السعودية أهل طرب وخلال السنوات الأخيرة اشتهرت بتقديم حفلات غنائية وليالي تكريمية كثيرة ، حققت من خلالهم نجاح باهر ولكن الجمهور كان له رأي أخر في حفل روائع الموجي فكيف علق الجمهور على الحفل؟
أنغام ملهاش منافس
الحفل كان مقام في الرياض وتحديدًا على مسرح أبو بكر سالم في منطقة بوليفارد رياض سيتي، وبترعاه هيئة الترفيه السعودية برئاسة المستشار تركى آل الشيخ، وكان طبيعي إن الحفل يبدأ بفيلم تسجيلى عن الموجى، من أول نشأته لوصوله لأعلى درجات الموسيقى والألحان.
واتكلم في الفيلم ده هاني مهنا وطارق الشناوي والشاعر بخيت بيومي والموسيقار هاني شنودة والشاعر بهاء الدين محمد وغيرهم وكانوا يحكوا قصص من حياته وعن علاقة محمد الموجي بالطرب السعودي والشعراء ومنهم محمد عبده وطلال مداح وعبادي الجوهر.
والفنانة أنغام مكانش ليها حل في الحفلة ده ولو دورت على منافس مش هتلاقي والصراحة أبدعت وأثبتت إنها صوت مصر الأصيل لنجاة تغني لعبدالحليم تغني مفيش عندها مشكلة تلاقيها متمكنة في كل كلمة بتقولها لدرجة إن الجمهور أشاد بصوتها واعتبرها الأفضل في الحفل، لكن اللي عمله صابر الرباعي ياريته ما اتعمل وكانت البداية بيه مش في مكانها.
صابر الرباعي مش جبار ولا حاجة
وكان حفل روائع الموجي بصم على افتتاحه المطرب التونسي صابر الرباعي واللي بدأه بأغنية العندليب “جبار” وبدأ الجمهور يتفاعل معاه بس معرفش يقدم للجمهور اللي يرضيه وطبعًا عشان الحفلة متاحة للجمهور لايف على السوشال ميديا فكان جمهور مواقع التواصل ليهم رأي بردوا في اللي بيتقدم واللي أغلبهم قال لو في لوحة ديكور فيها عبدالحليم وصوته على الأغنية في الخلفية كان هيبقى أحسن من اللي قدمه الرباعي اللي كان تقريبًا تايه.
شيرين عبدالوهاب ضاعت واعتذرت
وكله كوم وشيرين عبدالوهاب كوم تاني يعني هي صوت حلو وإحساس عالي وبدأ الحفل كويس بس تاهت بردوا وواضح إن في حاجة شغلاها ومش هنقول رهبة الجمهور وأصوات الزمن الجميل والكلام ده عشان عندها الخبرة اللي تكفيها سنين قدام تعمل ياما حفلات ومتغلطش في الغنا خالص.
وفعلًا وقعت في الغلط وهي بتغني “للصبر حدود” لكوكب الشرق أم كلثوم وغلطت في كلمات الأغنية بس اعتذرت وقالت: “آسفة على الغلط بس أم كلثوم بتخوف”، وتقريبًا رهبة الغناء لأم كلثوم كانت مسيطرة عليها والحفل كان تقيل على شيرين.
مي فاروق تفوقت على نفسها
وفي الحقيقة الفنانة مي فاروق تفوقت على نفسها في الحفلة دي وكل حاجة قدمتها صح ما هي في الأصل مطربة الأوبرا وأغاني الزمن الجميل دي علطول بتقدمها وبتطربنا بيها مش مستنية حفل الموجي عشان تظهر وتقريبًا دي أصح اختيار في الحفلة والكل أشاد بصوتها وقالوا عليها دي صاحبة الصوت الحقيقي والفن الرفيع.
نشاز عبادي الجوهر
ويمكن المطرب السعودي عبادي الجوهر كان من أكتر المطربين اللي عليهم علامة استفهام في الاختيار ده وخاصًة لما غنى “كامل الأوصاف” والجمهور سخر منه وقال ملقاش إلا هي دي تناسب طبقة صوته وفي اللي اترحم على عبدالحليم حافظ وقال إنه لو كان عايش كان ولع في عبادي الجوهر والمنظمين والفرقة الموسيقية.
وتقريبًا كده عبادي الجوهر حس إنه الموضوع فلت منه راح مغني بعدها للفنان طلال مداح ومسك العود اللي مشهور بيه وقال يعود اللي فاته رغم إن الحفلة بتاعة الموجي وطلال كان اتعمله ليلة قبل كده بس أهو مشي حالك.
ورغم إن كان في فنانيين تانيين شاركوا في الحفل زي ماجد المهندس ووائل جسار وغيرهم لكن التفاعل معاهم مكانش زي شيرين ومي فاروق وأنغام، وفي ناس اتمنت لو كان الفنان مدحت صالح بيشارك في الحفل ده يمكن الوضع كان اتغير شوية والحفل كان بقى أفضل.
