حياتها بدأت مع الباشا تلميذ وزكي شان بمعنى أن الجمهور عرفها على يد كريم عبدالعزيز وأحمد حلمي.. كملت مسيرتها في الفن وأصبحت تظهر وتختفي لفترة طويلة.
الناس اتفاجئت بيها من ساعة لما طلّعت كل المستخبي جواها عن حياتها الشخصية والفنية وقالت إنها نفسها تمثل وبس عشان دي هوايتها أصلها أول مرة تطلع تمثل على مسرح كان في سويسرا وركبها كانت بتخبط في بعضيها وبتترعش دي أصلا مثلت بالألماني.
ده غير إنها كان عندها داء السُكري بس خلاص خفت منه وشوية تصريحات كده عن أختها اللي لبست النقاب وجوزها الفنلندي اللي مش هتخلف منه وأبوها الألماني وكل التفاصيل دي وأكتر هقولكم عليها في التالي:
منى هلا اتولدت لأب ألماني وأم مصرية وباباها رحل وهي صغيرة كبرت على الآراء الجريئة أصلها دي طبيعة شخصيتها ويمكن اللي بتقوله الستات ميعرفوش يقولوه عشان هي مش خايفة حد يكرهها ولا محطوطة تحت ضغط المجتمع.. منى هلا واخدة ليسانس ألسن قسم ألماني من جامعة عين شمس سنة 2005.. وبدأت مسيرتها الفنية سنة 2001 بأدوار صغيرة وكملت بحد ما قدمت ببرنامج يلا بينا وبعدين صح صح معانا وبعدها شاركت في الباشا تلميذ وليلة البيبي دول وخدت لقب أحسن ممثلة شابة سنة 2008 وقدمت في سنة 2011 برنامج منى توف.. واستمرت أعمالها بين السينما والتلفزيون.
سر ورا العلاج
طبعاً كل شيخ وليه طريقة في العلاج والدكاترة بيشوفوا حالة كل واحد عاوزة إيه وبيقرروا.. بس منى هلا اللي كان عندها داء السُكري لا اعتمدت شغل دكاترة ولا غيره وهوب عملت نظام غذائي بتعتمد فيه على الأكل النباتي وبس وكمان هي بتحب يكون عندها رأفة بالحيوان عموماً وعشان كده مش بيدخل في أكلها خالص.. هي بقالها فترة على الحال ده وكمان بتقول إن النظام النباتي ده بيعالج الكانسر آه والله.
وواضح بقى إن منى هلا بتحب تعالج نفسها بالوصفات زي إنها عالجت شعرها عن طريق الجاز وبتقول في فنانة مشهورة هي اللي قالتلها على وصفة خلطت فيها الجاز الأبيض مع زيت خروع وزيتون مع جوز الهند ولما استخدمتها شعرها تقل وبقت مية مية وكمان شكلها الصغير ده سببه إنها محافظة على موضوع الأكل الكويس وعلاج البشرة والكلام ده بالمناسبة دي عندها 38 سنة والحقيقة مش باين عليها خالص..
ملهاش دعوة بحد
منى هلا بتحب تكون في نفسها والحرية مكفولة لكل واحد ده حتى أختها نادية اللي لبست النقاب قال مليش دعوة بيها وهي حرة في قرارها اللي لسه مستمرة عليه لحد دلوقتي.. بس استنوا هنا هو الموضوع لازم يكون في تعليق مثير ومشاكل والكلام ده لأ هي استغربت القرار ولحد دلوقتي مستغربة عشان نادية أصلا مثلت في كذا عمل.. لكن هما هيفضلوا اخوات بيجمعهم الدم الواحد مهما اختلفوا في الآراء بيفضلوا محترمين بعض وكمان نادية ملهاش دعوة بالتصريحات الجريئة اللي بتقولها هلا.
مش هتخلف
منى هلا متجوزة واحد فنلندي وأهلها مبسوطين بيه أساساً هي عملت زي خالها ما هو متجوز فنلندية بردوا وخالتها متجوزة إسباني يعني هما أصلا عيلة عندها ميكس جنسيات.. لكن منى هلا قررت متخلفش من جوزها وقالت إنها هتعيش حياتها وفلسفتها إنها ليه تجيب عيال يشوفوا حروب ومجاعات وكوارث طبيعية وعشان كده العيال مش هيكون ليها لازمة ولو كانت عاوزة طفل هتتبناه وتريح دماغها..
طبعاً كلام منى هلا ده مش روشنة منها.. هي مختارة واحد فنلندي عشان تكون مختلفة هي حبت مرتين بالغلط وقررت بعد كده تختار بعقلها وجوزها شخصية عملية وكمان طيب جداً وكريم وصادق.. وهي مش عاطفية وكمان هي معندهاش أحكام أخلاقية والممثل لازم يكون كده.. وشايفة إن الوحيدة اللي كانت كده هي الفنانة الراحلة سعاد حسني.
