دائرة الكلام والخلافات والصراعات على السوشيال ميديا لا تنتهي، وكل يوم في كل حكاية يدخل طرف جديد في الموضوع لكي ينتقم من الطرف الآخر، ويطلع كلام جديد، ولكن المهم إن كل واحد يحاول يركب التريند، وأخيرا المغني الشعبي حسن شاكوش جاءت له فرصة لكي ينتقم من رضوى الشربيني، بعد ما تكلمت عنه بسبب خلافه مع ريم طارق زوجته..
حسن شاكوش باينله مش فاضي الفترة دي إن هو يشتغل ويشوف أكل عيشه، ولكن مركز أوي مع مين قال ايه ومين حضر فرحه، وخناقاته مع زمايله من مغنيين المهرجانات، وكان آخر حاجة ليه لما علق على أزمة رضوى الشربيني، بعد ما تم إحالتها للتحقيق بسبب منشور ليها وصفت فيه الرجالة بالخرفان، وبعدين كمان اتقدم بلاغ ضدها.
طبعا خلاف حسن شاكوش مع زوجته ريم طارق كتير مننا يعرف عنه، وده حصل بدايته في شهر مايو اللي فات لما فجأة حررت ريم محضر ضد حسن شاكوش، بإنه طردها من مسكن الزوجية واستولى على منولات ودهب وفلوس كانت تخصها، وحسن شاكوش اختفى شوية وبعدين رد بتحرير بلاغ ضدها، والنيابة استمعت لأقوالهم.
النيابة لما استمعت لأقوال الطرفين وحسب المنشور في صحيفة المصري اليوم، ريم قالت قدام النيابة إنها كنت سايبة الدهب بتاعها والقايمة والمنقولات نفسها في الفيلا، وإيصال أمانة هو كاتبه على نفسه بنص مليون جنيه، عشان قال المأذون هياخد فلوس كتير عشان المؤخر .
ومن ناحيته بعدها بكام يوم حرر حسن شاكوش محضر ضدها، وقال إنها زورت في عقد الزواج، لأنها مقالتش إنها كانت متجوزة قبل كدة وإن هو مكنش يعرف، وإن هو اتفاجئ بالكلام ده من خلال صورة منشورة ليها على السوشيال ميديا مع عريسها القديم.
حسن شاكوش كمان قال إن هو مطردهاش من البيت ولكن هو صحي من النوم اتفاجئ إنها لمت هدومها وقالتله أنا ماشية وهبعت أهلي ياخدوا حاجتي، وقال كمان إن مفيش قايمة اتكتبت والعفش اللي موجود في البيت كله هو اللي جايبه ومفيش وصل أمانة بنص مليون جنيه، والدهب كان معاها وكمان اتهمها بسرقة نص مليون جنيه من البيت في غيابه.
المهم يعني قضية حسن شاكوش كانت تريند وحديث لناس كتير، وهو شخصيا ركب التريند عليها، وعمل أغنية «عبستك إزاي يا دنيا وانتي مش بستاني» وهنا كان بيستغل المنشور اللي كان بيشير لمحادثة بين حسن شاكوكش وريم طارق والغلطات الإملائية اللي فيه.
في الوقت بتاع الخلاف علقت رضوى الشربيني، في منشور ليها وقالت: «كده يا حسن تطرد بنت الجيران بعد ما سجدت لربنا سجدة شكر قدام الناس كلها علشان اتجوزتك وكمان تدخلها القسم بعد شهرين جواز يا راجل».
المهم يعني إن حسن شاكوش قلبه إسود وبيشيل في قلبه كل حاجة، حتى اللي حضروا فرحه عارفهم، واللي محضروش علم عليهم وفضحهم.
خلال الأيام اللي فاتت بقى رضوى الشربيني اتعرضت لأزمة كدة، بسبب منشور على صفحتها، وصفت فيه الرجالة بإنهم خرفان، وده سبب حالة كبيرة من الجدل والغضب كمان، بسبب المنشور المسيئ ده، وبناء عليه أحالتها قناة سي بي سي للتحقيق، وقالت إنه بالرغم من إن الكلام ده مكنش منشور على حاجة تخص القناة، ولكن باردو تم إحالتها للتحقيق.
إلى جانب ده خلال الساعات اللي فاتت قرر واحد من المحامين تقديم بلاغ ضد رضوى الشربيني، بسبب منشور «مش فاهمة ليه البنات ما تحبش تاكل لحم الخروف بس تحب ترتبط به»، واستند في ده لإن رضوى الشربيني ارتكبت واقعة سب وقذف.
حسن شاكوش مصدق بقى، وقام معلق على الموضوع وقال إن رضوى الشربيني اتكلمت عن مشكلته مع زوجته ريم طارق بسبب إنها بتجري ورا التريند، وعشان ترفع نسب مشاهدات برنامجها.
بعد الموضوع ده رضوى الشربيني حذفت المنشور اللي اتسبب في حالة الجدل دي، وفي كلام إنها بتستعد لتقديم اعتذار عن اللي حصل ده وتوضح سوء التفاهم، ولكن لسة مش عارفين الأمور هتمشي على ايه.
