المطربة اللبنانية إليسا ترى أنها لا تمتلك موهبة التمثيل وأثبتت للكل إنها مغنية من الطراز الرفيع وهذا بعدما كان سيمون أسمر يراها ليست مشروع نجمة.
حياة إليسا مليانة أسرار وكواليس يعني عاشت في طفولتها بعيدة عن أهلها على حبة خلافات شخصية على حياة عاطفية مثيرة للجدل.. لحد ما بقت أغنى مطربة في الوطن العربي وثروتها الضخمة وصلت 48 مليون دولار.. وفي الفيديو اللي معايا ده هقولكم كل الأسرار عن حياة إليسا الفنية والشخصية.
طبعًا إليسا معروفة بلقب ملكة الإحساس وتعتبر من المطربات اللي ليهم جماهيرية كبيرة في الوطن العربي مش بس في بلدها لبنان.
وقدرت تعمل ألبومات عايشة مع الجمهور لحد دلوقتي وما زالت بتمتعهم بأغانيها وحفلاتها، لكن إليسا عمل مشكلة مع ميريام فارس واتخانقوا مع بعض ده غير إنها أحرجت الفنانة لطيفة التونسية وده كان على الهوا وفي عزْ ما هي واقفة على المسرح قدام الجمهور في السعودية.
طبعًا الرحلة طويلة ومليانة أحداث زي معافرتها مع الكانسر وانتصارها عليه لكن هي اتأخرت اليومين دول على جمهورها بخصوص ألبومها الجديد وده اللي خلى واحد يدخل عليها أوضة نومها ويرعبها وهي نايمة.
شخصية قوية
طفولة إليسا عملت منها شخصية قوية جدًا ويمكن الفترة اللي عاشت فيها بعيد عن أهلها هي اللي قوتها وعملت منها الست القوية دي.. وإليسا اسمها الحقيقي إليسار زكريا خوري اتولدت سنة 1972 بابها شاكر وكان بيدّرس الشعر والأدب ومامتها سورية وليها 5 أخوات.
ولما كان إليسا عندها 8 سنين دخلت مدرسة داخلية وقعدت لمدة 9 سنين تدرس وهي بعيدة عن أهلها وبتشوفهم في الأجازات بس وده اللي خلاها قوية الشخصية ومنظمة ومتزنة.. ودراستها الجامعية كانت بعيدة عن الموسيقى والفن واتخرجت من كلية العلوم السياسية في الجامعة اللبنانية.
رحلتها مع الغناء
طبعًا إليسا ليها رحلة ممتدة مع الغناء وصلت ربع قرن حققت فيهم شهرة ونجاح واسمها بقى معروف في الوطن العربي كله.. وهي عشقت الغنا من صغرها وكانت بتغني مع زميلاتها في المدرسة وكان الغنا أساسي في نشاطاتها المدرسة وسنة 1992 قدمت في ستوديو الفن وخدت الميدالية الفضية يعني طلعت التانية لكن سيمون أسمر شافها مش مشروع نجمة لكنها قدرت تتحدى نفسها والكل وتتربع على عرش الأغنية وكان أول ألبوم ليها بعد 6 سنين من البرنامج وقدرت تحقق بيه نجاح استمر سنتين في الصدارة.. ده غير إنها مع الوقت شاركت عضو لجنة تحكيم في برامج مواهب زي إكس فاكتور.
بتحب الشباب الحلوة
إليسا من صغرها وهي لاقية دعم من باباها وبيقولها ركزي في شغلك وإزاي تكوني مستقلة عكس مامتها اللي كان نفسها إنها تتجوز وتستقر لكن إليسا اختارت إنها تعيش الحب والحالة العاطفية من غير جواز.. وقالت إنها ملهاش في الجواز وبتحب الشباب الحلوة وطبعًا حبيبها اللي معاها بقاله 5 سنين أجنبي ومش عربي وهي مش عاوزة تتجوز وكفاية عليها تعيش إحساس الحب وجماله.
مواقف لا تُنسى
حياة إليسا على المستوى الشخصي فيها مشاكل بردوا يعني في خلاف قبل كده حصل مع الفنانة اللبنانية ميريام فارس وقالت عليها إنها بـ100 وش وده وهي متعرفهاش على الصعيد الشخصي ولما كانت في المغرب واتكلمت عن مصر دافعت عنها وقتل يمكن خانها التعبير.
لكن إليسا استغربت من هجوم ميريام عليها وده اللي خلاها تعتبرها فنانة استعراضية ومش طربية.. الغريب بقى إن كان في ملايين من المشاهدين بيتابعوا حفلة ريو في السعودية ودي كان بيطلع فيها كل 3 نجوم يغنوا مع بعض ووقتها كان مترتب تطلع إليسا وأصالة ولطيفة لكن إليسا كانت عاوزة تطلع الأول على المسرح وده اللي خلى لطيفة متسمعش كلاما وتقول أنا اللي هطلع الأول ومع إصرار لطيفة بدأت إليسا تردلها القلم وتعمل حركات غريبة وتظهر كإنها مشمئزة من صوتها والغنا معاها.
تأخير الألبوم
إليسا لحد دلوقتي مطرحتش ألبوها الجديد وده اللي خلى معجب يقتحم عليها أوضة نومها ويسألها على معاد نزول الألبوم.. طبعًا ده كان ضمن حملة دعائية لإليسا لكن الفيديو انتشر والمعجب بيقولها إمتى هتنزلي الألبوم فردت وقالت إحنا عندنا حفلة وبعدين أنا عاوزة أنام سيبوني أنام شوية.. ومن وقتها الجمهور مستني يشوف إيه الجديد اللي هتقدمه النجمة اللبنانية اللي تعتبر من أكتر المطربات اللي عندهم ثروة ضخمة كونتها من ورا شغلها في العقارات والأراضي وحسب مجلة فوربس الأمريكية وصلت ثروة إليسا في 2017 لـ48 مليون دولار ولكن ده ميمنعش إنها اتأثرت بالأزمة الاقتصادية اللي حصلت في لبنان.
