داري على شمعتك تقيد .. الفنانة ميرنا نور الدين طبقت هذا المثل الشعبي في حياتها ، و فجأة عرفنا انها ستتزوج من غير اي مقدمات ولا خطوبة، واختارت ان تخفي الموضوع حتى تنتهي من كل الترتيبات وتفاجئ الناس بزواجها.
ميرنا قررت تتجوز من خارج الوسط الفني رغم كل الاشاعات اللي طلعت عليها من فترة ، إلا انها بقى سابت الناس تتكلم وكملت حياتها وحبت وقربت تتجوز والناس متعرفش.
مين بقى عريس ميرنا ده ؟ شاب اسمه عمر عطية ملوش في التمثيل معاه الجنسية الأمريكية ، وعنده جيم كبير ، شكله كدا دماغ وعايش مع نفسه وعامل بيزنس خاص بيه
ميرنا حريصة جدا على ممارسة الرياضة ودايما بتنشر صور ليها وهي في الجيم ، ويمكن ده اللي خلاها اتعرفت على خطيبه عمر عطية ، وممكن يكون كمان هو صاحب الجيم اللي هي بتروحه اصلا، وده اللي هنعرف الايام الجاية لما تعلن جوازها يوم الجمعة.
يوم الاتنين الجاي هيكون كتب الكتاب ، والفرح هيكون يوم الجمعة ، وبدأت ميرنا تعزم صحابها المقربين بس وهيكون احتفال عائلي صغير مش فرح كبير زي اللي بيعمله باقي النجوم وهي حابة كدا خاصة انها اصلا مقالتش انها مخطوبة.
ميرنا من ساعة ما بقت معروفة وشوفناها في ادوار حلوة وبدأ طلع عليها اشاعات كتير انها على علاقة بأحمد عز بعد ما مثلت معاه في مسلسل الاختيار من سنتين ، وكانوا بيحبوا بعض في المسلسل وعملوا حالة حلوة.
الجمهور تخيل ان في بينهم حاجة في الحقيقة وان المسلسل ده كان هو البداية ، وبدأت بقى التوقعات انهم يحبوا بعض ونشوف صورهم ونسمع قصص وحكايات لكن ده محصلش فعلاً ومكنش في اي علاقة بين احمد عز و ميرنا نور الدين
كمان كان في كلام على ان ميرنا نور الدين هتتجوز ثري عربي ، لكنها فضلت ساكتة ومعلقتش على الكلام ده لحد ما اتفاجئنا نهاردة انها خلاص فرحها قرب ، ولا احمد عز بقى ولا ثري عربي ، ده صاحب جيم كبير ، وهي كمان بتحب الرياضة ودايما بتنشر صورها في الجيم.
ومن فترة انتشرت صورة لميرنا ومعاها طفل صغير وكل الناس افتكرت ان ده ابنها ، لكن هي نفت ده وقالت انا ولا متجوزة ولا عندي اطفال.
لكن الطفل ده اسمه ياسين وطلع ابن صديقها المقرب واللي ساعدها تدخل التمثيل، لكنه للاسف اتوفى وكان ابنه لسة مولود ، فهي بتحاول تكون قريبة من مراته وابنه وتساعدهم زي ما هو ساعدها ووقف جنبها، كانت دايما بتنشر صورها مع الطفل ده.
ميرنا نور الدين ممثلة اثبتت نفسها من كام سنة على الشاشة وكمان حبها الجمهور عشان جمالها وشياكتها ، وقررت وهي بتدرس انها تدخل مجال التمثيل وكانت حباه ونفسها تكون زي الممثلات اللي بتشوفهم في الافلام.
ودرست شوية في امريكا ورجعت خدت ورش تمثيل ، وكان اول دور عملته بالصدفة في مسلسل تحت السيطرة مع نيللي كريم ، وقررت انها تكمل في المجال لما حسيت انها نجحت وعندها لسة احلى واحلى.
لكن ميرنا وصحابها الممثلين اللي عملوا الجزء الخامس من مسلسل حكايات بنات اتعرضوا لهجوم كبير من الجمهور ، لاننا عشنا مع المسلسل ده 4 سنين وكل جزء بقصصه وحكاياته وفجأة اتغير كل الابطال في الجزء الخامس ومبقاش المسلسل في نفسه الروح اللي كلنا حبناها مع صبا مبارك ودينا الشربيني.
وعشان كدا اتهاجمت ميرنا نور الدين واسماء جلال ، لكنها قالت انها كانت متوقعة النقد ده ومزعلتش من كلام الجمهور لكن اتعلمت من التجربة
وبعد ما بدأت ميرنا تتشهر وتتعرف ، اتقال انها بتقلد ياسمين صبري والجمهور شبهها بيها ، وميرنا اتكلمت عن القصة دي وقالت انها مش بتضايق ووصفتها بانها ست حلوة وقمر واكيد مش هضايق لو قالوا اني زيها.
