بطلتها سيدة..مفاجأة في تفاصيل أزمة جديدة للفنان سعد الصغير

ورجعت حكايات سعد الصغير مع الستات من جديد، والسؤال الذي بطرح نفسه لماذا يفعل هذا في نفسه؟،  اسم المطرب الشعبي رجع يتصدر التريند من من جديد بسبب مشكلة جديدة مع سيدة ، فما القصة؟

غاوي مشاكل

سعد الصغير بيقول أنا مبتجوزش رقصات وغالبًا مفيش واحدة مدخلتش حياته إلا وهي يا بترقص يا فنانة مش معروفة للجمهور يا واحدة على الله عرفها وعملتله مشاكل، وده اللي حصل مع الراقصة شمس ومع الفنانة برلنتي عامر والاسم الأخير اللي سمعناه من كام ساعة رانيا صالح، واللي اتقال إنها طليقته واتعرف بعد كده إنها شغالة في كباريه يعني حكايات سعد بقت خلاص معروفة ليه بتكون معر رقصات محدش يعرف عنهم حاجة يمكن بيقضيها يمكن مزواج بس كل دول في الآخر هو غاوي مشاكل ومبيطلعش أدها، الغريب إنه لا بيبص لابنه اللي بقى أطول منه ولا لأم عياله اللي عاشت معاه سنين ووقفت جنبه.

حواراته كبيرة عليه

ليه بقى سعد الصغير بتكون الحوارات كبيرة عليه عشان في أطراف تانية بيتدخلوا في القصص بتاعته بيقع مع الرقاصة من دول وبيكون وراها رجالة مبيعرفش يواجههم وده اللي قاله بعضمة لسانه لما شمس الرقاصة ذلته وخليته يبوس رجلها ووقتها ظهر في برنامج تلفزيوني وقال أنا كنت مذلول وحواليا ناس وعشان أفلت منهم اتطلب مني أبوس رجلها وصوروني وكمان اتقالي تطلع في التلفزيون تقول إنك متجوزها في الحلال بس أنا ولا اتجوزتها ولا غيره، وواضح كده إنها جوازة عرفي وشمس مش عارفة تثبتها عشان الورقة اللي ما بينهم باشت ومايتها نشفت وهو بردوا اللي قال ده لا فيه ورقة ولا جواز ولا فيه شهود ولا محامي يثبتوا بقى إني اتجوزتها ولو معاهم ورق يطلعوه.

المشكلة إن برلنتي عامر اللي بتساعده دلوقتي في أزمته مع اللي بيقولوا عليها طليقته رانيا صالح وهو بينكر كان ليه معاه قصة بردوا وانتهت بتسوية الأمور بينهم بعد ما قالت إنها اتطلقت منه وهي بردوا مكانش حد يعرفها غير لما سمعنا بجوازها من سعد الصغير ووقتها شاركت في مسلسل “ولاد إمبابة” وكمان في فيديو كليب وقالت بالنص إن سعد طلب منها الجواز في السر وهي رفضت عشان من عيلة كبيرة، يعني حكاياته كلها عاوز يعملها في السر ولما بياخد غرضه ويفلسع بيلاقي اللي يقف ليه.

 طليقته والقبض عليه

الكلام عن رانيا صالح دلوقتي إنها طليقته وهو راح البيت ومعاه مراته برلنتي عامر واعتدوا عليها بس هي طلعت ناصحة وكل حاجة اتسجلت بالصوت والصورة والفيديو بتاعه سعد ومراته بقى عند الناس كلها ومقدرش ينكر المرة دي بس هو أنكر إنه يعرفها أصلا وبرودا قال أنا متجوزتهاش هو أي واحدة تطلع تقول كانت متجوزة سعد الصغير واتطلقت منه، دي كانت راكبة معانا العربية وأنا رايح التصوير وخذت حاجات تخصّني ولما برلنتي عرفت، روحنا البيت عشان نعرّفها إننا عرفنا وكشفناها، بس محصلش اعتداء عليها ورايحة تعمل محضر تتهمني بالكذب وتقول إنها طليقتي أنا ولا عمري اتجوزتها ومعرفهاش غير من قريب.

وبعد الفيديو ما انتشر والمحضر اتعمل علطول قسم الشرطة في الهرم جابوا سعد الصغير وبرلنتي عامر عشان يسمعوا أقوالهم وتقريبًا المحامي بتاع سعد الصغير ناصح وقاله يعمل محضر زيه وتبقى واحدة قصاد واحدة والموضوع شكله هيتساوى بعد ما طليقته دي قالت عاوزة تعهد على سعد ومراته إنهم ميتعرضوش ليا وتحموني منهم.

وبكده سعد الصغير يكون في حياته الستات دول شمس وبرلنتي ورانيا، بس سعد الصغير، أصلًا عنده 4 ولاد هما محمود، ومحمد وده لاعب كرة قدم في نادي سيراميكا كليوباترا، ومنة، وأحمد وكلهم من مراته الأولانية نور الهدى، تفتكروا بقى سعد الصغير ليه حورات تاني مع ستات تانية ولا هيتعلم من غلطاته وكفاية كده؟، اكتبولنا رأيكم في الكومنتات.