نشأته في بيت فني
أحمد الفيشاوي معروف إن نشأته كانت في بيت فني أبوه يبقى نجم السينما فاروق الفيشاوي ومامته تبقى نجمة السينما والتلفزيون سمية الألفي.. بيقولوا عنه إنه ضهرة اتكسر بعد رحيل أبوه وأنتيمه يبقى الشقيري ومعز مسعود لكن عمرو خالد تخلى عنه.. هو عمل فيلم من قريب والناس بتقول عليه حلو بس الكلام الأكتر عن توبته وإنه هيبعد عن الفن أصله لسه عامل عمرة قريب ليه يكرر الموضوع تاني علطول كده والاتنين كانوا بالوشوم والحكاية رايحة جاية ومحدش عارف اللي هيحصل إيه.
عمرتين ورا بعض
صور الفنان أحمد الفيشاوي على حسابه في إنستجرام واللي نشرها من كام ساعة وهو بيعمل عمرة تاني خلته بقى تريند والناس كلها عمالة تتكلم عنه ومش عارفين خطوته الجاية إيه أصله رايح جاي شوية يلتزم وشوية يعمل فيلم وشايفينه عنده داء نفسي ولازم يتعالج.. والكلام الأكتر على موضوع العمرة بالوشم وده يصح ولا ميصحش وجدل وكلام كتير وفي النهاية الفيشاوي بيعمل اللي هو عاوزه.. وقال حتى عمري القادم إن شاء الله.. وشكله حب العمرة من أول مرة وعشان كده عملها تاني وهيعملها علطول وتعليقه ده بقى عمل قلبان وإنه خلاص ناوي على التوبة.
طليقته فضحته
بس محدش ينسى إن ندى الكامل طليقة أحمد الفيشاوي مش هتسيبه في حاله ولو تاب وعمل برنامج ديني زي ما اتقال مش هتسيبه في حاله وعندها استعداد تفرشله الملاية وتسيحله وتقول أكتر من اللي قالته عليه أصلها كانت شايفاه بتاع ستات وبينزل الكافيهات ياخد الخلايجة ويصاحبهم وكمان قالت إنها مستحيل ترجعله أصلها شافت منه بلاوي وكمان هي شايفة إنه ملوش في موضوع التوبة وإنه يبعد عن الفن دي أصل تاريخه كله هي عارفاه.. لكن بردوا محدش يقدر يقول هيعمل إيه وخطوته إيه عشان ربنا غفور رحيم وأول ما بيريد للإنسان الهداية بيدله على الطريق.
مقبولة ولا مش مقبولة
الناس لما اتكلمت عن أحمد الفيشاوي قبل كده وموضوع العمرة والوشم كان الناس تداولوا فتوى للدكتور أحمد ممدوح أمين الفتوى ومدير الأبحاث الشرعية في دار الإفتاء وإنه كان جاوب على الموضوع ده بخصوص اللي يعمل عمرة وهو راسم وشوم وقال إن الوشم اللي بيختلط فيه الدم بالاصباغ ده حرام شرعاً عشان إزالته هتسبب تشوه وهنا أجاز بعض العلماء التوبة من الفعل ده ومفيش حاجة عليه وكمان مفيش علاقة بين رسم الوشم وأداء فريضة الحج أو العمرة، والأداء هنا صحيح، لكن لو في طريقة لإزالة الوشم من غير ألم أو تشويه يبقى ده أحسن.
