كل ما بنسمع اسم احمد الفيشاوي يبقى عمل حاجة جديدة وغريبة ، متعودين منه على الجنان ودايما بيثير الجدل وبيتعرض لانتقادات كتير جدا على السوشيال ميديا.
طب عمل ايه المرادي ؟احمد الفيشاوي سافر السعودية من يومين عشان يحضر العرض الخاص لفيلمه الجديد ” رهبة ” هناك ، وزي ما كل الناس بتعمل لما بيسافروا السعودية ، راح يعمل عمرة ويهديها لوالده الفنان الراحل فاروق الفيشاوي
لحد هنا زي الفل ومفيش اي مشكلة ، لكن اول ما نشر احمد الفيشاوي صور وفيديوهات ليه على انستجرام وهو لابس لبس العمرة ، الدنيا اتقلبت عليه وكل المتابعين دخلوا ينتقدوه بشكل كبير ، رغم انه كتب عليها انه بيتعمر لأبوه الراحل ويارب تقبلها مني وتوصله.
كل ده بسبب الوشم اللي على جسم احمد وظهر طبعا وهو لابس لبس الاحرام ، والناس مقدرتش تقتنع بانه بيعمل عمرة بالشكل ده ، وواحد كتبله ” ازاي رايح تعمل عمرة بالمنظر ده ، طب كنت اسال شيخ قبل ماتروح ” وكنت المفروض تشيل الوشم عشان العمرة تتقبل، وكلام بقى من الكلام ده.
لكن ناس تانية دافعت عن احمد الفيشاوي وقالوا ان دي حاجة بينه وبين ربنا ، وهو ممكن يكون رايح يتوب ويبدأ حياة جديدة وأكيد وجوده قدام الكعبة واجواء العمرة دي هتغير حاجة في حياته ومش هيفضل تايه وبيعمل مشاكل بس.
لكن الفيشاوي حتى الان متجاهل اي حاجة اتقالت عنه وكل التعليقات السلبية اللي جاتله على صوره ، بالعكس راح واحتفل بالعرض الخاص بفيلمه في السعودية ،وبدأ يركز في شغله في الفترة الاخيرة عشان يحقق وصية ابوه.
طبعا دي مش المرة الأولى اللي بيعمل فيها الفيشاوي قلق زي كدا ، لدرجة ان الناس بدأت تسال عن ديانته وهل هو ملحد ولا ايه بالظبط خاصة وانه مر عليه فترة كدا في حياته مكنتش مفهومة ودايما مغلب باباه فاروق ومامته سمية وكل شوية يدخلهم في مشكلة شكل خاصة مع الستات.
كمان حياته الشخصية مليانة اسرار ، واتجوز تقريبا مرات ومعظمهم اجانب ، منها ألمانية وسورية ، واخر واحدة اتجوزها كانت ندى الكامل اللي عملوا دويتو مع بعض هايل خلاهم تريند السنتين اللي فاتوا بسبب الصور اللي كانوا بيتصوروها مع بعض على الريد كاربت ، لحد ما في الاخر انفصلوا.
ومرة اعترف أحمد الفيشا.وي انه حب شيرين رضا وكان نفسه يتجوزها لكن مكنش في نصيب ، والناس افتكرته بيهزر لكنه فعلا كان بيحبها من طرف واحد.
مشاكل كتير عملها احمد الفيشاوي لعيلته ، وكان كل شوية فاروق الفيشاوي وسمية الألفي يتفاجئوا بكارثة جديدة عملها ابنهم ، خاصة في علاقاته النسائية.
لدرجة انه كان متجوز هند الحناوي عرفي وخلف منها ورفض هو واسرته يعترفوا بالبنت ، لكن لما الموضوع اتعرف وانتشر ، وامها رفعت قضية نسب وفعلا المحكمة اثبتت انها بنته وهنا اضطر احمد واسرته يعترفوا ببنته لينا ، ونفس الموضوع حصل تاني لما اتجوز الالمانية وخلف منها ابنه ورفض يعترف بيه
اما الجوازة التانية كانت من وسام عاطف واللي استمرت 40 يوم بس وانفصلوا ، وبعد فترة سافر أحمد مع والدته سمية الألفي ألمانيا في رحلة علاج ، وهناك اتعرف على واحدة اسمها دنيس ولمان واتجوزها لكنه مقعدش كتير معاها برضه ،، معندوش وقت يضيعه
والمصيبة انها حملت منه وخلفت ولد ، وحصل بينهم مشاكل كتير عشان يعترف بيه رغم ان الواد نسخة منه وشبهه جدا لكن بعد مشاكل كتير اعترف بيه وبقى بيتكلم عنه كمان ونشر صورة ليه على انستجرام وكتب : ابني بقى اكبر واقوى ”
سمية الألفي كانت مضايقة جدا من قصة ابن احمد من الالمانية دي واتمنت انه ميطلعش حفيدها فعلا وقالت في لقاء تلفزيوني لما اتسألت عنه : الله أعلم معنديش أي مشاعر أو معلومات عن الموضوع ده، وسألت أحمد قالي لأ، ونفسي يطلع لأ.. لأني عايزة حفيد هنا يبقى في حضن أبوه وأمه مش طفل بتاع ليلة”.
