أول ما نزلت البوستر، الناس هاجموها، واتهموها انها لا تحترم زوجها،كارول سماحة بدلا من أن تفرح بنجاح أغنيتها الجديدة .. تحاول تصلح علاقتها مع الجمهور، و قبلهم زوجها. حست ان الموضوع كبر زيادة عن اللزوم .. مع زيادة مشاهدات الأغنية الجديدة لها ،فقامت بنشر فيديو رومانسي لها مع زوجها على الأغنية ، فهل انتهي الموضوع عند ذلك؟
في فنانين أما بنسمع اسمهم بنبقى عارفين ان هيحصل قلق .. و قصدنا هنا ان الحوار بيكون بقى على مشاكل سواء في شغلهم ولا في حياتهم الشخصية .. زي مثلا أحمد سعد و لبسه .. أو شيرين و حسام حبيب ومشاكلهم سواء مع بعض .. و مع الناس في الشغل .. و غيرهم كتير .. وده بسبب ان الفنانين دول للاسف حياتهم الشخصية سايبنها السوشيال ميديا .. فطبعا الكل بقى بيدخل فيها .
و في فنانين تانيين عمرنا ما سمعنا عن أي مشكلة شخصية بتحصل ليهم .. مع ان أكيد بيحصل .. بس دائما حابين اللي يظهر للناس شغلهم .. و نجاحهم وبس .. و لو في اي حوار بيبقى ممكن في الشغل و ده عادي و طبيعي .
من الفنانين دول النجمة كارول سماحة .. و اللي من أول ما ظهرت .. اسمها مجاش في قلق على السوشيال ميديا الا كام مرة .. يتعدوا على صوابع الايد الواحدة .. و بتبقى حاجات بردو سهلة و بسيطة و بتتحل بسرعة في شغلها … ودائما اللي بيظهر منها نجاح أغاني .. حفلات .. كليب جديد .. و هكذا .. وده لانها مركزة جدا في شغلها .. و بتحاول تقدم أحسن ما عندها للجمهور .
وده اللي يمكن بيخليها تغيب فترة عن انها تنزل أغنية .. أو أغاني ورا بعضها من ألبوم ليها .. بس واضح ان ٢٠٢٣ وشها حلو عليها .. و من بدايتها نزلت في أغاني من ألبوها الجديد ” الألبوم الذهبي”… واللي كان بقالها فترة بتحضر فيه .
ومن كام يوم نزلت أغنية جديدة منه اسمها “نسخة مني” وديه اللي زعلت ناس كتير من كارول .. ويمكن ديه أول مرة تحصل .. و القصة بدأت من أول ما كارول نزلت بوستر دعاية للأغنية .. و كانت موجودة فيه هي و الموديل ومتصورين صورة ناس شافتها انها جريئة .
فبدأت الناس تكتب ليها تعليقات شوية بيهاجموها و ازاي تتصور كده و تنزل صورة كده .. و انتي مش بتحترم جوزك .. واحنا مش متعودين منك على كده .. و ناس تانية قليلة شافت ان الصورة عادية لانها بتعبر عن حالة الأغنية اللي هي رومانسية .. ومجراش حاجة يا جماعة و خليكوا فريش .
الموضوع ده فضل كام يوم كده و هدّي .. و الناس دخلت في تريندات حاجات تانية و عدت بقى .. بس الحقيقة انه لا ما عدتش .. لان الأغنية لسه نازلة من كام يوم بس .. فرجع تاني البوستر بتاعتها بتنشر بشكل أكبر .. و بدأت التعليقات تزيد بشكل أكبر .. و الناس شافت انها مينفعش تكون قدوة و لا توصل رسالة الفن .. مع ان الأغنية محققة ملايين المشاهدات .. في ظرف كام يوم بس .
القصة بردو مش هنا .. كارول فاجئت الناس بفيديو غريب .. و مش دائما كارول بتعمل كده .. و هي انها نزلت فيديو ليها هي و جوزها في قاعدة رومانسية .. و مشغلة أغنيتها الجديدة .. الناس اعتبرت ان كارول قاصدة تنزل الفيديو ده وباللي بيحصل فيه بينها و بين جوزها .. كاعتذار منها على البوستر .. خصوصا وده كمان جاي بعد ما انتشرت اشاعات كده انهم انفصلوا بسبب الصورة اياها .. وانها كانت عايشة فترة من المشاكل بسبب كده .
علشان كده نزلت الفيديو انهم مفيش مشاكل بينهم .. و الدنيا زي الفل معاهم .. يعني ردت بطريقتها .. لانها دائما مش بترد على أي اشاعات .. أو كلام اتقال عنها .. و دائما بتفضل انها تنزل شغل .. أو ترد بطريقة غير مباشرة .
كارول سماحة فنانة ناس كتير جدا بتحبها .. و شعبيتها في مصر كبيرة .. واللي بردو دلوقتي تعتبر مصرية .. لانها من ٤ سنين أخدت الجنسية .. و أول السنة ديه بقت عضو في نقابة الموسيقيين .
و اللي أول ما نزل خبر انها بقت عضو في النقابة .. ناس كتير اتكلمت و استغربت انها ازاي يبقى معاها عضوية وهي مش مصرية .. وساعاتها كارول دافعت عن نفسها و قالت انها مصرية من ٤ سنين .
